Məişətimiz üçün elə vacib xidmət növləri var ki, onlar bizim həyatımızın rahatlığını təmin etməlidir. Lakin bəzi hallarda biz bunu hiss edə bilmirik. Çoxmərtəbəli binalarda yaşayan Bakı sakinlərinin ən çox ehtiyacı, tələbatı olan liftdir. Çox təəssüf ki, bu gün Bakının lift təsərrüfatının vəziyyəti elə də ürəkaçan deyil.
Şəhərimizin yaşayış binalarında tez-tez xarab olan köhnə liftlər hələ də qalmaqdadır. Bu da sakinləri ciddi şəkildə narahat edir. Sakinlərin bundan narahat olmağa əsası var. Bilirik ki, dəfələrlə liftin xarab olması, onu idarə edən trosun qırılması nəticəsində liftdə sonu ölümlə nəticələnən hadisələr baş verib. Qəzalı liftlərin insanlara yaşatdığı faciələr bu sahəyə keçmişdə rəhbərlik edənləri deyəsən heç narahat etməyib də. Çünki narahat etsəydi, dövlətin lift təsərrüfatına ayırdığı vəsaitləri şəxsi maraqlarının təminatına deyil, bu sahəyə yönəldər, istifadəçilərin rahatlığını təmin edərdilər.
Gizlin deyil ki, şəhərimizin lift təsərrüfatında bir sıra neqativliklər, konkret olaraq, korrupsiya halları baş verib. Bakı Lift İdarəsinin keçmiş baş direktoru Qüdrət Şükürovun bu sahədəki yarıtmaz fəaliyyəti haqqında kifayət qədər fakt mövcuddur. Başı dövlətin pullarını havaya sovurmağa qarışan Q.Şükürovun yarıtmaz fəaliyyəti şəhərimizin lift təsərrüfatını iflic vəziyyətə salıb.
Qeyd edək ki, son illər medianın gündəmində olan Q.Şükürovun adı korrupsiya cinayətlərində hallandırılıb. O, medianın gündəminə əsasən qızına etdiyi bahalı toyla gəlib. Belə ki, Bakı Lift İdarəsinin keçmiş baş direktoru Q.Şükürovun qızı Aysel Şükürovaya 400 min dollara başa gələn toy etdiyi barədə məlumatlar mətbuatda yer alıb. Onun qızının toyuna 400 min dollar xərclədiyi və 40 min dollarlıq “Love Story” çəkdirdiyi barədə yazılarla mətbuatla maraqlanan hər kəs tanışdır. Onun qızının Maldiv adalarında bal ayı keçirməsi ilə bağlı xəbərlər də yayılıb və bunu qızı Aysel Şükürova da təsdiqləyib.
Məlum olduğu kimi, fəaliyyətində ciddi nöqsanlara yol verdiyinə və dövlətin pulunu şəxsi məqsədlər üçün, biznesini genişləndirmək, var-dövlətini artırmaq məqsədilə xərclədiyinə, məsul olduğu sahəyə ciddi maddi ziyan vurduğuna görə Bakı Şəhər İcra Hakimiyyətinin (BŞİH) hazırkı başçısı Eldar Əzizov tərəfindən xeyli müddət əvvəl vəzifəsindən azad edilib. “Bakılifttəmir” İstehsalat Birliyinə rəhbərlik etdiyi müddətdə Q. Şükürovun bu sahənin inkişafına heç bir səmərə vermədiyi aydın görsənir.
Onu da bildirək ki, Bakı Şəhər İcra Hakimiyyətində inventarlaşdırma işlərinin aparılması ilə bağlı hüquq-mühafizə orqanlarının iştirakı ilə komissiya yaradılmışdı və yoxlamalar İcra Hakimiyyətinin bütün strukturlarında, o cümlədən, Bakı Lift-Təmir İstehsalat Birliyində aparılırdı.
Mətbuatda qeyd edilənə görə, bir sıra korrupsiya əməllərində ittiham edilən Q.Şükürovun korrupsiya cinayətlərinin araşdırlması ilə bağlı cinayət işi açılıb.
Məlum olduğu kimi, ölkənin lift sisteminin inkişafı dövlətin diqqət mərkəzindədir və Prezident İlham Əliyev 5 fevral 2019-cu il tarixində “Azərbaycan Respublikasının şəhər və rayonlarında çoxmənzilli binaların lift təsərrüfatının maddi-texniki bazasının möhkəmləndirilməsi ilə bağlı əlavə tədbirlər haqqında” Sərəncam imzalayıb.
Bu günlərdə Bakı Şəhər İcra Hakimiyyətində aparatın və struktura daxil təsərrüfat xidmətlərinin rəhbərlərinin iştirakı ilə iş forma və metodlarına, eləcə də neqativ hallar və korrupsiya ilə mübarizə məsələlərinə həsr olunan geniş müşavirə keçirilib. Müşavirədə İcra Hakimiyyətinin başçısı Eldar Əzizov ölkə başçısının apardığı çoxşaxəli islahatların bir çox neqativ halların qarşısını aldığını və bu sahələrdə şəffaflığın təmin olunduğunu bildirib.
