Bakı Mühəndislik Universitetində ümummilli lider Heydər Əliyevin anadan olmasının 96-ci ildönümünə həsr olunmuş “Gənc Tədqiqatçıların III Beynəlxalq Elmi Konfransı” öz işinə başlayıb.
BMU-nun akt zalında baş tutan konfransın açılış hissəsində ilk öncə Azərbaycan Respublikasının Dövlət Himni səsləndirilib və ardından universitetin rektoru, professor Havar Məmmədov konfransı açıq elan edib. Rektor çıxışında Heydər Əliyevin Azərbaycan dövlətinə və xalqına olan xidmətlərindən danışıb. Bildirib ki, ümummilli lider hər zaman gənclərin dünyagörüşlü, elmli yetişməsinə önəm verib. Hələ sovet dövründə Azərbaycan gənclərini ittifaqın öndə gələn universitetlərində təhsil almaları üçün göndərirdi. Bu gün də bu siyasət ölkə başçısı İlham Əliyev tərəfindən uğurla davam etdirilir və ölkəmiz bütün sahələrdə, o cümlədən elm və təhsil sahəsində beynəlxalq tədbirlərdə uğurla təmsil olunur.
Konfransda iştirak edən Kanadanın Reyson Universitetinin professoru Ziad Saghir, Bakı Dövlət Universitetinin prorektoru, professor Aydın Kazımzadə, Azərbaycan Texniki Universitetinin prorektoru, professor İsa Xəlilov və AMEA Gəncə Bölməsinin Gənc Alim və Mütəxəssislər Şurasının sədri Elnur Həsənov çıxış edərək, Heydər Əliyevin və Prezident İlham Əliyevin Azərbaycan elminin inkişafındakı xidmətlərindən danışıb. Çıxış edənlər konfransın yüksək səviyyədə təşkil olunmasına görə BMU rəhbərliyinə təşəkkür edib və konfransın işinə uğurlar arzulayıb.
Qeyd edək ki, konfransın məqsədi dünyanın müxtəlif universitet, akademiya və elmi-tədqiqat institutlarında fəaliyyət göstərən gənc tədqiqatçıları bir araya gətirmək, bu sahədə əldə olunan elmi nailiyyətləri və təcrübələri digərləri ilə paylaşmaq və gənclərin elmə olan marağını artırmaqdır. Gənc Tədqiqatçıların III Beynəlxalq Elmi Konfransına, yerli tədqiqatçılarla yanaşı, Türkiyə, İtaliya, Rusiya, Kanada kimi onlarla xarici ölkədən 750 elmi məqalə qəbul olunub, onlardan 520-si konfransın tələblərinə uyğun seçilərək, humanitar və dəqiq elmlər olmaqla iki cilddə çap olunub.
Konfrans daha sonra plenar iclaslarla öz işinə davam edib.
