Dənizkənarı ərazidə yaşayan insanların üzləşdiyi problemlərdən biri də üfunət qoxusudur. Çirkli suların dənizə axıdılması həm həmin ərazidə üfunətli iyinin yayılmasına səbəb olur, həm də çirkli suyun dənizə axıdılması bir sıra xəstəliklərin yayılmasına səbəb olur.
Bu hal ən çox Bakının Pirşağı qəsəbəsində də qeydə alınır. Qəsəbə sakinləri bildirirlər ki, çirkab suları dənizə axıdılır. Sakinlər özü ilə bərəabər üfunətli qoxunu və xəstəlikləri də dənizə daşıyan bu suyun illərdir dənizə axıdıldığını iddia edirlər.
Nəzərə almaq lazımdır ki, yay vaxtı ən çox üz tutulan yerlərdən biri də məhz Qızılqum çimərliyidir. Ancaq indi bu çimərlik çirkab sularının toplandığı məkana çevrilib. Sakinlər bildirirlər ki, yay fəslində çirkab sularının iyindən çimərlik ərazisindən istifadə etmək mümkün olmur.
Qeyd edək ki, inkişaf etmiş ölkələrdə çirkli sular üçün xüsusi yerlər nəzərdə tutulub. Həmin yerə axıdılan kanalizasiya sularındakı infeksiyalar zərərsizləşdiriləndən sonra həmin sular okeana, ya da dənizə axıdılır.
Ancaq bizdə isə çirkli sular birbaşa dənizə axıdılır. Nəzərə almaq lazımdır ki, qarşıdan yay fəsli gəlir və insanlar istirahət etmək üçün dənizə yollanacaq. Qeyd etdiyimi kimi, isti yay günlərində ən çox üz tutulan məkanlardan biri də Qızılqum çimərliyidir.
Anar Cəbrayıllı: “Pirşağı qəsəbəsi ilə bağlı xüsusi layihə var, layihəyə əsasən, Corat və Novxanı çimərliyində olduğu kimi, burada da çirkab suları təmizlənərək dənizə axıdılacaq”
Bakının Pirşağı qəsəbəsində çirkab sularının nə səbəbdən dənizə axıdılmasını öyrənmək üçün “Azərsu” Açıq Səhmdar Cəmiyyətinə müraciət etdik. Cəmiyyətin mətbuat xidmətinin rəhbəri Anar Cəbrayıllı bildirdi ki, sözügedən ərazi ilə bağlı xüsusi layihə var: “Layihəyə əsasən, Corat və Novxanı çimərliyində olduğu kimi, burada da çirkab suları təmizlənərək dənizə axıdılacaq. Yeni yaradılan sistem ən son tələblərə cavab verəcək. Bununla da dənizə kanalizasiya və çirkab sularının axıdılması problemi birdəfəlik həll ediləcək”.
Rasif Bağırov: “Kanalizasiyanın dənizə axıdılması insan orqanizmində bir çox xəstəlik yarada bilər”
Çirkli suların dənizə axıdılmasının zərəri haqqında məlumat verən həkim-ekspert Rasif Bağırov bizimlə söhbətində qeyd etdi ki, bu gün Xəzər dənizinin suyu çox çirklidir və çimməyə yararsızdır: "Bu fakt etiraf edilməlidir. Ən azından, kanalizasiya xətlərinin Xəzərə axıdılması və dənizin sahil qumunun suya yaxın hissəsinin çirkli olması dənizin suyunu daha da çirkləndirir".
Həmsöhbətimizin sözlərinə görə, sahil suları da mikroorqanizmlərin yaranmasına səbəb olur. Bura mədə-bağırsaq və dəri xəstəliklərinin mənbəyidir: “Bəzən insanların immunitetinin möhkəm olması onları infeksiyaya yoluxmaqdan qoruyur. Amma dəniz suyunda belə infeksion xəstəliklər kifayət qədərdir".
R.Bağırov bildirdi ki, kanalizasiyanın dənizə axıdılması insan orqanizmində bir çox xəstəlik yarada bilər. Çirkli su ağıza keçərək mədə-bağırsaqda infeksiyanın yaranmasına səbəb ola bilər: “Bu özünü qusma və qızdırma ilə büruzə verir. Nəinki mədə-bağırsaq infeksiyası, həmçinin, insan dəri ilə də tənəffüs etdiyi üçün dəri infeksiyaları ilə də qarşılaşa bilər. İnfeksiya baş verərkən laqeyd yanaşılarsa, bu, xroniki hala keçə bilər. Əgər infeksiya 14-20 günə sağalırdısa, xroniki halın sağalması uzun müddət çəkəcək. Ona görə də uşaqlı-böyüklü hər kəs diqqətli olmalıdır”.
Günel CƏLİLOVA
