Aprelin 30-da Qaçqınların və Məcburi Köçkünlərin İşləri üzrə Dövlət Komitəsinin sədri Rövşən Rzayev Daxili Köçürülmə üzrə Monitorinq Mərkəzinin ölkəmizdə səfərdə olan direktoru Aleksandra Bilakla görüşüb.
Dövlət Komitəsinin sədri qonağa Ermənistan-Azərbaycan Dağlıq Qarabağ münaqişəsi nəticəsində qaçqın və məcburi köçkün vəziyyətinə düşmüş 1 milyon 200 mindən çox soydaşımızın üzləşdiyi məhrumiyyətlər, məruz qaldıqları maddi və mənəvi itkilər, bu problemin həllinə beynəlxalq təşlikatların münasibəti, dövlətimizin öz imkanları daxilində gördüyü işlər və qarşıda duran vəzifələr haqqında məlumat verib.
Qonaqlara məcburi köçkünlərin məşğulluğunun təmin edilməsi məqsədi ilə keçirilən əmək yarmarkaları, eləcə də onların müvəqqəti məskunlaşdıqları yerlərdə yüksək keyfiyyətli tibbi xidmətlə təmin olunmaları üçün keçirilən aksiyalar haqqında ətraflı məlumat verilib.
Cenevrədə yerləşən Daxili Köçürülmə üzrə Monitorinq Mərkəzinin direktoru Aleksandra Bilak Azərbaycanda qaçqınlar və məcburi köçkünlərlə iş sahəsindəki dövlət siyasətini, onların sosial problemlərinin həlli istiqamətində görülən işləri yüksək qiymətləndirib, ölkəmizdə mövcud təcrübənin dünyada nümunə olduğuna diqqət çəkib.
Mərkəz haqda məlumat verən A.Bilak bildirib ki, mərkəz hər il Daxili Köçürülmə üzrə Qlobal Hesabat tərtib edir. Hesabatda son statistik və ölkələrdə vəziyyətlər üzrə məlumatlar, eləcə də tematik və siyasi təhlillər təqdim edilir. Qlobal Hesabatda, həmçinin, dünyada münaqişə və təbii fəlakətlər nəticəsində ölkə daxilində köçürülmüş şəxslərin sayı açıqlanır. Hesabatda ölkə daxilində köçürülmələr üzrə təqdim edilən statistik məlumatlar və təhlillər dövlətlər, beynəlxalq təşkilatlar, beynəlxalq qeyri-hökumət təşkilatları, jurnalistlər və elmi dairələr tərəfindən əsas məlumat mənbəyi kimi istifadə edilir.
Görüşdə qarşılıqlı maraq doğuran məsələlərlə bağlı fikir mübadiləsi aparılıb. Daxili Köçürülmə üzrə Monitorinq Mərkəzinin direktoru Aleksandra Bilak qəbula görə minnətdardılığını bildirib.
