Aprelin 30-da saat 22.00 radələrində Nizami rayonu, M.Əliyev küçəsində Mahir Əsədov idarə etdiyi “Range Rover” markalı 90 OG 002 nömrəli avtomobillə şəxsiyyəti məlum olmayan piyadanı vuraraq yolun hərəkət istiqamətinə atıb, eyni yolda hərəkətdə olan Seyhun Məmmədovun idarə etdiyi “Mercedes” markalı 90 GT 562 nömrəli avtomobil isə həmin şəxsin üzərindən keçib və hadisə yerindən qaçıb.
Ağır vəziyyətdə olan piyada 3 saylı Şəhər Klinik Xəstəxanasına yerləşdirilib. Faktla bağlı cinayət işi başlanıb, istintaq davam etdirilir. Məlum olub ki, həmin sürücü “90 OG 002″ dövlət nömrə nişanını “Mercedes” və “Audi” markalı avtomobildə də istifadə edir. Özü də eyni vaxtda. Bu barədə sosial şəbəkələrdə həmin sürücü tərəfindən fotolar nümayiş etdirilir. Artıq sosial şəbəkələrdə sürücünün kimliyi ilə bağlı maraqlı məlumatlar yayılıb. Məlum olub ki, Mahir Əsədov Bakının əsasən zənginlərin məskəni olan “Vorovski” qəsəbəsində yaşayır, bizneslə məşğul olduğu, “Ağ şəhər”də binalar inşa etdiyi deyilir və onu qəsəbədə çox nüfuzlu biri kimi tanıyırlar.
Səhiyyə Nazirliyinin mətbuat katibi Pərviz Abubəkirov bildirib ki, Bakının Nizami rayonunda 90 OG 002 dövlət nömrə nişanlı “Range Rover” avtomobili ilə vurulmuş piyadanın vəziyyəti olduqca kritikdir, həyatı təhlükəsi var. 3 saylı şəhər xəstəxanasına gətirilən yaralının başında zərbədən hematoma yarandığı müəyyən edilib, təcili əməliyyat olunub. Göstərilən tibbi yardımlara baxmayaraq, vəziyyəti olduqca ağır qiymətləndirilir”.
Xatırladaq ki, oliqarxların törəmələrinin eyni dövlət nömrə nişanını çoxsaylı avtomobil kolleksiyasında yer alan müxtəlif avtomobillərə yapışdırması geniş yayılmış haldır. Dəfələrlə bu barədə faktlar, görüntülər yayılıb. Eyni zamanda, imkanlı adamların bahalı avtomobillə qəza törədib hadisə yerindən qaçması daha çox yayılıb. Analoji hadisə bir müddət əvvəl paytaxtda baş verdi. Şəhid qızını bahalı avtomobillə vurub öldürən şəxs də çox imkanlı bir adamın övladı çıxdı. Maraqlıdır, əlaqədar qurumlar eyni nömrənin, eyni seriya ilə müxtəlif avtomobillərin üzərinə vurulması ilə niyə mübarizə aparmırlar?
DYP rəsmisi: “Ola bilər ki, bu fotoşop olsun”
aş Dövlət Yol Polisi İdarəsinin (DYP) şöbə rəisi, polis polkovnik-leytenantı Rüfət Quliyev açıqlamasında eyni dövlət nömrə nişanının müxtəlif avtomobillərdə istifadə olunması faktının araşdırılacağını deyir: “Ola bilər ki, bu fotoşop olsun. Çünki indi elə dövrdür ki, texnika vasitəsilə nömrəni dəyişdirmək, üzərinə başqa nömrə yapışdırmaq mümkündür. Biz bu barədə araşdırma aparacağıq və araşdırmadan sonra məsələyə hüquqi qiymət verilə bilər”.
Ərşad Hüseynov: “Kompleks mübarizə aparılmalıdır ki, gələcəkdə bəzi harınlar bizi, övladlarımızı təkərlərinin altına salıb hadisə yerindən qaçmasınlar”
Nəqliyyat məsələləri üzrə ekspert Ərşad Hüseynov “Bakı-Xəbər”ə açıqlamasında bildirdi ki, eyni seriya və nömrəli dövlət nişanlarını müxtəlif markalı maşınlara vurmaq qanunvericiliklə qadağan edilir: “Elə nömrələr də buna görə verilir ki, alternativi olmasın. Ona görə də müxtəlif kombinasiyalı nömrələrdən istifadə edilir. Bunu hüquq-mühafizə orqanları araşdırmalıdır. Baş verən analoji hadisələrin araşdırılmasını yalnız DYP-nin üzərinə qoymaq lazım deyil. Görürsünüz ki, əksər belə hallar insan tələfatı ilə nəticələnir. Artıq burada cinayət işi var. Onun araşdırılması çərçivəsində bütün detallar nəzərdən keçirilməlidir. Fikir verirsinizsə, əksər hallarda harın həyat tərzi keçirən adamlar qəzaları bahalı avtomobillərlə törədirlər. Götürək ki, qəza hamının başına gələ bilər: varlının da, kasıbın da. Amma məhz həmin kateqoriyadan olan adamlar əksər hallarda hadisə yerindən qaçırlar. Bütün bunlar harınlığın əlamətidir. Çinayət işi çərçivəsində müxtəlif qurumları da cəlb edə bilərlər. Cinayət Prossesual Məcəllədə belə bir müddəa var ki, cinayətin törədilməsinin şəraiti, səbəbi araşdırılmalıdır. Bu kontekstdə, harınlığın səbəbi, kimin övladı olduğu, onu hadisə yerindən qaçmağa vadar edən adamlarla da bağlı araşdırmalara gedilməlidir. Qoy tam aşkara çıxsın ki, onlara kim belə təlimat verir? Kim onlara deyir ki, ürəyiniz nə istəyir edin, arxanızda biz durmuşuq? Bu dəqiqə elə texniki vasitələr var ki, avtomobillərin nömrəsini görür və onu identikləşdirir. Yəni dərhal müəyyən edə bilir ki, filan nömrə hazırda “Mercedes”in üzərindədir, amma əslində başqa markaya verilib. Həmin avtomobil sahiblərinin necə məsuliyyətdən yayınması da dəqiq araşdırılmalıdır. Yəni bunun qarşısını almaq elə də çətin deyil. Bu cür hallarla kompleks mübarizə aparılmalıdır ki, gələcəkdə bəzi harınlar bizi, övladlarımızı təkərlərinin altına salıb hadisə yerindən qaçmasınlar”.
Məhəmmədəli QƏRİBLİ
