Nadir İsrafilov: “Ceyhun Bayramovun birillik fəaliyyəti dövründə hazırda təhsilə dair strategiyamız hazırlanıb, məqsədimiz müəyyənləşdirilib, vəzifələrimiz aydınlaşıb” “C.Bayramov ona göstərilən etimadı layiqincə doğruldur” İlqar Orucov: “C.Bayramov bir nazir kimi təhsil sahəsində islahatları uğurla davam etdirir”
Təhsil cəmiyyətin onurğa sütunudur. Sağlam təməllər üzərində inkişaf edən təhsil xalqın etibarlı gələcəyinin təminatçısıdır. Dövlətin təhsil siyasətini həyata keçirən Təhsil Nazirliyi təhsilin yeni inkişaf istiqamətlərini müəyyən edir.
Təhsil ən mühüm sahələrdən biri kimi hər zaman dövlətin diqqət mərkəzindədir və təhsilin inkişafı üçün dövlət müxtəlif istiqamətlərdə tədbirlər həyata keçirir. Son illər özünün yeni inkişaf mərhələsinə qədəm qoyan Azərbaycan təhsili dünya təhsil standartlarına uyğun istiqamət götürüb.
İstənilən sahənin hansı səviyyədə inkişafını analiz etmək üçün ilk növbədə həmin sahəyə rəhbərlik edən şəxsin fəaliyyətinə nəzər salmaq lazımdır.
23 aprel 2018-ci ildə Azərbaycan Prezidenti İlham Əliyevin müvafiq sərəncamı ilə təhsil naziri vəzifəsinə təyin edilən Ceyhun Bayramovun bu vəzifədə fəaliyyətinin bir ili tamam olub.
Ekspertlər qeyd edirlər ki, nazir təyin edilməmişdən əvvəl təhsil nazirinin müavini, sonra isə nazir əvəzi olan C.Bayramov bu vəzifələrdə işlədiyi müddətdə Azərbaycan təhsil idarəçiliyinin nəbzini tuta bilib. Təhsil mütəxəssisləri hesab edirlər ki, C.Bayramov nazir təyin edildikdən sonra öz təcrübəsindən istifadə edərək bu sahənin inkişafına yönəlik addımlar atıb. Onların bildirdiyinə görə, bu bir il müddətində təhsil sahəsində bir sıra müsbət dəyişikliklər baş verib.
C.Bayramovun rəhbərlik etdiyi təhsil sisteminə gətirdiyi yenilikləri şərh edən təhsil mütəxəssisləri vurğulayırlar ki, bu bir ildə inkişafa köklənən mühüm addımlar atılıb.
“Təhsil sahəsində dövlət siyasətinin həyata keçirilməsində köklü islahatların aparılması, təhsilimizin taleyüklü problemlərinin həll edilməsi...”
Tanınmış təhsil eksperti Nadir İsrafilov “Bakı-Xəbər” bildirdi ki, C.Bayramovun fəaliyyətindən razıdır. “Mən bir səmimi insan, yetkin vətəndaş, istər nəzəri, istərsə də lazımi praktiki potensiala malik bir ziyalı kimi C.Bayramova hələ nazir müavini postunda olarkən öz hörmət və rəğbətimi bildirmiş, təhsil naziri səlahiyyətlərini icra edərək nazir kimi təsdiqlənərkən də mətbuata açıqlamamda demişdim ki, C.Bayramovun namizədliyi daha real görünürdü və gözlənilən idi.
Bu gün də öz əvvəlki mövqeyimdə qalıram. C.Bayramovun birillik fəlaiyyəti dövründə hazırda təhsilə dair strategiyamız hazırlanıb, məqsədimiz müəyyənləşdirilib, vəzifələrimiz aydınlaşıb, sistemin daha da optimallaşdırılması və rasionallaşdırılması üçün konkret hədəflərimiz dəqiqləşib. “Azərbaycan Respublikasında təhsilin inkişafı üzrə Dövlət Strategiyası”nın həyata keçirilməsi ilə bağlı Fəaliyyət Planında strateji hədəflər üzrə tədbirlərin həyata keçirilməsi üçün zəruri əsaslar, icra müddəti və icraçılar belə təsdiqini tapıb. Bircə qalır Fəaliyyət Planının icrasına ciddi nəzarətin həyata keçirilməsi və bu prosesin təmin edilməsində Təhsil Nazirliyi aparatı və təhsili idarəetmə sisteminin digər yuxarı eşalonlarında vakant olan yerlərə səriştəli, təhsili bilən və bu sahə ilə bilavasitə bağlı olan peşəkar kadrların seçilib yerləşdirilməsi, mobil və işgüzar komandanın formalaşdırılması və bütün heyətin strateji hədəflərə doğru səfərbər edilməsi... Hesab edirəm ki, iqtisadçı və hüquqşünaslıq ixtisasları üzrə əsaslı biliklərə yiyələnən, idarəetmə sahəsində müxtəlif vəzifələrdə kifayət qədər təcrübəyə malik, ən başlıcası isə 2013-cü ilin avqust ayından təhsil nazirinin müavini kimi məsul vəzifə daşıyan C.Bayramov ona göstərilən etimadı layiqincə doğruldur. Təhsil sahəsində dövlət siyasətinin həyata keçirilməsində köklü islahatların aparılması, təhsilimizin taleyüklü problemlərinin həll edilməsi istiqamətində öz hərtərəfli bilik və bacarıqlarını, idarəetmə sahəsində qazandığı təcrübəsini əsirgəmir”.
