Bu gün dünyanın müxtəlif şəhərlərində yeniyetmələrin küçələrdə, meydanlarda, keçidlərdə müxtəlif məhsullar satdığı məlumdur. Onlar bununla ailələrinə maddi dəstək göstərir, ailə qayğılarına dayaq dururlar. Şəhərimizdə də belə yeniyetmələrə rast gəlmək mümkündür. Halal zəhməti ilə çörək qazanan yeniyetmələrə hər birimizin dayaq durmağımız vacibdir.
Qeyd edək ki, bəzən belə yeniyetmələrə dəstək vermək əvəzinə, onları qınayanlar da olur. Belə bir hal Bakıda da yaşanıb. Məlum olduğu kimi, deputat Rasim Musabəyov “Azneft” meydanındakı yeraltı keçiddə popkorn satan yeniyetmə ilə bağlı sərt fikirlər bildirib və onu həmin ərazidən uzaqlaşdırmağa nail olub. “Bakılıları və şəhərin qonaqlarını sevindirmək üçün dövlətin milyonlarla manat vəsaitinin xərcləndiyi yeraltı keçiddə popkorn satıcısı həyasızcasına yerləşib və yanıq qoxusu ilə bütün ətrafı iyləndirib. İcazəsiz işləyir, dövlətin elektrik enerjisindən pulsuz istifadə edir, vergi ödəmir. Bakılıları zəhərləməmək və bizi qonaqlar qarşısında biabır etməmək üçün kim tədbir görəcək?” - deyə bildirən deputatın bu davranışı ictimaiyyət tərəfindən kəskin qınağa məruz qaldı. Onun bu hərəkəti həm həmkarları, həm də ictimaiyyət tərəfindən qətiyyətlə pisləndi.
Popkorn satan yeniyetmənin keçiddən uzaqlaşdırılması məsələsinə Təhsil Nazirliyi operativ reaksiya verib. Təhsil Nazirliyinin İctimaiyyətlə əlaqələr sektorunun müdiri Cəsarət Valehov mətbuata bildirib ki, artıq məsələ nəzarətə götürülüb: “Bir neçə gündür “Azneft” meydanının yaxınlığındakı keçiddə popkorn satan yeniyetmə ilə bağlı geniş müzakirələr aparılır. Təhsil Nazirliyi rəhbərliyinin tapşırığı ilə həmin gənci tapdıq. Aydınlaşdırdıq ki, Seyfullayev İsrafil Vüqar oğlu 2002-ci ilin noyabrında Biləsuvar rayonunun Günəşli kəndində anadan olub. 17 yaşı var. 2017-ci ildə IX sinfi, icbari təhsil mərhələsini bitirib. Hazırda təhsil almır, Binəqədi rayonunda yaşayır”.
Nazirliyin sözçüsü qeyd edib ki, Əmək Məcəlləsi hər bir kəsə 15 yaşından sonra işləmək hüququ verir. “İsrafilin arzusuna uyğun olaraq ona peşə məktəbinə qəbul olunması üçün təklif ediləcək” - deyə bildirən C.Valehovun sözlərinə görə, yeniyetmənin peşə təhsilinə cəlb edilməsi haqqında düşünürlər.
Sevinc Nuruqızı: “Nazirliyin həmin yeniyetmənin şəxsiyyətinin müəyyənləşdirilməsi ilə bağlı atdığı addım, onun peşə təhsilinə cəlb edilməsi üçün göstərdiyi təşəbbüs nümunəvi bir hadisədir”
Ekspertlər hesab edirlər ki, Təhsil Nazirliyinin hadisə ilə bağlı verdiyi cəld reaksiya nəticəsində məsələ müsbət mənada həllini tapacaq. İctimaiyyət tərəfindən nazirliyin təşəbbüsünün yüksək qiymətləndirildiyini deyən tanınmış uşaq yazıçısı Sevinc Nuruqızının sözlərinə görə, Təhsil Nazirliyinin bu addımı başqa qurumlara və aidiyyəti şəxslərə bir nümunədir. “Deputat tərəfindən işlədiyi yerdən uzaqlaşdırılan yeniyetmənin taleyi hər kəsi narahat edirdi. Heç şübhəsiz ki, o yeniyetmə orada ehtiyac ucundan, bir parça çörək qazanmaq üçün popkorn satırdı. O, pis işlə məşğul olmurdu ki, öz əməyi ilə ailəsinə fayda verirdi. Bu gün Təhsil Nazirliyi tərəfindən həmin yeniyetmə ilə bağlı atılan addımlar ictimaiyyətin narahatlığına son qoydu. Nazirlik bununla sübut etdi ki, nəinki şagirdlərə, hətta şagird olmayan yeniyetməyə də sahib çıxır. Bu, Azərbaycan dövlətinin öz yeniyetməsinə, gələcəyin əsgərinə bəslədiyi müsbət münasibətin təzahürüdür. Nazirliyin həmin yeniyetmənin şəxsiyyətinin müəyyənləşdirilməsi ilə bağlı atdığı addım, onun peşə təhsilinə cəlb edilməsi üçün göstərdiyi təşəbbüs nümunəvi bir hadisədir. Biz yeniyetmələrimizə, uşaqlarımıza sahib çıxmaqla onların sabaha olan ümidlərini, inamlarını daha da artırırıq. O yeniyetmənin peşə təhsili aldıqdan sonra cəmiyyətimizə, ailəsinə yararlı bir insan olcağı heç bir şübhə doğurmur. Hansısa bir deputat onun halal zəhmətini qınaqla qarşılayır, onun fəaliyyətinə mane olur, rəsmi dövlət qurumu isə o yeniyetməni xilas edir. Bu olduqca müsbət bir hadisədir və onun mütləq mənada yaxşı nəticələrinin şahidi olacağıq” - deyə S.Nuruqızı qeyd etdi.
Fatimə Hacıbəyli: “İnanıram ki, həmin yeniyetmənin problemləri tezliklə həll olunacaq”
“Vəfa” Sosial İctimai Birliyinin sədri Fatimə Hacıbəyli də hesab edir ki, Təhsil Nazirliyinin təşəbbüsü, əslində, Azərbaycan dövlətinin iradəsini ortaya qoyur: “Mən nazirliyin bu humanist addımını alqışlayıram. İnanın ki, bu hər kəsin ürəyindən oldu. İnanıram ki, həmin yeniyetmənin problemləri tezliklə həll olunacaq və o, təhsilini peşəyönümlü məktəblərdən birində davam etdirərək peşə, sənət öyrənəcək. Nazirliyin olaya operativ reaksiyası onu göstərir ki, Azərbaycan dövləti hər bir uşağın, gəncin yaxşı gələcəyi haqqında düşünür”.
İradə SARIYEVA
