Prezident İlham Əliyev Nazirlər Kabinetinin 2019-cu ilin birinci rübünün sosial-iqtisadi inkişafının yekunlarına və qarşıda duran vəzifələrə həsr olunan iclasında “Azəriqaz”ın fəaliyyətini sərt tənqid edib.
Dövlət başçısı bu barədə ona məlumat verildiyini deyib: “Mənə məlumat verilir ki, “Azəriqaz” özü birtərəfli olaraq hansısa qaydalar tətbiq edir və bəzi hallarda insanlara problemlər yaradır. Buna son qoyulmalıdır və burada maksimum şəffaflıq, ədalət olmalıdır. Çünki yerlərdən belə siqnallar gəlir ki, həm sayğaclarla, həm qazın keyfiyyəti ilə bağlı problemlər var, bunlar tamamilə aradan qaldırılmalıdır. Bütün sahələrdə – elektrik enerjisi, içməli su, təbii qazın verilməsi ilə bağlı maksimum şəffaflıq və ədalət olmalıdır”.
Çox maraqlıdır, “Azəriqaz” hansı problemləri yaradır ki, bu hətta ölkə başçısı səviyyəsində tənqidə məruz qalıb?
Sahib Məmmədov: “... yüz minlərlə insanın cibinə girirlər”
Əmək Hüquqlarını Müdafiə Liqasının sədri Sahib Məmmədov da bu qənaətdədir ki, “Azəriqaz”ın fəaliyyətində ciddi nöqsanlar var. Onun sözlərinə görə, cənab Prezident "Azəriqaz"ı haqlı olaraq tənqid edib: “Onları özlərindən qaydalar müəyyən etməkdə suçladı. Tam doğru. "Azəriqaz" bütün qaydaları kobud surətdə pozaraq smart sayğaclarda limiti qaza yox, depozitə qoyulan pula tətbiq edir. Nəticədə yüz minlərlə insanın cibinə girirlər. "Azərişıq" limiti işlənən enerjiyə tətbiq etdiyi halda, "Azəriqaz" öz anbarında olan qaza görə əhaliyə limit qoyur. Halbuki, mən ödənişi sayğacımdan keçən qaza etməliyəm. Verdiyim pullar isə sadəcə depozitdir. Bu tərtəmiz oğurluqdur. Bu oğurluğa tezliklə son qoyulmalıdır”.
İlqar Hüseynli: “Prezidentin bu məsələyə münasibət bildirməsi həmin qurumun səhlənkar fəaliyyətinin göstəricisidir”
Sosial məsələlər üzrə ekspert İlqar Hüseynli qəzetimizə bildirdi ki, əslində, Prezidentin bu məsələyə münasibət bildirməsi həmin qurumun səhlənkar fəaliyyətinin göstəricisidir: “Biz sizinlə dəfələrlə sosial məsələləri müzakirə edəndə bildirmişik ki, əslində, bütün qurumlar normal çalışsa, Prezident belə xırda məsələlərə vaxt ayırmağa məcbur olmaz. “Azəriqaz”ın normal fəaliyyət göstərməməsilə bağlı ciddi iradları biz daim ictimai müzakirələrdə eşitmişik. Görünür, bu şikayətlərin həcmi o qədər böyüyüb ki, gedib Prezident səviyyəsinə çıxıb. Ən böyük narazılıq limitlə bağlıdır. Burda çox ciddi şəkildə yeyintilərə yol verilir. İl dəyişəndə bir neçə gün ərzində aralıq müddət qəsdən yaradılır ki, həmin dönəmdə sərfiyyat köhnə limitlə hesablansın. Bunun da nəticəsində külli miqdarda vəsait mənimsənilir, nəticə etibarilə vətəndaşların cibinə girilir. Sayğacların yenilənməsi ilə bağlı vəziyyət isə çox bərbad haldadır. Bəzən sayğaça müdaxilə adı ilə vətəndaşların üzərinə əsası olmayan külli miqdarda borclar yazırlar. Tez-tez təbii qazın verilişi dayandırılır. Təkrar veriləndə bir neçə dəqiqə ərzində qaz əvəzinə hava gəlir ki, bu da vətəndaşın üzərinə qaz sərfiyyatı kimi yazılır. Qurumun qəza xidməti yaxşı işləmir. Bəzən qəzanın aradan qaldırılması ilə bağlı vətəndaşlar saatlarla qurumun “qaynar xətt”inə düşə bilmirlər. Hesab edirəm ki, yaranmış vəziyyətə görə Tarif Şurası da yaxasını kənara çəkməməlidir. Nəyə görə bu cür limiti təsdiq etdilər ki, sonra Prezidentin yaranmış narazılıq fonunda məsələyə müdaxiləsinə zərurət yarandı? Bəyəm onlar bilmirdilər ki, limit hətta ən kasıb ailələri belə görməyəcək? “Azəriqaz” hazırda vətəndaşların ən çox narazı qaldığı qurumlardan biridir. Biz dəfələrlə şahidi olmuşuq ki, “Azəriqaz”ın fırıldaqları ilə bağlı hətta ölkənin tanınmış şəxsləri belə münasibət bildiriblər. Mənə elə gəlir ki, qurum indiyə qədər olan narazılıqlarla da bağlı məsuliyyət daşımalı və bunu yaradanlar ciddi cəzasını almalıdırlar”.
Məhəmmədəli QƏRİBLİ