“Təhsil sahəsində görülən işlər bir ildə deyil, bir neçə ildən sonra üzə çıxır və bəhrəsini verir”
N.İsrafilovun bildirdiyinə görə, ümumiyyətlə, gəldiyi qənaət budur ki, təhsil sahəsindəki uğur və nailiyyətləri görməmək və qiymətləndirməmək, ən azı, ədalətsizlikdən başqa bir şey deyil. “Bir də ki, təhsil sahəsində mövcud olan müəyyən problemləri bilavasitə nazirin adl ilə bağlamaq, onun fəaliyyəti ilə əlaqələndirmək kimi yanlış tendensiyadan nəhayət ki, əl çəkmək vaxtı gəlib çatıb. Belə ki, nazir başda olmaqla, Təhsil Nazirliyi təhsil sahəsində dövlət siyasətini və tənzimlənməsini, təhsil prosesinə ümumi rəhbərliyi həyata keçirən mərkəzi icra hakimiyyəti orqanıdır. Əlbəttə, “Strategiya”da da qeyd edildiyi kimi, təhsilin idarə olunmasında başlıca problemlərdən olan tənzimləmə, idarəetmə və nəzarət funksiyalarının dəqiq müəyyən edilməsi, təhsil müəssisələrinin idarəetmədə rolu ilə bağlı olan məhdudiyyətlərin aradan qaldırılması, dövlət təhsil müəssisələrinin maliyyə müstəqilliyinin təmin edilməsi, təhsil müəssisələri rəhbərlərinin tədrisin nəticələrinə görə məsuliyyətinin artırılması, peşəkarlığa əsaslanan stimullaşdırıcı əməkhaqqı sisteminin yaradılması və bir çox sahələrdə hələ də həllini gözləyən məsələlər var, bu istiqamətdə işlər ardıcıl və sistemli şəkildə davam etdirilməlidir və etdirilir də. Unutmayaq ki, təhsil həm də çoxsahəli və çoxaspektli əməkdaşlıq sahəsidir. Bir də ki, bir il qısa müddətdir və bu müddətə görə təhsil nazirinin işini qiymətləndirmək, hansısa subyektiv və konkret iddia irəli sürmək düzgün mövqe hesab edilə bilməz. Bir ildə görülən işlərin, qəbul edilən proqram və layihələrin nəticələri düşündüyümüz qədər də erkən deyil, yalnız bir neçə ildən sonra üzə çıxır. Təhsil sahəsində görülən işlər bir ildə deyil, bir neçə ildən sonra üzə çıxır və bəhrəsini verir” - deyə N.İsrafilov qeyd etdi.
“Müəllimlərin işə qəbulunda yeniliyin tətbiq olunması, ali məktəb müəssisələrində imtahanların şəffaflığının təmin olunması...”
Gənc Alim, Aspirant və Magistrlər Cəmiyyətinin sədri, fizika-riyaziyyat üzrə fəlsəfə doktoru İlqar Orucov da hesab edir ki, bu bir il ərzində C.Bayramov ona göstərilən etimadı doğruldub. “C.Bayramovun təhsil naziri təyin edilməsindən ötən bir il ərzində onun rəhbərliyi ilə təhsil sahəsində müsbətə doğru xeyli iş görülüb. Təhsil elə bir sahədir ki, orada islahatların kifayət qədər sürətlə həyata keçirilməsi, əlbəttə ki, mümkün deyil. Hətta qeyd etmək istəyirəm ki, özündən əvvəlki təhsil naziri Mikayıl Cabbarovun başladığı işləri C.Bayramov davam etdirdi. Bu özü də müsbət bir haldır. Mahiyyətcə onlar eyni komandada olan insanlardır. C.Bayramovu da məhz təhsil sektoruna M.Cabbarov gətirib. Bu gün təhsildə islahatlar davam edir. Müəllimlərin işə qəbulunda yeniliyin tətbiqi, ali məktəb müəssisələrində imtahanların şəffaflığının təmin olunması, tələbə köçürülməsi, direktorların təyin olunması və s. bu islahatlara aiddir. Bütün bunlar çox müsbət tendensiyalardır. Əlbəttə, təhsil hər bir ölkənin bel sütunudur və Azərbaycanda da cənab Prezident və eyni zamanda da Birinci vitse-prezident tərəfindən təhsilə qayğı və diqqət göstərilir, əhəmiyyət verilir. Azərbaycan Prezidentinin həyata keçirdiyi siyasətin vacib qolunu da təhsil təşkil edir. Təhsil Nazirliyinə də kimin rəhbərlik etməsi, cənab Prezidentin gördüyü işlərə təkan verməsi olduqca vacib idi. Hesab edirəm ki, C.Bayramov təhsil sahəsində islahatları uğurla davam etdirir. Təhsildə islahatlar tez bir zamanda bəhrəsini vermir, çünki bu, çoxpilləli prosesdir. Azərbaycan təhsilinin dünya təhsili ilə ayaqlaşması üçün, əlbəttə, xeyli iş görülməlidir. Düşünürəm ki, C.Bayramov bu istiqamətdə işlər görür, addımlar atır” - deyə İ.Orucov qeyd etdi.
İradə SARIYEVA
