Bakı və onun ətraf qəsəbələrində son bir neçə ildə xeyli iş görülüb. Belə ki, 7 il əvvəl “Bakıətrafı qəsəbələrin sosial-iqtisadi inkişafı proqramı” qəbul edildi. Sözügedən proqram çərçivəsində bir sıra işlər görüldü. Bakının ətrafında yerləşən qəsəbə və kəndlərə yeni qaz, rabitə, su-kanalizasiya, elektrik xətləri çəkildi.
Ancaq müşahidələr göstərir ki, bu yöndə görülən tədbirlər bütün yeni salınan yaşayış massivlərini əhatə etmir. Xüsusən də yeni salınan yaşayış massivlərində əhalinin su təchizatında problemlər var. Belə yaşayış massivlərindən biri də Binə Atçılıq sovxozudur. Adıçəkilən ərazidə yaşayan sakinlər illərdir üzləşdikləri su problemindən yaxa qurtara bilmirlər. Sakinlərin dediyinə görə, Binə qəsəbəsinin Atçılıq sovxozu adlanan massivində 10 minə yaxın əhali yaşayır. Burada məskunlaşan sakinlərin böyük əksəriyyəti rayonlardan gəlib muzdla çalışan fəhlələrdir. Bir vaxtlar sözügedən ərazidə torpağın qiyməti nisbətən ucuz olduğundan, orada yer alıb ev tikiblər. Burada hər addım başı yeni evlər tikilsə də, sanitar xətlər, su boruları yoxdur. Bundan fərqli olaraq, qaz və elektrik xətləri çəkilib. Yol isə torpaq olduğundan, sakinlər qış aylarında çox böyük çətinliklərlə üzləşirlər. Qışda palçıq olduğundan, buradan keçmək qeyri-mümkün olur. Sakinlər deyirlər ki, torpaq sarı olduğundan, ayağa yapışan palçıq qopmur. Üstəlik, xeyli sayda küçə olsa da, bunların da heç birinin adı yoxdur. Burada zibil qabları qoyulmadığı üçün, əhali məişət tullantılarını elə yolun kənarına tökür. Nəticədə isə böyük bir ərazi çirklənmiş vəziyyətdədir.
Ələkbər Nəbiyev: “Quyu suları duzlu olduğundan, kombilər tez sıradan çıxır”
Atçılıq sovxozunda yaşayan Ələkbər Nəbiyev qəzetimizə etdiyi şikayətində bildirdi ki, onları ən çox narahat edən məsələ ərazidə su təminatının olmamasıdır: “On beş ildən çoxdur burada yaşayıram. Hər cür çətinlik gördük. İlk illərdə elektrik təminatı pis vəziyyətdə idi. İllər sonra xətlər yeniləndi. Daha sonra yeni qaz xətləri çəkildi. Qaz xətti çəkilsə də, qışda qazın təzyiqi aşağı olur. Ancaq bizim ən başlıca problemimiz su təminatı ilə əlaqədardır. Yaşadığımız ərazidə su xətti yoxdur və bu səbəbdən içməli suyu pulla alırıq. Bu da baha başa gəlir. İnsan sağlamlığı üçün ən təhlükəli olan problem qəsəbənin su və kanalizasiya sisteminin olmamasıdır. Su problemini hər kəs öz imkanına görə həll edir. İmkanı olan hər ay 40 manat ödəməklə su maşınları ilə çəninə su vurdurur. İmkanı olmayan isə həyətində quyu qazdırıb yerdən çıxan qrunt sularından, duzlu sudan istifadə etmək məcburiyyətində qalır. Qəsəbənin əksər sakinləri ailəsini günəmuzd işləməklə dolandıran fəhlələr olduğundan, su almağa hər dəfə imkanı olmur. Xüsusən də yay fəslində suya tələbat yüksək olur. Həyətlərdə qazılan quyularda çıxan su duzlu olduğundan, heç ağacları belə, suvarmağa yararlı olmur. Həmin su ilə çimmək problemlidir. Quyu suyu duzlu olduğu üçün çiməndə bədən qaşınır. Digər tərəfdən, quyu suları duzlu olduğundan, kombilər tez sıradan çıxır. Burada yaşayan sakinlər dəfələrlə bu problemlə üzləşiblər. Burada yaşıllıqlar çox azdır. Ona görə azdır ki, şirin su problemi var. Su çəkilsə, yaşıllıqların da sayı çox olar. Əfsuslar olsun ki, bu problem hələ də öz həllini tapmayıb. Dəfələrlə su xəttinin olmaması ilə bağlı müvafiq qurumlara müraciət etmişik. Eyni zamanda, susuzluğun yaratdığı problemləri media vasitəsilə ictimailəşdirmişik. Ancaq təəssüflər olsun ki, hələ də səsimizə səs verən olmayıb. Bütün bunlara baxmayaraq, heç bir irəliləyiş yoxdur. Binə qəsəbəsinin havası quru olduğundan, yayı çox isti keçir. Suya tələbat xeyli artır. O üzdən, çox istərdik ki, bu əraziyə su çəkilsin və əhali bu zülmdən xilas olsun”.
Atçılıq sovxozunda su probleminə "Azərsu" Açıq Səhmdar Cəmiyyətinin münasibətini öyrənmək istəsək də, qurumla əlaqə yaratmaq mümkün olmadı.
Vidadi ORDAHALLI
