“ACE” və digər kimyəvi-təmizləyici vasitələrin tərkibində qələvi və turşu məhlulların miqdarı çoxluq təşkil edir, bu da normadan artıq miqdarda orqanizmə daxil olduqda problemlər yaradır”
Qadınlar evdə təmizliyə nail olmaq üçün müxtəlif kimyəvi-təmizləyici vasitələrdən istifadə edirlər. Xüsusən də mətbəxin, ayaqyolu və vanna otağının təmizlənməsində qadınların köməyinə bu cür vasitələr çatır. Evində təmizliyə nail olmaq istəyi bəzi hallarda qadınların zəhərlənməsinə səbəb olur. Hətta təəssüf ki, bu vasitələrdən zəhərlənərək həyatını itirən qadınlara da rast gəlmək olur.
Məlum olduğu kimi, bu günlərdə Qobustan rayonunda evində təmizlik işləri görən qadının kimyəvi zəhərlənmədən həyatını itirdiyi bildirilir.
Qeyd edilənə görə, Qobustan rayonu, Təklə Mirzəbaba kənd sakini, 1986-cı il təvəllüdlü Səbinə Musayeva kimyəvi zəhərlənmə diaqnozu ilə Şamaxı Rayon Mərkəzi Xəstəxanasına daxil olub və orada vəfat edib. İlkin araşdırma zamanı müəyyən edilib ki, S.Musayeva mayın 13-də yaşadığı evdə “ACE” kimyəvi-təmizləyici maddədən istifadə edərək evin mətbəxini təmizlədikdən sonra özünü narahat hiss edib və axşam saatlarında xəstəxanaya yerləşdirilib. Mayın 14-də səhərə yaxın, saat 04 radələrində isə dünyasını dəyişib. S.Musayevanın ölümünün müəyyən edilməsi məqsədilə məhkəmə-tibb ekspertizası təyin edilib, Rayon Prokurorluğunda araşdırma aparılır.
Onu da vurğulayaq ki, həm “Net”, həm “ACE”, həm “Domestes” kimi kimyəvi-təmizləyici vasitələrdən istifadə edən qadınların bir çoxu bundan sonra baş ağrıları, ürəkbulanması, gözlərinin qıcıqlanması, boğulma kimi hallardan şikayətlənirlər.
Mütəxəssislər bildirirlər ki, qadınlar bu vasitələrdən təmizlik üçün istifadə edərkən qapı və pəncərələri açıq saxlamalıdırlar. Çox zaman bu vasitələrdən qapalı şəraitdə istifadə edildiyini deyən mütəxəssislərin sözlərinə görə, sözügedən vasitələrin tərkibindəki xüsusi zəhərli maddələr qadınların səhhətinə ciddi təsir edir və bu onların zəhərlənməsi ilə müşayiət olunur.
Kimyəvi-təmizləyici məhlul olan “ACE”nin tərkibində hansı maddələr ola bilər ki, o maddələr qadının ölümünə səbəb olub?
- Rasif Bağırov: “Tənəffüs vasitəsilə daxil olan kimyəvi-təmizləyici maddələrin mənfi təsiri daha güclü olur”
Tanınmış həkim Rasif Bağırovun sözlərinə görə, ümumiyyətlə, bu kimi təmizləyici vasitələrdən istifadə edərkən ehtiyatlı olmaq lazımdır. Müsahibimizin dediyinə görə, bütün kimyəvi-təmizləyici vasitələrin tərkibində ağır və zəhərli maddələr olur və həmin maddələr də immun sistemi zəif olan insanlara mənfi təsir göstərir. Bu vasitələrdən zəhərlənmə hallarının əsasən tənəffüs yolu ilə baş verdiyini bildirən ekspert onu da əlavə etdi ki, bunun öldürücü təsiri o zaman olur ki, həmin insanın başqa bir xəstəliyi də olsun. “Kimyəvi-təmizləyici vasitələrin tərkibi çox müxtəlifdir. Onların tərkibinə bəzi hallarda qələvi maddələr, normadan artıq turşu məhlulları əlavə edirlər. Bu da ona görədir ki, təmizlənməyə ehtiyacı olan nayihələri yandırıb parçalasın və təmizlik effekti yaratsın. “ACE” və digər kimyəvi-təmizləyici vasitələrin tərkibində qələvi və turşu məhlulların miqdarı çoxluq təşkil edir, bu da normadan artıq miqdarda orqanizmə daxil olduqda problemlər yaradır. Əgər belə adamların bədəninin müqaviməti yaxşıdırsa, immun sistemi güclüdürsə, həkimlər o şəxsə kömək edə və həyata qaytara bilir. Belə vasitələr ya tənəffüs, ya da qida vasitəsilə orqanizmə daxil olur. Bu, qida vasitəsilə daxil olduqda xəstəyə elə də ciddi təsir göstərmir və həkim müdaxiləsi sayəsində bu, aradan qaldırılır. Ancaq tənəffüs vasitəsilə daxil olan kimyəvi-təmizləyici maddələrin mənfi təsiri daha güclü olur. Çünki tənəffüs vasitəsilə daxil olanda o bilavasitə qana keçir və yüksək konsentrasiya əldə etmək qabiliyyəti yüksək olur. Bu da xəstənin orqanizmində müqavimət zəifdirsə, immun sistem gücsüzdürsə, onun həyatını itirməsinə səbəb olur. Konkret olaraq Qobustan rayonunda “ACE”dən zəhərləndiyi üçün həyatını itirən qadına gəlincə, deyə bilərəm ki, o bu vasitəni tənəffüs yolu ilə qəbul edib. Ola bilsin, tənəffüs yollarında hansısa bir xəstəlik olduguna görə bu onun vəfatı ilə nəticələnib. Həmin xəstəlik də qıcıqlandırıcı vasitələr yolu ilə güclü şəkildə reaksiya verir. Yəni proseslər yığılır və xəstənin ölüm vəziyyətinə gətirir. Açığını deyim ki, bu xəstənin məhz “ACE”dən zəhərlənib bu vəziyyətə düşməsini nisbi qəbul edirəm. Çünki, birincisi, “ACE”dən həyatını itirdiyi deyilən qadının bütün xəstəlikləri araşdırılmalıdır. Bəlkə onun orqanizmində elə xəstəlik olub ki, ora daxil olan maddə də onunla qarşılıqlı şəkildə xəstənin vəziyyətini ağırlaşdırıb”.
R.Bağırov qeyd etdi ki, qırtlaq nahiyəsində “boz əzələ” deyilən bir əzələ var, həmin kimyəvi maddələr vasitəsilə bu əzələdə qıcıqlanma yaranır, bu da kəskin şəkildə sıxılma verir və xəstəni boğub öldürür. “Bu hamıda olmur. Ancaq bəzi adamlarda bu baş verir və o, həyatını itirir” - deyə müsahibimiz bildirdi.
İradə SARIYEVA
