Bu gün Azərbaycanda müxtəlif su filtrləri satan şirkətlər peyda olub. Həmin şirkətlərin nümayəndələri ev-ev, qapı-qapı gəzərək işlədikləri şirkətlərin məhsulunı satmaq istəyirlər. Əlbəttə, hər bir şirkətin öz məhsullarını satması təbiidir. Ancaq onlar öz məhsullarını, su təmizləyicilərini, filtrlərini əhaliyə aldırmaq üçün düzgün üsul seçmirlər.
Maraqlıdır ki, bu şirkətlər öz məhsullarını təqdim edərkən ölkənin içməli su təminatını şübhə altına alan fikirlər səsləndirirlər. Onlar heç bir fakta əsaslanmadan bildirirlər ki, əhaliyə verilən içməli su ekoloji cəhətdən təmiz deyil və insanlarda bir sıra xəstəliklərin yaranmasına səbəb olur.
Su filtri satan şirkətlərin əməkdaşları iddia edirlər ki, guya bizdə içmək və çimmək üçün istifadə edilən su dizenteriya, qarın yatalağı, eləcə də başqa xəstəliklər yayır. Onların iddialarına görə, Azərbaycanda əhaliyə verilən içməli suyun tərkibi standartlara uyğun deyil. Sirr deyil ki, bu da əhalidə ciddi narahatlıq yaradır və onlara belə gəlir ki, suyun keyfiyyəti standartlara uyğun deyil, bu səbəbdən də filtr satan şirkətlərin toruna düşürlər. Əhalinin narahatlığından sui-istifadə edən şirkətlər onlara öz məhsullarını ya nağd, ya da kredit yolu ilə satmağa nail olurlar. Hətta elə sakinlər var ki, onlar nəinki içməli su kranına, eləcə də hamamxanaya həmin şirkətlərin satdıqları filtrləri qoyublar. Su filtrinin qiyməti isə olduqca bahadır. Bəzi müştərilərin verdiyi bilgiyə görə, filtr 1200 manata satılır.
Ölkədə fəaliyyət göstərən su filtri satan şirkətlər bu davranışları və təbliğatları ilə dövlətin içməli su təminatı siyasətinə kölgə salırlar.
Məlum olduğu kimi, əhalinin ekoloji cəhətdən içməli su ilə təmin olunması dövlətin əsas hədəflərindən biridir. Dövlətimiz bütün mövcud su təmizləyici cihazlardan istifadə edərək əhalinin içməli su təminatını həyata keçirir.
Anar Cəbrayıllı: “Bu şirkətlər gündəlik strateji məhsul olan içməli suyun keyfiyyəti haqqında yalan, iftiralar dolu məlumatlar yayır, öz məhsullarını satmaq məqsədilə əhaliyə verdiyimiz içməli suyun keyfiyyəti haqqında həqiqətə uyğun olmayan fikirlər səsləndirirlər”
“Azərsu” ASC-nin mətbuat katibi Anar Cəbrayıllı “Bakı-Xəbər”ə bildirdi ki, həm regionlarda, həm də Bakı şəhərində əhaliyə verilən içməli suyun keyfiyyəti standartlara tam uyğundur.
“Biz dəfələrlə su filtri satan şirkətlərlə bağlı mətbuatda məlumatlar vermişik. Bu şirkətlər gündəlik strateji məhsul olan içməli suyun keyfiyyəti haqqında yalan, iftiralar dolu məlumatlar yayır, öz məhsullarını satmaq məqsədilə əhaliyə verdiyimiz içməli suyun keyfiyyəti haqqında həqiqətə uyğun olmayan fikirlər səsləndirirlər. Əllərinə iki dənə qondarma cihaz götürüb qapı-qapı gəzirlər. Onlardan biri elektro cihazdır, onu aparıb bizim krant, şəbəkə suyumuzu götürürlər, orada kimyəvi proseslər gedir, duzlar, minerallar həll olunur, bu da suyun üzündə çöküntü yaradır. Onlar da bu çöküntünü camaata göstərib deyirlər ki, suyun içində palçıq, lil var. Bununla da həmin şirkətlər camaatı aldadırlar. Əsas məqsədləri də odur ki, fırıldaq yolu ilə öz məhsullarını satsınlar” - deyə A.Cəbrayıllı bildirdi.
O, həmçinin, vurğuladı ki, abonentlərə keyfiyyətsiz su verilmir və təmsil etdiyi qurum əhalinin içməli su ilə təmin olunmasını həyata keçirir: “Biz istəmərik ki, abonentlərimizə keyfiyyətsiz su verək və vermirik də. Su müvafiq mənbələrdən götürülür, anbarlara vurulur və evlərə vurulana qədər də mütəmadi yoxlanılır. Bizim laboratoriyalarda il ərzində ən az 16 min su nümunəsi yoxlanılır. Biz bu məsələni daim nəzarətdə saxlayırıq. Bundan başqa, ölkədə suyun keyfiyyətinə Səhiyyə Nazirliyinin Gigiyena və Epidemiologiya Mərkəzi nəzarət edir. Yəni biz əhaliyə pis su verməyə çalışsaq belə, sözügedən qurum həmin suyun verilməsinin qarşısını alacaq” - deyə A.Cəbrayıllı bildirdi.
O, həmçinin, vurğuladı ki, evlərə verilən suyun keyfiyyəti ilə bağlı heç bir problem yoxdur. “Sadəcə, filtr satan işbazlar bizim suyumuzu pisləməklə, öz işlərini görməyə çalışırlar” - deyə A.Cəbrayıllı qeyd etdi.
İradə SARIYEVA
