Oyuncaq uşaqların gündəlik həyatının ayrılmaz parçasıdır. Uşaqların çoxu öz vaxtını sevimli oyuncaqları ilə keçirir. Körpələrin xoşbəxt anı isə valideynlərinin onlara sevdiyi oyuncaqları bağışladıqları andır. Məlumdur ki, qız uşaqları daha çox gəlincik, oğlanlar isə maşın və ya hərbi təyinatlı oyuncaqlarla oynamağa üstünlük verirlər. Bu gün satışda müxtəlif formada oyuncaqlar satılır. Müxtəlif ölkələrin istehsalı olan oyuncaqlar satışda var.
Qeyd etdiyimiz kimi, qız uşaqları daha çox gəlinciklə oynamağa üstünlük verirlər. Satışda müxtəlif ölçüdə, formada gəlinciklər satılır.
Bu günlərdə sosial şəbəkələrdə qardaşın balaca bacısına aldığı kukla müzakirə mövzusuna çevrilib. Qardaş sevinə-sevinə həmin gəlinciyi bacısına təqdim edib. Daha sonra kuklanı görən ailə dəhşətə gəlib. Belə ki, evdə kuklanın paltarını təsadüfən çıxaranda görüblər ki, oyuncağın başı qız başı, bədəni isə oğlan bədəni formasındadır. Dükan bunun istehsal səhvi olduğunu bildirir.
Ancaq psixoloqlar isə hesab edirlər ki, istehsalçılar qəsdən belə məhsullar istehsal edirlər ki, uşaqların cinsi dərrakəsində pozuntular yaransın.
Aynur Musayeva: “Belə oyuncaqlar çaşbaşlıq yaratmaqla yanaşı, uşağın gələcəyi üçün ciddi cinsəl problemlər yarada bilər”
Uşaq psixoloqu Aynur Musayeva “Bakı-Xəbər”ə açıqlamasında qeyd etdi ki, uşaqlar ətraf aləmi ilk olaraq oyuncaqlar üzərindən kəşf edirlər: “Belə bir kuklanı istehsalı onlarda böyük travmalara yol aça bilər. Nəzərə almaq lazımdır ki, gəlinciklər adətən 3 yaşdan böyük uşaqlara alınır. Bu həmin yaşdır ki, uşaqlarda öz cinslərini müəyyən edəcək təsəvvür artıq formalaşıb. Lakin belə oyuncaqlar çaşbaşlıq yaratmaqla yanaşı, uşağın gələcəyi üçün ciddi cinsəl problemlər yarada bilər”.
Həmsöhbətimiz onu da vurğuladı ki, bir zamanlar xarici alimlər Barbi gəlinciklərinin uşaq psixologiyasına mənfi təsir etdiyini bildirirdilər: “Araşdırmalar zamanı müəyyən olundu ki, doğrudan da Barbi gəlincikləri uşaq psixologiyasına mənfi təsir göstərir. Barbi və bunun kimi gəlinciklər uşağın inkişafı və sağlamlığı üçün ziyanlıdır. Barbi gəlincikləri qız uşaqlarında “yalnız arıq insan gözəl ola bilər” kimi sağlam olmayan stereotiplər yaradır. Bu isə uşağın sağlamlığı və gələcəyi üçün ziyanlıdır. Bəzən qızlar “Barbi kimi” olmaq üçün arıqlamağa çalışır, yeməkdən imtina edirlər. Hətta onlarda anoreksiya inkişaf edir. Əslində isə Barbi gəlinciklərinin quruluşunun insanın bədən və üz quruluşundan uzaq olduğu bildirilir”.
Günel CƏLİLOVA
