Həftənin sonunun qeyri-iş günü olmasından istifadə edən bəzi işbazların Bakının Xətai rayonunda bir gecədə 130 ağac kəsdiyi barədə məlumat bütün sosial şəbəkələrdə ildırım sürəti ilə yayıldı. Ətrafda yaşayan sakinlər həyəcan təbili çalaraq vəziyyətlə bağlı foto və videolar paylaşırdılar. Sakinlərin sözlərinə görə, həmin ərazidəki yaşıllıq 35 il öncə salınıb.
Qeyri-iş günü olduğu səbəbindən rəsmi qurumların məsələyə ilkin münasibəti bir qədər səthi oldu.
Ekologiya və Təbii Sərvətlər Nazirliyinin mətbuat xidmətinin rəhbəri İradə İbrahimova ilk açıqlamasında bildirdi ki, məsələ araşdırılır: “Nazirliyin əməkdaşları hazırda hadisə yerindədirlər. Məsələ tam şəkildə araşdırıldıqdan sonra ictimaiyyətə məlumat veriləcək”.
Sakinlərin ictimailəşdirdiyi paylaşımlarda bildirilirdi ki, ərazidəki yaşıllığı məhv edən iş adamı orada bina tikmək üçün Xətai Rayon İcra Hakimiyyətindən sərəncam alıb. Həmin iş adamının məmurlardan birinin qohumu olduğu da deyilirdi.
Sakinlər hətta bildirirlər ki, ərazidə bina tikmək istəyən sahibkarlar narazı sakinləri pulla ələ almağa çalışıblar. Buna səbəb isə bina tikmək üçün müvafiq qurumlardan icazələrinin olmamasıdır. Belə ki, yaşıllığı məhv edən iş adamlarının ərazidə bina tikmək üçün Dövlət Şəhərsalma və Arxitektura Komitəsindən müvafiq razılığı olmadığı bildirilir. Ən maraqlısı isə budur ki, sakinlərin dediyinə görə, ağacların kəsilməsi prosesi gecə saatlarında həmin ərazidə işıqları söndürməklə baş verib. Ancaq sakinlərin etirazı “Azərişıq” ASC-nin vəzifəli şəxslərinin də iştirakçısı olduğu bu planın baş tutmasına imkan verməyib. Bakı Şəhər İcra Hakimiyyətindən sakinlərə bildirilib ki, həmin ərazidə heç bir bina tikintisi aparıla bilməz.
Bununla belə, əraziyə tamah salanlar öz niyyətlərindən əl çəkmək istəmirlər. Buna görə də ərazidəki binalarda yaşayanlar ölkə rəhbərliyinə müraciət edərək, qanunsuzluğa son qoyulması, yaşıllığı məhv edənlərin cəzalandırılması üçün müvafiq göstərişlər verilməsini xahiş ediblər.
Qeyd edək ki, ölkə Prezidenti bir müddət əvvəl həyətlərdə bina tikilməsinin yolverilməz olduğunu bəyan etmişdi. “Ancaq götürüb ictimai yerdə, həyətdə, yaxud da ki, insanların istifadə etdiyi yerdə bina tikmək cinayətdir və bunu edən cavab verəcək. Bir daha demək istəyirəm ki, Dövlət Şəhərsalma və Arxitektura Komitəsinin icazəsi olmadan heç bir bina tikilə bilməz”.
Görünür, bəzi iş adamları və məmurlar o qədər özlərinə arxayındırlar ki, artıq Prezidentin tapşırığını belə qulaqardına vurmaq istəyirlər. Qeyd edək ki, təbiətə qarşı bu cür amansız davranış artıq xarici ölkə və xüsusilə də Ermənistan mediasının manşet xəbərinə çevrilib. Bununla da hansısa işbazın və ya işinə səhlənkar yanaşan məmurun ucbatından bütün ölkənin imicinə ağır zərbə vurulmuş olur.
Yaranmış vəziyyətlə maraqlanmaq üçün Xətai Rayon İcra Hakimiyyətinin İctimai-siyasi şöbəsinin müdiri Pənah İmanovla əlaqə saxladıq. O, qəzetimizə açıqlamasında bildirdi ki, hazırda İcra Hakimiyyəti tərəfindən həmin ərazidə geniş araşdırma aparılır: “İlkin olaraq onu deyə bilərəm ki, həmin ərazidə heç bir ağac kəsilməyib”.
“Axı ortada fotolar var” sualına isə Pənah müəllim belə cavab verdi: “Söhbət bu gecədən gedir. Yəni gecə ərzində orada deyilən səviyyədə ağac kəsilməyib. Bilirsiniz ki, bu məsələ ciddi şəkildə araşdırılır. Bütün qurumlar ordadır. Araşdırdıqdan sonra yekun məlumat yayılacaq”.
Xətai rayonu, M.Hadi küçəsi, 93/99 ünvanında ağacların kəsilməsi ilə bağlı Ekologiya və Təbii Sərvətlər Nazirliyinin rəsmisi İradə İbrahimova isə “Bakı-Xəbər”ə açıqlamasında bildirdi ki, 5 may 2019-cu il tarixində ETSN-ə Xətai rayonu, M.Hadi küçəsi, 93/99 ünvanında ağacların kəsilməsi ilə bağlı daxil olan şikayət təkrarən nazirliyin əməkdaşları tərəfindən yerində araşdırılıb: “Əraziyə keçirilən baxış zamanı yaşıllıq sahəsində mülkiyyətçi Həzrət Temirov tərəfindən 25 meyvə ağacının kəsildiyi, 2 zeytun ağacının və 96 nar kolunun köçürüldüyü, 8 çoxillik şam və qovaq ağacının isə yerində qaldığı müəyyən edilib. Kəsilən ağacların əvəzinə yeni ağacların əkilməsi, köçürülən ağaclara isə aqrotexniki xidmət göstərilməsi ilə bağlı torpaq mülkiyyətçisinə nazirlik tərəfindən “məcburi göstəriş” verilib.
Xatırladaq ki, ETSN-ə sözgedən ünvanda ağacların kəsilməsi ilə bağlı 16 aprel 2019-cu il tarixində də şikayət daxil olmuşdu. Araşdırma zamanı M.Hadi küçəsi, 93/99 ünvanında 0,24 hektar yaşıllıq sahəsinin tikinti məqsədilə Bakı Şəhər İcra Hakimiyyətinin 2013-cü il tarixli sərəncamı ilə vətəndaş Həzrət Temirova ayrıldığı müəyyən edilmişdi. Ərazidəki 131 müxtəlif cinsli ağac nazirliyin əməkdaşları tərəfindən qeydiyyata alınaraq torpaq mülkiyyətçisinə təhvil verilmişdi.
Qeyd edək ki, sözügedən ünvandakı ağacların kəsilməsi və köçürülməsi ilə bağlı 28 mart 2019-cu il tarixində mülkiyyətçinin oğlu Rüstəm Temirov, 3 aprel 2019-cu il tarixində isə Xətai Rayon İcra Hakimiyyəti tərəfindən nazirliyin Dövlət Ekspertiza İdarəsinə müraciət olunub, lakin yaşıllıqların toxunulmaz qalması məqsədəmüvafiq hesab edilib, ağacların köçürülməsi və kəsilməsinə icazə verilməyib”.
Məhəmmədəli QƏRİBLİ
