Ölkə parlamentində çox maraqlı və aktual olan mövzu ətrafında gərgin müzakirə aparılıb. Milli Məclisin plenar iclasında Azərbaycanın İnsan alverinə qarşı mübarizə üzrə Milli Koordinatorunun 2018-ci il üzrə illik məlumatının müzakirəsi zamanı deputat Araz Əlizadə ölkədə “seks turizmi”nin inkişafından narahatlıq ifadə edib:
“Azərbaycanda “seks turizmi” inkişaf edir. Biz onsuz da bunu bacarmayacağıq. Gəlib pulla və s. yollarla qızlarımızı yoldan çıxarırlar. Buna qarşı ciddi mübarizə aparmaq lazımdır”.
Araz Əlizadə: “Buna qarşı ciddi mübarizə aparmaq lazımdır”
O xatırladıb ki, Rusiyada çoxmənzilli binalarda hostellər təşkil edilməsinə icazə verilmişdi: “Amma sonradan bu məsələdə dəyişiklik etdilər. Dəyişiklikdən sonra binaların birinci mərtəbəsində hostel təşkil etməyə icazə verdilər, girişi də ayrı olmalıdır. İnsanlar öz evlərində rahat yaşaya bilmirlər. Biz qanunvericiliyə bu istiqamətdə dəyişiklik etməliyik”.
Tahir Kərimli: “Biz qonşularla bezdik və köçmək məcburiyyətində qaldıq”
Deputat Tahir Kərimli də çıxışında bu məsələni qaldırıb: “İnsanlar evlərini hostellərə, mehmanxanalara çevirirlər. 2017-ci ildə qanuna dəyişiklik olundu ki, çoxmənzilli binalarda qeyri-yaşayış sahəsinin hostelə çevrilməsi üçün icazə lazım deyil. Amma əvvəlki qanunda qonşuların mənafeyi nəzərə alınırdı. Yeni qanunda bu məsələ nəzərə alınmır. Azərbaycanda masaj salonlarına, barlara nəzarəti gücləndirmək lazımdır. Vaxtilə mən ərəblərlə bağlı məsələ qaldırmışdım. Hazırda yaşadığım ərazidə hər kəs sözünü deputata deyir. Bəs deputat kimə desin?!”.
Tahir Kərimli qonşuları ilə birlikdə yaşadığı binadan köçmək məcburiyyətində qaldığını bildirib. Deputat parlamentdə çıxışı zamanı qeyd edib ki, o, paytaxtın mərkəzi küçələrindən olan Zərifə Əliyeva küçəsində çoxmənzilli yaşayış binalarının birində yaşayır: “Biz qonşularla bezdik və köçmək məcburiyyətində qaldıq. Kimsə özünü qanundan yuxarı göstərir. Belə şeylərə şərait yaradır. Bizim küçə mərkəzi küçədir. Oradan dünyanın hər yerindən gəlib keçən dövlət və hökumət nümayəndələri var. Birdən bu hal kiminsə qabağına çıxar. Ona görə də binaların belə yuvalara çevrilməsinin qarşısı alınmalıdır”.
Deputatların qaldırdığı bu problemlə rastlaşan sadə vətəndaşlar da az deyil. Göründüyü kimi, buna şəraiti qanunvericilikdə olan boşluq yaradır. Hansısa imkanlı adam yeni tikilidə bir neçə mənzil alır və oranı yaxşı təmir etdirdikdən sonra tam təchiz edilmiş halda turistlərin ixtiyarına buraxır. Şərtlər otellərdən yaxşı olduğu üçün, turistlər daha çox belə hostellərdə qalmağa üstünlük verirlər. Qonşular həmin mənzildəki biabırçılığa etiraz edəndə, ev sahibi hostel kimi fəaliyyət göstərmək hüququnun olduğunu, mənzili isə müqavilə əsasında hansısa turizm şirkətinə verdiyini deyir. Göründüyü kimi, bu boşluq da deputatların dediyi kimi, “seks turizmi”nin inkişafına şərait yaradır və vətəndaşları haqlı narahat edir. Yaranmış biabırçı mənzərənin qarşısını necə almaq olar?
Qabil Hüseynli: “Ümumyaşayış qaydalarına zidd olan hostel fəaliyyəti həm də əxlaqi aşınmaya səbəb olur”
Bənzər problemlə üzləşənlərdən biri də sabiq dövlət müşaviri Qabil Hüseynli olub. O bir neçə dəfə media vasitəsilə yaşadığı mənzilin ətrafında əxlaqsızlığın baş alıb getməsinə toxunub və hər dəfə də deyib ki, problem həllini tapmır. Artıq bənzər halların geniş vüsət almasına görə məsələnin parlamentdə müzakirəsini nəzərə alıb Q.Hüseynli ilə bu mövzuda danışmaq qərarına gəldik. O, qəzetimizə bildirdi ki, bu problemin artıq parlament səviyyəsində müzakirə olunması məsələnin ciddiliyindən xəbər verir: “Belə mənzillər ya hostel, ya da masaj salonu kimi fəaliyyət göstərir. Hər iki halda belə yerlərdə əxlaqsızlıq hökm sürür. Bununla mübarizə aparmağın yolu çox sadədir. Əlaqədar qurumlar bir balaca dəqiq araşdırma aparsalar görərlər ki, nə hosteldən söhbət gedir, nə də masajdan. Oralardakı fəaliyyətin bir adı var - eskort xidmət. Mən bununla çox mübarizə aparmışam. Məlum olur ki, bu işlərin arxasında böyük adamlar dayanır. Şikayətlərdən sonra belə mənzillərdəki fəaliyyət müvəqqəti dayanır, sonra dərhal açılır. Həmin məkanlarda narkotik maddələr də satılır. Üzərrik yandırırlar ki, iy getsin. Güya bədnəzərdən özlərini qoruyurlar. Günün istənilən vaxtında görürsən ki, üzərrik yanır. Bu qədər də bədnəzərdən qorunmaq olar? Ümumyaşayış qaydalarına zidd olan hostel fəaliyyəti həm də əxlaqi aşınmaya səbəb olur. Ölkəmizdə kirayə bazarı geniş inkişaf edib. Buna normal baxıram. Adamlar var ki, bundan yaxşı qazanc da götürürlər. Hər halda, qanunvericiliklə ümumi yaşayış yerndə, girişi eyni olan binalarda hostel fəaliyyətinin qadağan edilməsi zəruridir. Bəzi insanlar yalnız çox pul qazanmağı fikirləşdikləri üçün, evlərini hostel kimi aylıq deyil, günlük kirayəyə verirlər. Amma gəlin görək orda nələr baş verir? Axı qapı qonşuda kiminsə ailəsi, uşağı yaşayır. Əgər Rusiya kimi ölkə insanların mənafeyini nəzərə alıb, bu istiqamətdə müəyyən məhdudiyyətlər tətbiq edibsə, bizdə də olunmalıdır. Sizi inandırıram ki, vətəndaşların etdiyi şikayətlər lazımi şəkildə araşdırılmır. Bu biznesin arxasında güclü adamlar durduğu üçün, onlara batmaq çətindir. Qanunvericiliklə sərt qaydalar müəyyənləşməsə, vəziyyət daha da kritikləşəcək”.
Məhəmmədəli QƏRİBLİ
