Məlum olduğu kimi, Prezident İlham Əliyev “Azərbaycan Respublikasında qida təhlükəsizliyinin təmin edilməsinə dair 2019-2025-ci illər üçün Dövlət Proqramı”nın təsdiq edilməsi haqqında Sərəncam imzalayıb.
Sərəncamda qeyd edilir ki, ölkə əhalisinin təhlükəsiz və keyfiyyətli qida məhsulları ilə təmin edilməsi, qida təhlükəsizliyi sisteminin səmərəliliyinin və şəffaflığının artırılması, onun beynəlxalq tələblərə uyğunlaşdırılması məqsədilə “Azərbaycan Respublikasında qida təhlükəsizliyinin təmin edilməsinə dair 2019-2025-ci illər üçün Dövlət Proqramı” təsdiq edilsin.
Qida Təhlükəsizliyi Agentliyinə bu sərəncamla təsdiq edilən Dövlət Proqramında nəzərdə tutulmuş tədbirlərin icrasını əlaqələndirmək; həmin Dövlət Proqramında qeyd olunan tədbirlərin, beynəlxalq təcrübə nəzərə alınmaqla, əsas icra indikatorlarını üç ay müddətində müəyyən etmək; Dövlət Proqramında nəzərdə tutulmuş tədbirlərin icrasının gedişi barədə ildə bir dəfə Azərbaycan Prezidentinə məlumat vermək tapşırılıb.
Bununla yanaşı, sərəncama əsasən, QTA-ya bəzi yeni səlahiyyətlər verilib. Belə ki, Dövlət Proqramında nəzərdə tutulmuş tədbirlərin icrasının monitorinqini və qiymətləndirilməsini Qida Təhlükəsizliyi Agentliyinin sifarişi əsasında İqtisadi İslahatların Təhlili və Kommunikasiya Mərkəzi həyata keçirəcək.
Qeyd edək ki, QTA Azərbaycanda kənd təsərrüfatı məhsullarının istehsalına və emalına dair "Strateji Yol Xəritəsi"ndə nəzərdə tutulmuş tədbirlərin həyata keçıririlməsini təmin etmək, qida təhlükəsizliyinə nəzarət sistemini təkmilləşdirmək, bu sahədə şəffaflığı daha da artırmaq məqsədilə yaradılıb. Qurum 1 yanvar 2018-ci ildən fəaliyyət göstərir.
Maraqlıdır, QTA-ya yeni səlahiyyətlərin verilməsi bu qurumun fəaliyyətində, qida təhlükəsizliyi ilə bağlı proseslərdə özünü necə göstərəcək? Ekspertlərin bununla bağlı gözləntiləri nədir?
Eyyub Hüseynov: “QTA, ilk olaraq, ictimaiyyətin inamını qazanmalıdır”
Məsələyə münasibət bildirən Azad İstehlakçılar Birliyinin rəhbəri Eyyub Hüseynovun sözlərinə görə, sərəncam mükəmməldir, amma QTA-nın bundan nə dərəcədə səmərəli istifadə edəcəyini indidən demək çətindir: “Sərəncamın həyata keçirilməsi vətəndaşların həyatında özünü göstərməlidir. Bu da QTA-nın nə dərəcədə səmərəli fəaliyyət göstərməsindən asılı olacaq. Ölkə Pezidentinin qida təhlükəsizliyi ilə bağlı son sərəncamı çox əhəmiyyətlidir. Ancaq gəlin görək sərəncamdan irəli gələn vəzifələri QTA yerinə yetirməyə hazırdırmı? Çox təəssüflər olsun ki, sözügedən qurum barədə bunları demək çətindir. Problem ondadır ki, bu qurum cəmiyyətlə iş apara bilmir. Qida təhlükəsizliyi ilə bağlı proqramdan irəli gələn vəzifələr yerinə yetirilə bilər. O şərtlə ki, bunu yerinə yetirən qurum ictimaiyyətin dəstəyini alsın. Hələlik QTA-nı buna hazır görmürəm. Çünki QTA AİB-lə əməkdaşlıqda maraqlı deyil. Hazırda qida təhlükəsizliyi ilə bağlı qanun müzakirə olunur. Bununla bağlı heç bir ictimai müzakirələr keçirilmir. QTA bilməlidir ki, Azərbaycan müstəqillik əldə etdikdən sonra bu sahədə çoxsaylı proqram həyata keçirilib. QTA-nın ölkə Prezidenti tərəfindən təsdiq olunan əsasnaməsi çox mükəmməldir. QTA normal işləsə və əsasnamənin qarşıya qoyduğu tələbləri yerinə yetirə bilsə, bu sahədə problemlər xeyli azalar. Həmçinin, Azərbaycanın kənd təsərrüfatı məhsullarının ixrac qabiliyyəti yüksələr. Nəticədə Azərbaycan bundan böyük gəlirlər əldə edəcək. Bununla əlaqədar QTA, ilk olaraq, ictimaiyyətin inamını qazanmalıdır. Yalnız o halda gözləntilər böyük ola bilər və verilən yeni səlahiyyətlər prosesdə effektli rol oynayacaq”.
Vidadi ORDAHALLI
