25/05/2019 19:50
728 x 90

Təhsil Nazirliyi şagird intiharlarının kökləri ilə bağlı orijinal platforma nümayiş etdirdi – məktəblərdə şagirdi intihara sövq edən nə ola bilər ki?

“Məktəblilərin intihar etməsinin əsas səbəblərindən biri onların ailələrində yaşanan problemlərdir”

img

Son zamanlar Azərbaycanda orta məktəb şagirdlərinin intiharı ilə bağlı xəbərlərə tez-tez rast gəlinir. Şagirdlərin intihar etməsi ilə bağlı sosial mediada müxtəlif fikirlər səslənir. Əsasən şagirdin intihar etməsinin səbəbi kimi məktəblərdə təlim-tərbiyə işinin düzgün qurulmaması, şagirdlərlə psixoloji işin səviyyəsinin aşağı olması göstərilir. Ancaq sosial araşdırmalar və dövlət qurumlarının apardığı monitorinqlər bu fikrin əsassız olduğunu ortaya çıxarır.

Təhsil nazirinin müavini Firudin Qurbanov “Beynəlxalq Ailə günü”nə həsr edilən “Ailə dəyərlərinin möhkəmləndirilməsi cəmiyyətin mənəvi sağlamlığının əsasıdır” adlı konfransda çıxışı zamanı bildirib ki, şagirdlərin intihar etməsinin səbəblərindən biri ailədaxili münaqişələrdir: “Son zamanlar orta məkəblərdə şagirdlərin intihara əl atmasının səbəbləri çoxdur. Bu səbəblərdən biri də ailədaxili mühitdir, münaqişələrdir. Bu mühit bəzi hallarda uşaqların psixikasını pozur. Belə olduqda həkimlər işə qarışmalıdırlar”.

Ekspertlər də hesab edirlər ki, məktəblilərin intihar etməsinin səbəbi onların şəxsi həyatında yaşadığı problemlər, ailə daxilində yaşanan münaqişələrdir.

  • Könül Vaqifqızı: “Məktəblilərin psixoloji təsirə məruz qalması, sevgi münasibətləri, iqtisadi amillər, valideynlərin onlarla düzgün münasibət qurmaması kimi arqumentlər üstünlük təşkil edir”

Psixoloq Könül Vaqifqızı bizimlə söhbətində qeyd etdi ki, məktəblilərin intihara meylli olması isə müxtəlif amillərdən qaynaqlana bilər. Əsasən yeniyetmələrin psixoloji təsirə məruz qalması, sevgi münasibətləri, iqtisadi amillər, valideyinlərin onlarla düzgün münasibət qurmaması kimi arqumentlər üstünlük təşkil edir: “İnsanın ən çox psixoloji sarsıntıya məruz qaldığı dövr məhz 7 yaşdan 17 yaşa qədər olan vaxtdır. Bu səbəbdən də həmin yaşda olan uşaqlar mütləq mütəmadi olaraq psixoloq nəzarətində olmalıdırlar. Elə buna görə də, beynəlxalq praktikaya uyğun olaraq, bütün məktəblərdə psixoloqlar işləyirlər. Təəssüflər olsun ki, rayonlarda və ucqar kəndlərdə psixoloq çatışmazlığı yaşanır. Orta məktəblərin çoxunda psixoloqlar yoxdur, yaxud onlar vəzifələrini düzgün yerinə yetirə bilmirlər”.

Həmsöhbətimizin sözlərinə görə, məktəblilərin intihar etməsi həm də onların ailələrində yaşanan problemlərlə bağlıdır: “Bu hal daha çox boşanan ailələrdə müşahidə olunur. Həmçinin, uşaqlar arasında fərq qoyulması da intihara gətirib çıxara bilən səbəblərdəndir. Digər faktor isə intihara cəhd edən yeniyetmələrin daha çox ruhi problemi olan və alkoqolizmdən əziyyət çəkən şəxslərin ailəsində böyüməsidir. Göstərilən məqamların hər biri ailələr üzərində uzunmüddətli tədqiqatlar əsasında müəyyənləşdirilib”.

Günel CƏLİLOVA

Son xəbərlər