Bakının Nizami rayonundakı “Diqlas” ticarət mərkəzində baş verən yanğın yenidən binaların üzlənməsində istifadə olunan alkopon mövzusunu gündəmə gətirmiş oldu. Həmin vaxt fövqəladə hallar naziri Kəmaləddin Heydərov yanğınla əlaqədar Prezident İlham Əliyevin sədrliyi ilə keçirilən müşavirədə bu məsələyə xüsusi olaraq toxunub. Nazir bildirib ki, malların anbarlarda düzgün yerləşdirilməməsi və binanın alkoponla üzlənməsi yanğının daha da şiddətlənməsinə səbəb olub.
Qeyd edək ki, alkopon mözsuzu Azərbaycan əhalisinə yaxşı tanışdır və bizim yaddaşımızda heç də yaxşı iz buraxmayıb. 2015-ci ildə Azərbaycanın evsahibliyi etdiyi Avropa Oyunlarına hazırlıq mərhələsində Bakıda yol kənarına yaxın yerlərdə olan binaların fasadlarının sürətlə üzlənməsi həyata keçirildi. Məhz həmin ərəfələrdə Bakıda olan iki yaşayış binasında dəhşətli yanğın baş verdi. Nəticədə ölən və yaralananlar oldu. Həmin hadisələrdən biri Bakının Binəqədi rayonunda yerləşən çoxmərtəbəli yaşayış binasında meydana gəlmişdi. Elə həmin ərəfələrdə başqa bir yanğın Xətaidəki yaşayış binasında baş verdi. Onun da dəhşətli nəticələri oldu. Bu hadisələrdən sonra ölkə rəhbərliyi binalardan alkoponların sökülməsinə dair göstəriş verdi. Bizim gözlərimizin qabağında binaların fasadlarından həmin üzlüklər sürətli şəkildə sökülərək yeni materialla əvəz olundu. Ancaq “Diqlas”da baş verən yanğın sübut etdi ki, ölkə başçısının tapşırığına lazımi şəkildə əməl edilməyib. Ölkənin fövqəladə hallar naziri Prezidentə alkoponu yanğını daha da alovlandıran faktor kimi izah edirsə, deməli, problem hələ də durur.
Elə həmin vaxt “Bakı-Xəbər” qəzeti olaraq biz baş verən məlum yanğından sonra apardığımız araşdırma nəticəsində alkoponla üzlənmiş daha bir təhlükə mənbəyinin ünvanını göstərdik. Paytaxtın Bakıxanov qəsəbəsində olan “Uğur-2” adlı yaşayış kompleksinin sakinlərinin həyəcan təbilini ictimailəşdirərək bildirdik ki, 2000-ə yaxın ailənin yaşadığı 19 mərtəbəli, hər mərtəbəsində 12 mənzil olan 8 binadan ibarət kompleks başdan-ayağa alkoponla üzlənib və hər an alışıb yana bilər. Doğrudan da həmin kompleksdə hansısa qığılcımın olması baş verə biləcək faciənin fəsadını təsəvvür etmək üçün kifayət edir. Çünki ortaya maraqlı və təəssüfedici mənzərə çıxır. Bakıda hələ də yanğın üçün təhlükəli olan və artıq özünü pis mənada təsdiqləmiş alkopon deyilən materialla üzlənmiş kifayət qədər bina hələ də var. Artıq bizim qəzet olaraq ətrafında “SOS” siqnalı verdiyimiz “Uğur-2” yaşayış kompleksi ilə bağlı “Akkord” şirkəti tərəfindən ciddi addım atılmağa başlayıb. Sakinlərin verdiyi məlumata görə, Bakıxanov qəsəbəsindəki “Uğur-2” yaşayış kompleksinə daxil olan alkopon üzlüklü binaların üzlüklərinin dəyişilməsi prosesinə artıq başlanıb. İki mindən çox sakinin yaşadığı kompleksə daxil olan 8 binanın hamısının üzlüyünün sökülməsi nəzərdə tutulub. Sakinlər bizimlə söhbətində bildirdilər ki, bu prosesi təqdir edirlər, amma işlər bir qədər sürətli aparılsa, daha yaxşı olar: “Artıq ilkin işlər görülməyə başlayıb. İşlər bu ahənglə davam etsə, sakinlər çox əziyyət çəkməli olacaqlar. Çünki prosesə az sayda işçi qüvvəsi cəlb edilib. İstənilən halda, bunu təqdir edirik. Çünki həmin materialın alışıb yanmasının fəsadlarını artıq görmüşük. Bunu çoxdan etmək lazım idi”.
Sözügedən kompleksdəki xidmətləri həyata keçirən “Continental” şirkətinin nümayəndəsi Haşim Qədirov “Bakı-Xəbər”ə açıqlamasında kompleksdə binaların fasadındakı alkoponların sökülməsi prosesinin aparıldığını təsdiqlədi. Onun sözlərinə görə, bu işi “Akkord” şirkətinin özü həyata keçirir: “İşin gedişi ilə bağlı əlavə hansısa məlumat verə bilmərəm”.
Məhəmmədəli QƏRİBLİ
