Azərbaycanın təbii sərvətləri içərisində müalicəvi Naftalan neftinin özünəməxsus yeri var. Bu sərvət nəinki ölkədə, hətta bütün dünyada populyardır. Dünyanın bir sıra ölkələrindən müalicə məqsədilə Naftalana gələnlər olur.
Apteklərdə həm təmizlənmiş, həm də təmizlənməmiş Naftalan mazı satılır. Hətta bu mazdan uzaq Çində belə müalicə məqsədi üçün istifadə edilir. Təmizlənmiş Naftalan mazı ağ rəngli məlhəm formasında olur. Onun qiyməti təmizlənməmiş Naftalan mazından bir qədər baha olur. Maraqlı olan odur ki, son vaxtlar təmizlənmiş Naftalan mazının qiyməti bahalaşaraq müxtəlif qiymətə satılır. Faktiki olaraq 5-20 qram həcmində olan sözügedən məhsul müxtəlif qiymətlərə satılır. Bir müddət əvvəl təmizlənmiş Naftalan mazının qiyməti 5 manat 20 qəpiyə idisə, son günlər onun qiyməti 7 manata qalxıb. Bir sözlə, müxtəlif qiymətə satılır. Təmizlənmiş Naftalan mazı dəri xəstəliklərində, sümük, oynaq ağrılarının müalicəsində istifadə edilir. Sözügedən mazın birdən-birə bu qədər bahalaşması maraq doğurur. Maraqlıdır, sözügedən mazın qiyməti dərmanların qiyməti ilə bağlı vahid reyestrə salınırmı? Qiyməti niyə belə müxtəlifdir?
Səfayə Əhmədova: “Qiymət məsələsinə biz baxmırıq”
Məsələ ilə əlaqədar Səhiyyə Nazirliyinin mətbuat xidmətinin əməkdaşı Səfayə Əhmədova ilə əlaqə saxladıq. O bizə açıqlamasında qiymət məsələsinə nazirliyin baxmadığını dedi: “Qiymət məsələsinə biz baxmırıq. Buna İqtisadiyyat Nazirliyi baxır. Yaxşı olardı ki, həmin qurumla əlaqə saxlayın”.
Məsələ ilə bağlı İqtisadiyyat Nazirliyi ilə əlaqə saxlasaq da, buna aydınlıq gətirən olmadı.
Adil Qeybulla: “Bu maza tələbat olduğu üçün, qiyməti süni şəkildə artırırlar”
Məsələyə aydınlıq gətirən professor Adil Qeybulla təmizlənmiş Naftalan mazının qiymətinin artmasını süni amillərlə əlaqələndirdi: “Bir ara dərmanların qiymətinin tənzimlənməsi ilə bağlı müəyyən işlər görüldü. Çalışdılar ki, bəzi dərman qiymətlərini uyğunlaşdırsınlar. Ancaq son vaxtlar bir sıra dərman vasitələrinin qiyməti artır. O cümlədən, təmizlənmiş Naftalan məlhəminin də qiyməti artır. Ola bilər istehsal xərcləri artıb. Ancaq nəzərə alsaq ki, çox qısa vaxt ərzində Naftalan mazının qiyməti artıb, deməli, burada süni amillər var. O baxımdan bunu düzgün hesab etmirəm. Birdən-birə bu qədər artım anlaşılan deyil. Sadəcə olaraq, qiyməti süni şəkildə artırırlar. Bu maza tələbat olduğu üçün, qiyməti süni şəkildə artırırlar”.
Vidadi ORDAHALLI
