Yol hərəkəti iştirakçıları arasında motosikletlərin idarə olunması yenicə kütləvi hal almağa başlasa da, yol infrastrukturumuz, motosiklet, eləcə də digər nəqliyyat vasitələri sürücüləri buna hazır deyillər.
Qeyd edək ki, əksər xarici ölkədə motosiklet idarə etmək üçün xüsusi yollar mövcuddur. Ancaq ölkəmizdə motosiklet idarə edənlər də avtomobil yollarından istifadə etməli olurlar. Bu da mütəmadi olaraq yol-nəqliyyat hadisələrinin yaşanmasına səbəb olur. Açıqlanan statistik rəqəmlərdə də qeyd olunur ki, son zamanlar motosiklet iştirakı ilə baş verən yol-nəqliyyat hadisələrinin sayı artıb.
Həmçinin, motosiklet idarə edənlər bəzi hallarda minik vasitəsini piyadalar üçün nəzərdə tutulmuş səkilərdə sürürlər. Bu hal, ilk növbədə, həmin yoldan keçən piyadalara təhlükə törədir. Maraqlıdır, bu sahədə yaşanan problemləri həll etmək üçün ölkəmizdə də motosikletlər üçün ayrıca yollar yaradıla bilərmi?
İlqar Hüseynli: “Bir sıra yollarımız nəinki motosiklet, avtomobil idarə etmək üçün də yararsızdır”
Sosial sahə üzrə ekspert İlqar Hüseynli qeyd etdi ki, motosikletlərin qəzaya uğramasının əsas səbəbi yollarımızın bu nəqliyyat vasitəsini idarə etmək üçün yararlı olub-olmaması ilə bağlı deyil: "Motosikletlərin qəzaya uğraması bizim cəmiyyətdə motosiklet sürənlərə yol hərəkətinin digər iştirakçılarının münasibətindən irəli gəlir. Çünki motosiklet bizim cəmiyyət üçün yeni bir nəqliyyat vasitəsidir. Yəni motosiklet sürməyin kütləviləşməsi bizim üçün yenilikdir. İnsanlar sürətli motosiklet sürməyə meyl etməyə başlayırlar. Motosikletlərin qəzaya uğramasının əsas səbəbi ətrafdakı sürücülərin bu növ nəqliyyat vasitəsini anlamamasıdır. Bu ciddi həyəcan siqnalı verir".
Həmsöhbətimiz onu da əlavə etdi ki, bizim bir sıra yollarımız nəinki motosiklet, avtomobil idarə etmək üçün də yararsızdır: "Yollarımızda nasazıqlar, gözlənilməyən quyular çoxdur. Bununla yanaşı, işarələnmə problemi mövcuddur. Bunlar yolda problemlərin yaranmasına səbəb olan əsas amillərdəndir".
Onun sözlərinə görə, bir çox kafe və restoranın sifarişlə yemək çatdırılması üçün son zamanlar motosikletlərdən istifadə etməsi geniş yayılmaqdadır: "Bu, nəzarət tələb edən ciddi bir məsələdir. Bu tip iş yerlərinin çoxunda motosiklet idarə edən gənclərdir. Onların böyük əksəriyyətinin qeyd olunan nəqliyyat vasitəsini sürmək üçün xüsusi sürücülük vəsiqəsi də yoxdur. Aidiyyəti qurumlar bu məsələyə ciddi yanaşmalı, motosiklet sürücülərini yoxlamalıdırlar”.
Ekspertin sözlərinə görə, motosiklet sürücüləri təhlükəsizlik qaydalarına riayət etməlidirlər: "Motosikletlərin ətrafı açıqdır. Kiçik qəza anında belə sürücünün ciddi zədə alma ehtimalı var, hətta ölümlə də nəticələnir".
Həmsöhbətimiz onu da vurğuladı ki, məhəllədaxili yollar motosiklet sürmək üçün yararlı deyil. Şəhərin mərkəzi küçələrində isə, əksinə, motosiklet sürmək üçün əlverişli şərait var: “Lakin əksər sürücünün qaydalara əməl etməməsi yol-nəqliyyat hadisələrinin baş verməsinə səbəb olur. Bəzi şəxslər xüsusən də axşam saatlarında şəhərin küçələrində yüksək sürətlə motosiklet sürürlər. Bu fonda onlar təkcə piyadaların deyil, öz həyatlarını da təhlükəyə atır. Bütün hallarda, yol polislərinin reydi nəticəsində bu cür neqativ halların sayında azalma müşahidə olunur”.
Vaqif Əsədov: “Motosiklet sürücüləri piyada yolu ilə hərəkət edirlərsə, bu, inzibati xətadır”
Bakı Şəhər Dövlət Yol Polisi İdarəsinin İctimaiyyətlə əlaqələr şöbəsinin rəisi, polis polkovniki Vaqif Əsədovun sözlərinə görə, motosiklet sürücüləri qaydalara əməl etməyə borcludurlar: “Motosikletlər üçün xüsusi yol olmadığından, sürücülər yol hərəkətinin digər iştirakçıları ilə birgə avtomobil yollarından istifadə edirlər. Motosiklet sürücüləri piyada yolu ilə hərəkət edirlərsə, bu, inzibati xətadır. Bu xətanı törədənlər müvafiq qaydada cəzalandırılır. Motosiklet istifadəçilərindən tələb olunan ən vacib məsələ odur ki, yol nişanlarına, işıqforun qaydalarına əməl etsinlər. Qida məhsulları daşıyan motokuryerlə bağlı motosiklet sürücülərini işə götürərkən rəhbərlik məsuliyyət hiss etməlidir. Sürücülük vəsiqəsi olmayan insanların motosiklet sürücüsü kimi işə götürülməsinə yol verilməməlidir. Eyni zamanda, motokuryerlərin xüsusi geyim formaları, “kaska”ları olmalıdır. Bu qaydalara əməl etməyən motokuryerlər barədə inzibati protokol tətbiq oluna bilər”.
Günel CƏLİLOVA
