“Bütün dövlət məmurları bilməlidirlər ki, onlar vətəndaşlara vicdanla xidmət etməlidirlər. Təyin edilmiş hər bir icra başçısının qarşısına qoyduğum birinci vəzifə bundan ibarətdir”. Bunu Prezident İlham Əliyev Bakının Xəzər rayonunda Mərdəkan-Qala avtomobil yolunun açılışında iştirak edərkən sakinlərlə görüşündə deyib.
Ölkə başçısının sözlərinə görə, bürokratik əngəllər aradan qaldırılmalı, biznes qurmaq istəyənin qarşısında süni maneələr qoyulmamalıdır. Əsas odur ki, vətəndaşları narahat edən məsələlər öz həllini tapsın: “Hər yerdə, hər bir dövlət məmuru, icra başçısı, bələdiyyə sədri, hər bir dövlət təşkilatında çalışan məmur vətəndaşlara xidmət etməlidir. Mən bunu dəfələrlə demişəm. Əfsuslar olsun ki, hər yerdə belə deyil, elə hallar var ki, vətəndaşları incidirlər, onların haqları tapdalanır, onların problemlərinə biganə yanaşılır. Bilirsiniz ki, mən vətəndaşlarla müntəzəm təmasda oluram. Mən vətəndaşlardan həm problemləri, həm də müsbət tərəfləri eşidirəm. Ona görə hər bir dövlət məmuru bilməlidir ki, onun başlıca vəzifəsi vətəndaşlara xidmət etməkdir və mənim də tələbim bundan ibarətdir” Prezidentin fikrincə, buna nail olmaq üçün çox ciddi ictimai nəzarət olmalıdır: “Ona görə insanları narahat edən məsələlər, harada ki, nöqsanlar, çatışmazlıqlar var, onlar deyilməlidir. Onlar müraciətdə öz əksini tapmalıdır ki, biz bunları həll edək. Əminəm ki, belə də olacaq. Bütün dövlət məmurları bilməlidirlər ki, onlar vətəndaşlara vicdanla xidmət etməlidirlər. Təyin edilmiş hər bir icra başçısının qarşısına qoyduğum birinci vəzifə bundan ibarətdir”.
Həqiqətən də bu məsələdə icra başçılarının üzərinə böyük məsuliyyət düşür. İcra başçıları vicdanla çalışsa, o zaman rayonlarda cəmiyyəti narahat edən problemlər də az olacaq. Daha operativ şəkildə problemlər həll ediləcək. Ümumilikdə, Azərbaycanda bütün icra başçılarının xalqa vicdanla xidmət etdiyini söyləmək mümkündürmü?
Rəsul Cahangirli: “Elələri var ki, həqiqətən də çalışır və rayonda əhaliyə xidmət edir”
Məsələyə münasibət bildirən ekspert Rəsul Cahangirli buna bir neçə aspektdən yanaşdı: “Heç də bütün icra başçılarının xalqa vicdanla xidmət etdiyini demək mümkün deyil. Elə icra başçıları var ki, həqiqətən də çalışır və rayonda əhaliyə xidmət edir. Nə mümkündürsə, onu edirlər. Çalışırlar ki, rayonda yaranan sosial-iqtisadi problemlər öz həllini tapsın. İstəmirlər ki, bu səbəbdən rayonda sosial narazılıq yaransın. Şikayətlərə daha operativ baxırlar. Nəzərə almaq lazımdır ki, hansısa sosial problemlər həll edilməyəndə bunlar üst-üstə yığılır. Bu da son nəticədə həmin rayonda narazılığa yol açır. Bu səbəbdən işinə məsuliyyətli yanaşan icra başçıları çalışırlar Prezidentin onlara göstərdiyi etimadı doğrultsunlar. Ancaq bunu hamıya şamil etmək mümkün deyil. Yəni heç də bütün icra başçılarının öz işinə vicdanla yanaşdığını demək doğru olmaz. Bu gün elə icra başçıları var ki, ölkə başçısının onlara göstərdikləri etimadı doğrultmurlar. Vəzifə səlahiyyətlərindən sui-istifadə edirlər. İnsanların problemlərinin həllinə laqeyd yanaşırlar və yaxud da bunlara az diqqət göstərirlər. Belə hallar da az deyil. Dəfələrlə müxtəlif mətbuat orqanlarında vətəndaşların şikayətləri ilə üzləşirik. Bir sıra hallarda bu şikayətlərin kökündə icra başçılarının yaxşı işləməməsi dayanır. Hansı ki, rayona rəhbərlik edən icra başçısı üzərinə düşən vəzifəni yerinə yetirsə, problemlər çoxalmaz. Ancaq düşünmək ki, icra başçısı rayondakı bütün problemləri həll edə bilər, bu da doğru yanaşma olmaz. Ancaq, hər halda, icra başçısı işini elə qurmalıdır ki, yaranan problemlər öz həllini tapsın. Ona görə də cəmiyyətə vicdanla xidmət etməlidirlər. Ümumiyyətlə, vicdanla işləmək hər bir məmurun borcudur”.
Vidadi ORDAHALLI
