Müğənni Elnarə Xəlilova “Baku Medical Plaza”da xəstəyə səhv diaqnoz qoyulması barədə sosial şəbəkədə məlumat yazıb. Müğənni qeyd edir ki, bu cür xəstəxanaların lisenziyası əllərindən alınmalı və birmənalı bağlanmalıdırlar. Onun sözlərinə görə, bu klinikalar adam öldürdüklərinə görə hələ bir 35 min manat pul da alırlar.
İfaçı "Baku Medical Plaza"da 40 yaşlı qadının ana olduqdan sonra səhhətinin pisləşməsinə münasibət bildirib: "Mənim bir rəfiqəmi də az qalmışdı ki, burda öldürsünlər. O da ana olmağa gəlmişdi. Allahsızlar qanı 1 müsbət olana mənfi 4 qan qrupu çıxarmışdı. Təsəvvür belə etmək istəmirəm, əgər ona orada qan vurulsaydı, nələr ola bilərdi… Yazıqlar olsun! Belə həkimlərə ar olsun. Adamı şikəst eləməkləri azmış kimi, hələ bir pul da istəyirlər. Məhkəməyə verib bunlardan 117 min almaq lazımdır”.
Qeyd edək ki, 117 saylı orta məktəbin müəllimi, 40 yaşlı Lətafət Xanoğlan qızı Şirəliyeva bu il martın 2-də "Baku Medical Plaza”da ana olduqdan sonra səhhəti pisləşib. Qadının həyat yoldaşının dediklərinə görə, kor bağırsağı partlayan Lətafətə klinikada səhv diaqnoz qoyulub.
Müğənni E.Xəlilovanın sosial şəbəkədə “Baku Medical Plaza” haqqında yazdığı ittihamlara cavab öyrənmək üçün klinikanın özü ilə əlaqə saxladıq.
“Baku Medical Plaza” - Aysel Rizayeva: “Baku Medical Plaza” öz işgüzar nüfuzunu qorumaq üçün prosessual addımlar atmaq məcburiyyətindədir”
“Baku Medical Plaza”nın marketinq şöbəsinin rəhbəti Aysel Rizayeva “Bakı-Xəbər”ə açıqlamasında qeyd etdi ki, son günlər bəzi kütləvi informasiya vasitələrində Lətafət Şirəliyevanın ağır xəstəliyi mövzusunda klinikanın işgüzar nüfuzuna xələl yetirən, həqiqətə uyğun olmayan yazılar yazılmaqdadır. L.Şirəliyevanın həyat yoldaşının söylədikləri təhrif olunaraq saytlarda dərc olunub: “Klinikamız özəl tibb müəssisəsi olsa da, xəstəyə göstərilən tibbi xidmətlər üçün təcili pul tələb edilməyib və müalicəsi klinika hesabına aparılır. Xəstə yaxınlarının klinikadan istər maddi baxımdan, istərsə də xidmətlə əlaqədar şikayəti yoxdur. Xəstəni əməliyyat edən və reanimasiya şəraitində müalicəsinə nəzarət edən həkimlər öz işlərində mütəxəssisdirlər və yaşanmış hadisədə hər hansı bir həkim səhvindən söhbət gedə bilməz. İstənilən araşdırmanın aparılması üçün klinikamız şərait yaratmağa hazırdır”.
A.Rizayevanın sözlərinə görə, 17 illik evlilik müddətində övladı olmayan L.Şirəliyeva məhz klinikada aparılmış müalicə nəticəsində hamilə qalıb, mart ayının 12-də qeysəriyyə əməliyyatı olub: “Əməliyyatdan sonra Lətafət xanımın körpəsi kafi vəziyyətdə evə yazılıb. Təxminən 10 gün sonra Lətafət Şirəliyeva həkiminə zəng edərək qarın nahiyəsində ağrılarının olduğunu dedikdə, həkim onun klinikaya gəlməsini deyib. Xəstənin sözlərinə görə, bu ağrıların qeysəriyyə sonrası normal hal olduğunu düşünərək ağrıkəsici dərmanlardan istifadə edib. Xəstə klinikaya müraciət etdikdə ona ağrının səbəbini dəqiq müəyyən etmək üçün MRT müayinəsindən keçməsi məsləhət görülüb. Məlumat üçün bildirim ki, klinikamızda MRT müayinəsi öncədən yazılmaq və ya canlı növbə qaydası ilə həyata keçirilir. Hər müayinənin müddəti təxminən 40-50 dəqiqə olduğundan, müayinəyə girmək üçün növbə gözləmək zərurəti yaranır. Lakin xəstə növbə gözləmək istəmədiyi üçün, müayinədən imtina edərək klinikadan gedib. 3 gün sonra yenidən həkiminə zəng edərək temperaturun olduğunu dedikdə, həkim onun dərhal müayinə olunmalı olduğunu bildirib. Lətafət Şirəliyeva aprelin 3-də klinikaya gəldikdə KT müayinəsi nəticəsində appendisitinin partladığı, infeksiyanın orqanlarına yayıldığı və sepsis olduğu aşkarlanıb. Dərhal reanimasiya şöbəsinə yerləşdirilib. Təcili cərrahiyyə əməliyyatı olunaraq abseslər təmizlənib, drenaj qoyulub. İnfeksiya nəticəsində bağırsaqlarında çürümə prosesi getdiyi üçün, aprelin 8-də ikinci dəfə əməliyyat olunaraq bağırsaq möhtəviyyatın xaric edilməsi təmin edilib və stoma çıxarılıb. Peritonit, septik şok, kəskin tənəffüs çatışmazlığı, ağ ciyərlərin kəskin respirator distressindromu diaqnozları ilə reanimasiyaya yerləşdirən L.Şirəliyevanın vəziyyəti kritik olsa da, keçirdiyi cərrahiyyə əməliyyatından sonra orqanlarının vəziyyəti bərpa edilib. Lakin xəstənin immun sistemi zəiflədiyindən, hazırda immun sisteminin qaldırılması və qan dəyərlərin normallaşdırılması istiqamətində tibbi protokollara uyğun müalicə davam edir, xəstəyə immunoqlobin tətbiqinə başlandı. Xəstənin vəziyyətini dəyərləndirmək üçün klinikamızın və ölkənin bu sahə üzrə digər mütəxəssis həkimləri ilə konsiliumlar keçirilir. Xəstə hazırda reanimasiyadadır. Septik şok davam edir. Vəziyyəti son dərəcə kritik ağır olsa da, klinikamızın bütün tibb personalı L.Şirəliyevanın səhhətinin yaxşılaşması üçün əllərindən gələni etməkdədirlər”.
A.Rizayeva onu da vurğuladı ki, xəstənin müalicəsinin davam etdirilməsi üçün yaxınlarından 37.000 manat pul tələb edilməsi yalandır. Bəzi saytların belə xəbərləri dəqiqləşdirmədən ictimailəşdirməsi təəssüf doğurur: “Baku Medical Plaza” öz işgüzar nüfuzunu qorumaq üçün prosessual addımlar atmaq məcburiyyətindədir”.
Günel CƏLİLOVA
