“Lunapark” adı ilə tanınan istirahət mərkəzi bir zamanlar uşaqdan böyüyə, hər kəsin istirahət etdiyi məkanlardan biri idi. Xətai rayonu, Nobel qardaşları prospekti 57/2 ünvanında yerləşən Nizami adına Mədəniyyət və İstirahət Parkı uşaqların və böyüklərin istirahət və əyləncə məkanı idi. Əvvəllər Nizami adına Mədəniyyət və İstirahət Parkı adı ilə tanınırdı. Sonradan parka müxtəlif maraqlı attraksionlar gətirməklə birdən-birə əyləncəli məkana çevirdilər.
Burada olan qeyri-adi attraksionlar uşaqlı-böyüklü bu parkı hamının sevimlisinə çevirmişdi. Ancaq indi həmin ərazi baxımsız bir məkana çevrilib. 20 hektar ərazini əhatə edən, 27-dən artıq attraksionun fəaliyyət göstərdiyi “Lunapark”da indi, demək olar ki, heç kim gözə dəymir.
Bir neçə gün öncə yolumu keçmiş "Lunapark"dan saldım. Parkda insanların istirahət etməsi üçün vaxtilə hər bir şərait olub. Ancaq park illər öncə bağlandığı üçün hər şeyin – kafelər, əyləncə mərkəzləri, maraqlı attraksionlar, suyu qurumuş hovuzlar, rəngi solmuş oturacaqların ciddi təmirə ehtiyacı var.
Vaxtilə hər kəsin üz tutduğu parkın yanından keçəndə insanda belə bir təəssürat yaranır: “lələ köçüb, yurdu qalıb”. Tərk edilmiş park, baxımsızlıqdan bərbad vəziyyətə düşmüş attraksionlar…
Adıçəkilən park elə 90-cı illərin uşaqlarının böyüməsi ilə tarixə qovuşdu. İndiki nəslin uşaqları parklara deyil, daha çox “Mall”lardakı qapalı məkanlarda olan istirahət mərkəzlərində istirahət etməyə üstünlük verirlər.
“Lunapark”ın işçiləri bildirirlər ki, vaxt vardı, gecə saat 1-2-yə kimi insanlar istirahət etmək üçün məhz adıçəkilən ünvana gəlirdilər. Ancaq 2014-cü ilin yanvarından etibarən “Lunapark”ın fəaliyyəti dayandırılıb. Həmin ərazidə olan işçilərin sözlərinə görə, zamanla məkana gələnlərin sayı azaldığı üçün, attraksionlar və kafelərin fəaliyyəti dayandırıldı. İşçilər maaş almaqda çətinlik çəkirdilər. Beləliklə, “Lunapark” baxımsız bir məkana çevrildi.
Onu da qeyd edək ki, “Lunapark” adı ilə tanınan istirahət mərkəzi “Ağ şəhər” layihəsinin tərkibinə daxildir. Məlumata görə, “Lunapark”ın abadlaşdırılması və yenidən istifadəyə verilməsi planlaşdırılır.
Xətai Rayon İcra Hakimiyyəti: “Ağ şəhər” layihəsi çərçivəsində gələcəkdə “Lunapark” ərazisinin genişləndirilməsi, indikindən daha gözəl formaya salınması nəzərdə tutulur”
Xətai Rayon İcra Hakimiyyətindən “Bakı-Xəbər”ə verilən məlumata görə, “Ağ şəhər” layihəsi çərçivəsində gələcəkdə həmin ərazinin genişləndirilməsi, indikindən daha gözəl formaya salınması nəzərdə tutulur: “Yaxın zamanlarda bu məsələyə yenidən baxılacaq”.
Ekspertlər isə hesab edirlər ki, artıq insanlar istirahətlərini daha qapalı, müasir dövrün tələblərinə cavab verən məkanlarda etməyə üstünlük verirlər. Onların fikrincə, həmin məkanların yerində “Mall”lar açıla bilər.
Aytəkin Kamranqızı: “Dövr dəyişdikcə, insanların düşüncə tərzi, həyata baxışı da dəyişir, bu səbəbdən də yaxşı olar ki, həmin ərazidə insanların tələbatı nəyədir, ona üstünlük verilsin”
Sosioloq Aytəkin Kamranqızı bizimlə söhbətində qeyd etdi ki, bir vaxtlar uşaqların, eyni zamanda, böyüklərin də ən çox üz tutduğu məkanlardan biri “Lunapark” idi. Ancaq indi həmin məkanın adı belə yada düşmür: “Danılmaz faktdır ki, ildən-ilə dövr dəyişir. Təbii ki, dövr dəyişdikcə, insanların düşüncə tərzi, həyata baxışı da dəyişir. Bu səbəbdən də yaxşı olar ki, həmin ərazidə insanların tələbatı nəyədir, ona üstünlük verilsin”.
Həmsöhbətimiz onu da vurğuladı ki, “Lunapark” kimi parkların olması yaxşı olar: “Nəzərə almaq lazımdır ki, həmin ərazilərdə kafe, attraksionlarla yanaşı, yaşıllıqlar da olur. İnsanlar parklarda olarkən həm əylənirlər, həm də təmiz hava qəbul edirlər”.
Günel CƏLİLOVA
