Bakı şəhəri, Nizami rayonu, Bəhruz Nuriyev küçəsi ev 31, mənzil 28-də yaşayan Aslanova Sara Səbzəli qızı Heydər Əliyevlə 6 dəfə görüşüb söhbət etmiş xoşbəxt insanlardan biridir. Hazırda 68 yaşı olan “Əmək veteranı”, “Tərəqqi” medallı, YAP-ın üzvü Sara Aslanova o günləri, indi xəstə olsa da, çox böyük həvəslə xatırlayır...
Sara xanım evinə gəlib onunla görüşməyimdən çox məmnun oldu. Ağır xəstəlik imkan vermirdi ki, mənə çay süfrəsini özü təşkil etsin. Bu işi ona qulluq edən bacısı Minə xanım böyük həvəslə yerinə yetirdi. Hər halda, Sara xanıma müxtəlif suallar verməli oldum, yaddaşına söz ola bilməzdi. Heydər Əliyevlə olan görüşlərini tarixinə qədər dəqiqliklə xatırlayırdı. Eyni zamanda ona da təəccübləndi ki, nə yaxşı özünə böyük qardaş bildiyi Heydər Əliyev barədə danışmaq üçün onu yada salmışam. Söhbət zamanı Sara xanım qeyd etdi ki, ulu öndər hər görüşündə ona “bacım” deyirdi: “Heydər Əliyevlə görüşlər mənim işimə böyük təkan verirdi, daha böyük həvəslə işləməyə ruhlandırırdı. Fəxr edirdim ki, xalqımızın dünyada tanınıb-sayılan belə lideri var. Müəssisəmizdə olan bu görüşlərdən sonra mən həmişə daha böyük həvəslə işləməyə can atırdım. Mənim bu zəhmətkeşliyim zavod rəhbərliyi tərəfindən dəfələrlə müxtəlif mükafatlarla qiymətləndirilib. Amma mənim ən böyük mükafatım 2001-ci ildə Ulu öndər Heydər Əliyevin sərəncamı ilə mənə “Tərəqqi” medalının verilməsidir. Mənim həmin vaxt sevincimin həddi-hüdudu yox idi ki, Heydər Əliyev zəhmətkeş insanları heç vaxt unutmayıb. Mən ömrüm boyu özümü bu dahi şəxsiyyətə borclu bilirəm. Onun yaratdığı partiyaya üzv olmuşam və bu gün də fəxr edirəm ki, YAP-ın üzvüyəm. Mən bu xəstəliyimə qədər “Əmək veteranı” və YAP-ın üzvü olaraq əhali arasında Heydər Əliyevin və onun layiqli varisi Prezident cənab İlham Əliyevin, həmçinin respublikanın Birinci xanımı Mehriban Əliyevanın apardıqları uğurlu siyasəti, görülən xeyirxah işləri təbliğ etmişəm. İndi isə xəstəlik məni əldən salıb və təəssüf edirəm ki, dövlətimizin siyasətinin təbliğində daha iştirak edə bilmirəm”.
Məlumat üçün qeyd edim ki, Sara xanım hazırda qida borusunda və mədəsində yaranmış xəstəlikdən çox əziyyət çəkir. Ancaq bu xəstəliklərlə mübarizə aparmağa Sara xanımın elə bir maddi vəsaiti yoxdur. Bununla belə, heç bir dövlət orqanına indiyə qədər müraciət etməyib. İlk növbədə Sara xanımın bu gün əlil arabasına ehtiyacı var. Uzun müddət çəkən xəstəlik onun yeriməsində problem yaradıb. Bu səbəbdən qohumları onu yaşadığı binanın 3-cü mərtəbəsindən həyətə düşürüb gəzdirməkdə çətinlik çəkirlər. Amma əlil arabası olsa, Sara xanımın həyətə düşürülüb gəzdirilməsində problem olmaz. Sara xanım ailə qurmadığından tənha qadındır. Ona görə də onun xeyirxah insanların köməyinə çox ehtiyacı var.
Lakin bu qədər problemə baxmayaraq, Sara xanım Ulu öndər haqqında danışmağa özündə güc tapır. Mən də qərara gəldim ki, Heydər Əliyevin vaxtilə “bacım” dediyi bu xanımın özü və xəstəliyi haqqında geniş ictimaiyyətə məlumat verim.
