Kiçik sahibkarlıq fəaliyyəti ilə məşğul olan Seymur Süleymanov adlı vətəndaş redaksiyamızla əlaqə saxlayaraq, mağazalarda ödəniş terminalları quraşdıran “Modenis MMC” adlı qurumun fəaliyyətindən narazılığını ifadə edib.
Onun sözlərinə görə, Xətai rayonu, Günəşli qəsəbəsində işlətdiyi 30 kvadratmetrlik mağazaya ödəniş terminalı quraşdırmaq istəyərkən maraqlı halla rastlaşıb:
Seymur Süleymanov: “Dedilər ki, sən də gəlsəydin, anlaşa bilərdik”
“Bir müddət əvvəl mağazamda “E-manat” tipli ödəniş aparatı quraşdırmaq istədim. Mənim mağazam məhəllə arasında olduğu üçün, əhali ödənişin haradan edilməsinin mümkünlüyü ilə bağlı çoxlu sual verirdi. Çünki yaxın ətrafda belə bir aparat yox idi. Bir ticarətçi kimi hesab etdim ki, bu həm də magazada alış-verişi artıra bilər. Çünki mağazaya ödəniş üçün girən vətəndaş nəsə ala da bilər. Əslində, belə terminalların quraşdırılmasında şirkətin özü maraqlı olmalıdır. Çünki bundan onlara xeyir var. Hətta şərtlərə görə, şirkət aparatını qoyduğu mağazaya icarə haqqı ödənişi də edir. Amma işin içinə girdikdə, burada başqa reallıqların olduğunu gördüm. Oranın iş nömrəsinə zəng vurdum. Xanım məni aidiyyəti şöbə ilə calaşdırdı. Dedilər ki, bu bizim kriteriyalara uyğun deyil. Çünki 100 kvadratdan aşağı yerə aparat qoymuruq. Üstündən bir müddət keçəndən sonra, 20 metr məndən aralıda olan mağazada belə bir terminalın quraşdırıldığını gördüm. Həmin mağazanın kvadratı mənim mağazamdan maksimum 2-3 metr artıq olar. Yəni onların dediyi 100 kvadrat sahədən söhbət belə gedə bilməzdi. Mənə maraqlı gəldiyi üçün, həmin şirkətlə yenidən əlaqə saxladım. Dedilər ki, bu cür işlər telefonla həll edilmir. Həmin mağazanın müdirinin özü gəlib danışıb. Sən də gəlsəydin, anlaşa bilərdik. Cavabımda dedim ki, mən şirkətin müəyyən etdiyi qaydalarla işlədiyini zənn etdiyim üçün, həmin addımı atmadım. Buradan belə nəticə çıxardım ki, “Modenis MMC”nin fəaliyyəti heç də şəffaf qurulmayıb. Ortadakı nəticə bunu deməyə əsas verir. Xahiş edirəm, bu məsələni ictimailəşdirin”.
Elvin Əliyev: “Bu məsələdə bizim hər hansı marağımız yoxdur ki, mağaza sahibləri ilə sövdələşməyə gedək”
Vətəndaşın şikayətini araşdırmaq üçün sözügedən şirkətlə əlaqə saxladıq. Şirkətin rəsmisi Elvin Əliyev “Bakı-Xəbər”ə açıqlamasında bildirdi ki, şirkət həmin terminalları quraşdırarkən müəyyən şərtlər və tələblərə riayət edir: “Biz əsasən terminalları böyükhəcmli supermarketlərdə quraşdırmağa üstünlük veririk. Ola bilər ki, müəyyən istisnaları da nəzərə alaq. Əgər hansısa ərazidə böyük supermarket yoxdursa, onda biz tələbi nəzərə alıb, kiçikhəcmli marketlərdə də terminalımızı qoyuruq. Bizim xidmət sahəmiz yalnız ticarət obyektləri ilə məhdudlaşmır. Böyük xəstəxanalar, dövlət qurumlarında da terminallar qoyuruq. Burada kvadratdan əlavə, həm də mağazanın təhlükəsizliyi, necə mühafizə olunması da nəzərə alınır. Yəni bu məsələdə bizim hər hansı marağımız yoxdur ki, mağaza sahibləri ilə sövdələşməyə gedək. Hətta terminalı qoyduğumuz yerlə bağlı bir müddət müşahidə aparırıq. Yığım bizi qane edəcək səviyyədə olmursa, həmin terminalın yerini dəyişirik. Dediyiniz məsələni isə ətraflı araşdırarıq”.
Məhəmmədəli QƏRİBLİ