O, Prezident İlham Əliyevin dövlət qulluqçuları qarşısında qoyduğu tələblərə toxunaraq bildirib ki, hər bir rəhbər işçi öz fəaliyyətində şəffaflıqla çalışmalı, hər hansı korrupsiya hallarına və pozuntulara yol verməməli, dövlət büdcəsindən səmərəli, düzgün istifadə etməli, ən vacibi isə bütün işlərini “təmiz əllərlə” görməlidir. İcra başçısı hələ də bəzi neqativ halların mövcud olduğunu qeyd edib, belə hallara qarşı ciddi mübarizə aparılacağını və aşkarlanan faktlar barədə hüquq-mühafizə orqanlarına müraciət ediləcəyini bildirib.
Struktura daxil olan xidmətlərin işlərindən danışan Eldar Əzizov bildirib ki, ölkə başçısının Bakı şəhərinin lift təsərrüfatının yenilənməsi ilə bağlı müvafiq sərəncamının icrası məqsədilə Almaniya Federativ Respublikasının "Wittur Holding GMBH" şirkəti ilə müqavilə imzalanmasına hazırlıq gedir.
Rəşad Həsənov: “Təsdiqlənən yeni mexanizmlər məhz Bakı Lift İdarəsinin də fəaliyyətində müəyyən qədər müsbət dəyişikliyə səbəb olacaq”
Bakının lift təsərrüfatında neqativ halların mövcudluğunu və bu hala qarşı ciddi mübarizə tədbirlərinin həyata keçirilməsinə ehtiyac olduğunu deyən iqtisadçı-ekspert Rəşad Həsənov “Bakı-Xəbər”ə bildirdi ki, bu sahədə korrupsiya əməllərinə yol verən keçmiş rəhbərə qarşı daha sərt tədbirlər görülməlidir. “Bu istiqamətdə bir neçə məsələyə toxunmaq istərdim. Birincisi, çox təəssüf ki, hansısa rəhbərlər korrupsiya haqqında danışanda biz də həmin qurumlarda bu cür neqativ halların olduğuna dair fikirlər ifadə etməyə çalışırıq. Bakı Lift-Təmir İstehsalat Birliyinin fəaliyyəti çox nöqsanlı idi və əksər dövlət qurumlarının da fəaliyyətində ciddi korrupsiya faktları var. Bu istiqamətdə kənar nəzarətin təmin olunması əsas məsələlərdən biridir. Burada həm ictimai nəzarət olmalıdır, həm də bu prosesdə müvafiq funksiyanı həyata keçirən Hesablama Palatasının aktivliyi artmalıdır. Dövlət vəsaitlərinin xərclənməsi zamanı ciddi nöqsanlara yol verilir. Bakının lift təsərrüfatında olan nöqsanların bu gün səsləndirilməsi, eyni zamanda, indiyə qədər bu istiqamətdə səsləndirilən iradların həqiqiliyini təsdiq edən faktdır. Məsələ ondan ibarətdir ki, bu günə qədər Bakı Lift-Təmir İstehsalat Birliyinin fəaliyyəti zamanı dövlətə dəymiş zərər necə ödəniləcək? Söhbət təkcə bundan sonra bu sahədə korrupsiya hallarına son qoyulmasından getmir, həm də dəyən zərərin ödənilməsindən gedir. Biz dəfələrlə müxtəlif dövlət qurumlarının rəsmilərindən korrupsiya ilə mübarizə ilə bağlı çağırışlar eşidirik, lakin sonra həmin qurumların fəaliyyətini analiz edəndə məlum olur ki, sadəcə, bu çağırışların çoxu formal xarakter daşıyır. Ümid edirəm ki, bu iradlar artıq tam olaraq nəzərə alınacaq və qurumun fəaliyyətində növbəti dövrlərdə şəffaflıq təmin olunacaq. Ancaq yalnız çağırışla bu problem bitmir, burada ciddi cəza mexanizmləri olmalıdır. Bundan əvvəl ciddi nöqsanlara yol verən və ictimai vəsaitləri mənimsəyən keçmiş rəhbər şəxslərdən bu vəsaitlərin dövlət büdcəsinə qaytarılması mexanizmi müəyyən edilməli və o vəsaitlərin geri qaytarılması təmin edilməlidir. Bu, büdcənin, xalqın vəsaitidir və son qəpiyinə qədər qaytarılmalıdır”.
R.Həsənov onu da bildirdi ki, Bakının lift problemi 20 ildən artıqdır mövcuddur. Onun sözlərinə görə, ancaq nədənsə bu məsələyə soyuq yanaşılır, bu məsələyə adekvat reaksiya ortaya qoyulmur və nəticədə də xüsusilə Bakının köhnə yaşayış binalarında liftlə bağlı kəskin problem yaranıb: “Bu gün Bakının köhnə yaşayış binalarında istifadə edilən köhnə liftlər vətəndaşın həyatını, məişətini daha da çətinləşdirir. Vətəndaşlar bu liftlərdən istifadə etməklə həyatlarını risq altına qoyurlar. Həm tez-tez baş verən lift qəzaları, həm bu istiqamətə ayrılan vəsaitlərin səmərəsiz xərclənməsi, həm də bu istiqamətdə korrupsiya hallarının baş verməsi hər kəsi narahat edir. Hazırda tender haqqında yeni mexanizmin təsdiqinə başlanıb. Təsdiqlənən yeni mexanizmlər məhz Bakı Lift İdarəsinin də fəaliyyətində müəyyən qədər müsbət dəyişikliyə səbəb olacaq” - deyə R.Həsənov vurğuladı.
İradə SARIYEVA
