Bu günlərdə “Kontakt Home”la bağlı növbəti şikayət Azad İstehlakçılar Birliyinə daxil olub. Birliyin sədri Eyyub Hüseynov “Bakı-Xəbər”ə açıqlamasında qeyd etdi ki, Nəsimi rayonu, 20 Yanvar küçəsi, bina 31 ünvanında yaşayan İsgəndərova Gülər Vəli qızı ərizə ilə Birliyə müraciət edib: “25.03.2019-cu ildə “Kontakt Home”, Nəsimi rayonu, C.Məmmədquluzadə 120 A ünvanında yerləşən mağazasından kreditlə dəyəri 410 AZN olan “6.5” “Claassic SegWay holder” (“SW 30818) aparatı alıb. Amma onunla kredit müqaviləsi bağlanmayıb. Yalnız ödəniş cədvəli və zəmanət talonu verilib.
İlkin olaraq 56 AZN ödəyib. Sonra aparatı evə aparıb. 28.03.2019-cu il tarixində aparatı qutusundan çıxarıb, övladına ad günü hədiyyəsi kimi təqdim edib. Aparatı çıxardarkən kitabçasında onun istifadə qaydası üçün Azərbaycan dilində heç bir şey yazılmadığını görüb. Əgər mal Azərbaycan Respublikasına gəlirsə, onun həm də Azərbaycan dilində istifadə qaydasının təlimatı olmalıdır. Aparatın evdə 1,5 saatdan sonra ortasında qırmızı işıq yanıb-sönməyə başlayıb. Vətəndaş aparatın enerji ehtiyatının bitdiyini düşünüb və onu elektrik mənbəyinə qoşub. Bir sözlə, aparat işləməyib. Mağazanın əlaqə nömrəsinə zəng edib və vətəndaşa bildirilib ki, onlarlıq heç nə yoxdur, servisə göndərsin. Vətəndaş nə qədər bildirsə ki, aparatı onlardan alıb, nəticəsi olmayıb. 29.03.2019-cu il tarixində aparatı aldığı ünvana geri aparıb. Xahiş edib ki, qüsurlu mal dəyişilsin. Amma tələbi yerinə yetirilməyib”.
E.Hüseynovun sözlərinə görə, şikayətçi xanım aldığı malı Yasamal rayonu, Şıxəli Qurbanov 19 ünvanında yerləşən “Link Servis”ə aparıb və yalnız servisin verdiyi rəy əsasında qərar qəbul edilməlidir: “Beləliklə, 01.04.2019-cu il tarixində malı servisə təqdim etsə də, mal hələ də oradadır. 10 gün sonra isə alıcıya cavab gəlib ki, guya aparata su düşdüyü üçün platası yanıb. Şikayətçi xanım aparata su düşmədiyini, öz defekti olduğunu desə də, ona məhəl qoyulmayıb. Üstəlik, ondan 150 AZN təmir üçün pul istənilib. Bu tərəfdən də aylıq ödəniş tələb olunur. Malın 1.5 saat ərzində platası yanırsa, bu, müştəri tərəfindən edilən səbəb ola bilməz, hələ üstəlik bir neçə bəhanə də gətiriblər. Gah deyiblər aparatın içinə su düşüb, gah da deyirlər yamaya düşüb”.
“Kontakt Home” - Cəmilə Alnağalıyeva: “Müştəri “Claassic SegWay holder” mexanizmini düzgün idarə etmədiyi üçün aparat sıradan çıxıb”
Məsələ ilə bağlı “Kontakt Home” ilə əlaqə saxladıq. “Kontakt Home” mağazalar şəbəkəsinin şikayət üzrə inzibatçısı, irad və təkliflər şöbəsinin nümayəndəsi Cəmilə Alnağalıyeva “Bakı-Xəbər”ə açıqlamasında qeyd etdi ki, “Claassic SegWay holder” (“SW 30818) aparatının qabaq təkərinin alt hissəsində əsas mexanizm olur. Ancaq G.İsgəndərovanın mağazadan alıb, sonra yararsızdır deyə geri qaytardığı mexanizm tamamilə sıradan çıxıb: “Həmin mexanizmin sıradan çıxmasının səbəbi istehlakçı ilə bağlıdır. Müştəri həmin mexanizmi düzgün idarə etmədiyi üçün aparat sıradan çıxıb. Ola bilsin ki, müştəri aparatı daşlı yerdə sürüb və uşaq müxtəlif səbəbdən həmin mexanizmi zədələyib. Bu üzdən, aparatın düzəlməsi üçün 150 manat təmir xərci qeyd olunub. Aparatın təmir olunaraq müştəriyə təqdim olunması barədə dəfələrlə Gülər xanıma məlumat verilib. Ancaq Gülər xanım isə bizi şikayət etməklə təhdid edərək dəstəyi asıb”.
Günel CƏLİLOVA
