Bakı Ağır Cinayətlər Məhkəməsində Beynəlxalq Bankın keçmiş rəhbəri Cahangir Hacıyev və onunla birlikdə mühakimə olunan 21 nəfərin barəsində cinayət işi üzrə prosesdə maraqlı bir fakt açıqlanıb. Məlum olub ki, kosmosa uçan ilk müsəlman qadına Cahangir Hacıyevin kadrları nə az, nə çox, düz 12 milyon dollar kredit veriblər.
Təqsirləndirilənlərdən biri - F.Abdullayev kosmosa turist kimi uçan ilk müsəlman qadın olan Ənuşə Ənsarinin bankdan kredit götürməsi ilə də bağlı maraqlı açıqlama verib.
Sitat: “Ənuşə Ənsari ABŞ-da ”Ağıllı ev" layihəsi üçün bankdan 12 milyon dollar kredit götürmüşdü. Sonradan kreditin faizi ödənilsə də, əsas borc qalmışdı. Mən işdən ayrılandan sonra bu barədə məlumatım yoxdur".
Ənuşə Ənsari 2006-cı ildə kosmos turizmi çərçivəsində kosmosa çıxan ilk müsəlman qadındır. İranın Məşhəd şəhərində anadan olub, sonradan ata-anası ilə birgə Tehranda yaşayıb. 1984-cü ildə isə valideynləri istedadlı övladlarına daha mükəmməl təhsil verə bilmək üçün ABŞ-a köçüblər. Burada informatika və elektronika üzrə təhsil alan Ənuşə Corc Vaşinqton Universitetində magistr dərəcəsi alıb. Sonra ABŞ-ın məşhur rabitə və informasiya kompaniyası olan MCİ-də işləyib. Burada tanış olduğu Həmid Ənsari ilə ailə qurur. 1993-cü ildə Ənuşə, Həmid və onun qardaşı “Əmir Telecom Technologies” kompaniyasını qurublar. Artıq 2006-cı ildə Ənuşənin başında durduğu investisiya firması Rusiyanın federal kosmik agentliyi ilə kommersiya işləri üçün istifadə etmək məqsədilə suborbital kosmik gəmilər donanması yaratmaq barədə saziş bağlayıb. Bundan sonra Ənuşə artıq kosmosa uçuş barədə düşünüb.
O, 4-cü turist kosmonavt olacaq yapon biznesmeni Daysuke Enomoto ilə alternativ olur. Və sonda tibbi göstəricilərinə əsasən yapon iş adamına uçmaq qadağan edilir və Ənuşə kosmik heyətin siyahısına salınır.
Onun adı 750 milyon dollarlıq biznes layihələrdə keçir. Barəsində xeyli xoş söz yazılır. Çox maraqlıdır, kifayət qədər maliyyə imkanlarına sahib olan qadın niyə kredit götürmək qərarına gəlib, özü də məhz Beynəlxlaq Bankdan? Hətta götürübsə belə, niyə dünyada kifayət qədər müsbət reputasiyaya malik olan qadın həmin pulu qaytarmayıb? Ola bilərmi ki, həmin məbləğ onun adına yazılsın, özünün bundan xəbəri olmasın?
Fikrət Yusifov: “Bəlkə də onun adından istifadə edib, krediti rəsmiləşdirib öz adlarına götürüblər”
Sabiq maliyyə naziri Fikrət Yüsifov “Bakı-Xəbər”ə açıqlamasında bildirdi ki, bunun daha dəqiq cavabını hüquq-mühafizə orqanları deyə bilər: “Çünki daha incə detallar istintaqa məlumdur. İstinaq bitibsə, iş məhkəmədədirsə, deməli, maraqlı vəziyyət yaranıb. Mən detallarla bağlı danışsam, münəccimlik etmiş olaram. Ancaq nəzərinizə çatdırım ki, Beynəlxalq Bank vasitəsilə misli görünməyən cinayətlər edilib. Azərbaycanın pulları müxtəlif fırıldaq yollarla xaricə çıxarılıb. Ola bilər ki, həmin xanımın adı ilə də belə fırıldaq törədilib. Bəlkə də heç həmin kosmonavtın bundan xəbəri yoxdur. Bütün cinayətə gedən şəbəkədən nə desən gözləmək olar. Əgər xanımın dünya maliyyə dairələrində müsbət imici varsa, o belə addım atmaz. Kifayət qədər maliyyə aktivləri olan xanım niyə adını biabır etsin ki? Bəlkə də onun adından istifadə edib, krediti rəsmiləşdirib öz adlarına götürüblər. Əgər o xanımın həqiqətən bu işdə əli varsa, onda mütləq izahatı olmalıdır. Ən azından, o çıxıb açıqlama verməlidir. Səs çıxmırsa, deməli, xəbəri yoxdur. Yaxşı olar ki, onun özündən bu məsələyə münasibət öyrənilsin. Beynəlxalq Bankın keçmiş rəhbərliyindən isə nə desən gözləyirəm. Heç bir perspektivi olmayan layihəyə bilə-bilə 1 milyard ayırıblarsa, deməli, bunu da edə bilərlər”.
Məhəmmədəli QƏRİBLİ