Qeyd edim ki, S.Aslanova 1951-ci ildə anadan olub, 1978-ci ildən əvvəl partiyanın 22-ci qurultayı adına olan zavodda, müstəqillik dövründə isə “Azərneftyağ” İstehsalat Birliyində əməliyyatçı operator işləyib. 2011-ci ildən təqaüdə çıxıb. İşlədiyi 33 il ərzində həm Sovet dövründə, həm də müstəqillik dövründə Heydər Əliyev hər dəfə bu müəssisəyə gəlişində Sara xanımla mütləq görüşüb, söhbətləşib. İlk görüş isə H.Əliyev Azərbaycan Sov.İKP MK-nın birinci katibi olarkən 1982-ci ildə zavoda gələrkən olmuşdur. Birinci katibin qarşılanıb zavod adından gül dəstəsi təqdim edilməsi qabaqcıl işçi kimi Sara Aslanovaya həvalə olunumuşdu. O görüşdən çəkilən ağ-qara şəkil Sara xanım üçün bu gün də əziz bir xatirədir.
2000-ci ildə Azərbaycan Prezidenti kimi Ulu öndər artıq 6-cı dəfə gəldiyi zavodda yenə Sara xanımla köhnə dost kimi görüşür. Müəssisənin böyük akt zalında keçirilən təntənəli görüşdə Sara xanım gördüyü işlər barədə Heydər Əliyevə məlumat verib. Onun həmin çıxışından bəzi məqamları diqqətə çatdırmaq istəyirəm: “Möhtərəm Prezident! Hörmətli mərasim iştirakçıları! Bu gün kollektivimizin sevincinin həddi-hüdudu yoxdur. Möhtərəm Prezidentimiz Heydər Əliyev özünün rəhbərliyi sayəsində tikilmiş müasir tipli Bitum Kompleksinin təntənəli açılış mərasimində şəxsən iştirak edir. Hörmətli Prezident, bu münasibətlə çoxminli neftayıranlar adından Sizə dərin təşəkkkürümüzü bildiririk. Mən bu müəssisədə 1978-ci ildən işləyirəm. Sizin rəhbərliyiniz və qayğınız sayəsində müsəssisənin necə inkişaf etdiyinin canlı şahidiyəm. 1982-ci ilin yanvarında “ELOU AVP-6” qurğusunun açılış mərasimində iştirakınız yaxşı yadımdadır. Siz o vaxt respublikamızda böyük bir Neftayırma Kompleksinin bünövrəsini qoydunuz. Bu gün isə onun nailiyyətləri ilə fəxr edirik. Cənab Prezident, o vaxt Sizinlə çəkdirdiyim şəkli bu günə qədər əziz bir xatirə kimi saxlayıram. Sizin kimi dünya şöhrətli dövlət xadimi ilə həmişə fəxr etmişik. Çünki Siz xalqımızın Ümummilli lideri, dünya azərbaycanlılarının fəxri, müstəqilliyimizin təminatçısısınız. Sizin müdrik siyasətiniz sayəsində bütün digər sahələrlə yanaşı müəssisəmiz də xeyli inkişaf etmişdir...”
Bu çıxışdan sonra Sara xanım dediyi və 1982-ci ildə çəkilmiş həmin şəkli Ulu öndərə göstərir. Heydər Əliyev bundan çox təsirlənir. Ulu öndərin Sara xanım haqqında “Heydər Əliyev Müstəqil Azərabycanın neft emalı sənayesinin banisidir” kitabına salınmış məlum çıxışını diqqətə çatdırıram: “Azərbaycan Prezidenti Heydər Əliyev Sara Aslanova ilə birlikdə çəkilmiş fotoşəkli mərasim iştirakçılarına göstərərək dedi: Bilirsinizmi bu şəkil mənim üçün nə qədər əzizdir?! Çünki 1982-ci ildə, 18 il bundan əvvəl çəkilibdir...
Sara Aslanova: Cənab Prezident, mənim zavoddan oğurladığım yeganə şey bu şəkildir.
Heydər Əliyev: Sən bunu oğurlamamısan. Bu sənin haqqındır. Ona görə də bax, belə sədaqətli insanlar Azərbaycanı saxlayıblar, yaşadıblar və yaşadacaqlar. Çox sağ ol”.
2000-ci ildə baş vermiş bu tarixi görüşdə Heydər Əliyev “bacım” dediyi Sara Aslanovanın işi və özü haqqında çox müsbət fikirlər söyləyir, onunla çox səmimi və işgüzar söhbət edir. Həmin anları əks etdirən fotoşəkilləri təqdim edirik. İnanırıq ki, Ulu öndərin “bacım” dediyi “Azərneftyağ” İB-də 33 il fasiləsiz işləmiş “Əmək veteranı”, “Tərəqqi” medallı Sara Aslanova həm aidiyyəti dövlət qurumlarının, həm də YAP-ın diqqət mərkəzində olacaq. Ona da inanırıq ki, həmişə xeyirxahlığı və hümanistliyi ilə xalqımızın dərin hörmətini qazanmış respublikamızın Birinci xanımı Mehriban Əliyeva Sara xanımın indiki durumuna və onun xəstəliyinin müalicəsi üçün lazımı diqqət və qayğı göstərəcək.
Necə deyərlər, yastığı yüngül olsun.
Elçin MƏMMƏDLİ
