Sosial şəbəkələrdə Kürdəmirin Sığırlı kəndindəki C.Əsgərov adına tam orta məktəbdə qızların təhsildən yayınma halları, müəyyən sinifdən sonra məktəbdən uzaqlaşdırıldıqları haqda məlumatlar yayılıb. Bu barədə bir sıra sosial şəbəkə istifadəçiləri aşağıdakı fikirləri paylaşıblar:
"Kürdəmirin Sığırlı kəndindəki C.Əsgərov adına tam orta məktəbdə qızlar çox ciddi təhsil məhdudiyyətləri yaşayırlar. Belə ki, ibtidai sinfi bitirmiş, on yaşdan başlayaraq bütün qızlar beşinci sinifdən etibarən evə qapadılır, təkbaşına həyətdən küçəyə belə çıxışına icazə verilmir. Çünki hər an qaçırılma təhlükəsi qarşısındadırlar. Valideynlərin edə biləcəyi və guya çıxış yolu qızları təhsildən yayındırmaqdır. Hətta təhsil almaq istəyən ailələr kənddən köçürlər. Bu isə çox az hallarda baş verir. Çünki oxumuş istənilən qıza əxlaqsız gözü ilə baxırlar. Müəllimlər isə dərslərdə iştirak etməyən bütün qızlara "iştirak edirlər" və saxta qiymətlər yazırlar. Orta məktəbin buraxılış imtahanlarına belə buraxılmırlar və ya imtahana hamilə halda gedirlər. Qızların təhsildən yayındırılmasının heç bir kapital tərəfdən səbəbiyyəti yoxdur. Kənd əhalisi normal maddi şəraitdə yaşayırlar. Sadəcə, qızlara qarşı ciddi təzyiqlər və istismar var. Onlar artıq yeniyetmə yaşdan, 18 yaşa çatmamış evləndirilir".
Sığırlı kəndindəki C.Əsgərov adına tam orta məktəb - Bəycan Mürşüdov: “Qızların məktəbə gəlib-getməsinə valideynlər tərəfindən heç bir maneə törədilmir”
Sosial şəbəkədə yayılmış bu məlumat diqqətimizi cəlb etdiyi üçün, onu araşdırmaq qərarına gəldik.
Kürdəmirin Sığırlı kənd C.Əsgərov adına tam orta məktəbinin direktoru Bəycan Mürşüdov bildirdi ki, 9-cu sinifdən sonra qızlar təhsillərini davam etdirmirlər: “Valideynlərin qızları oxumağa qoymaması ilə bağlı deyilənlər yalandır. Hazırda məktəbimizdə 95 qız təhsil alır. 9-cu sinfə qədər təhsil məcburidir. Amma 10-11-ci siniflərdə tədris könüllü olduğu üçün, qız şagirdlərinin sayı azdır. Yuxarı siniflərdə hər qrupda 3-4 qız var. 9-10-cu sinifdən çıxıb, texnikuma gedən qız şagirdlər də var. Keçən il yuxarı siniflərdə 7 qız var idi. Onlardan 6-sı ali məktəbə qəbul olundu. 582 balla Qaybalıyeva İlahə Daşdəmir qızı İqtisad Universitetinə qəbul olundu".
Direktor onu da qeyd etdi ki, qızların məktəbə gəlib-getməsinə valideynlər tərəfindən heç bir maneə törədilmir: “Son 5 ildə məktəb şagirdlərindən qaçırılan və ya ailə quran da olmayıb”.
Sığırlı kənd bələdiyyəsinin sədri Saleh Ağamalıyev bizimlə söhbətində yazılanların real olmadığını dilə gətirdi. Onun sözlərinə görə, kəndin 90 faiz qızlarının məktəbə davamiyyəti əladır: “Düzdür, gəlməyənlər də var. Amma bunu bütün qızlara şamil etmək olmaz. Hər il kollec və ali məktəblərə qəbul olunan qızlarımız var. Neçə il öncə ali məktəbi bitirib gələn qızlarımız da çoxdur. Hazırda universitetə qəbul olunmaq istəyən qızlar hazırlaşırlar. 450-500 bal toplayan qızlarımız olub. Ötən il qəbul olan qızlarımızın adlarını da çəkə bilərik. Qafarlı Aydan, Cəlilova Zeynəb və adlarını unutduğum bir neçə qız ötən il qəbul olunub”.
Günel CƏLİLOVA
