20/05/2019 15:18
728 x 90

Ödəniş terminalları köhnə kağız pulları niyə qəbul etmir…

img

Müasir dövrdə insanlar ödənişi onlayn və nağdsız formada həyata keçirməyə üstünlük verirlər. Hər hansı sahədə ödəniş və ya telefon balansına kontur yükləmək üçün əksər hallarda ödəniş termillarının xidmətlərindən istifadə olunur.

Demək olar ki, dövlət qurumlarının, kredit və sığorta təşkilatlarının, informasiya və kommunikasiya texnologiyaları şirkətlərinin ödəniş terminalları mövcuddur. Bəzi hallarda ödəniş terminalları yeni pullardan fərqli olaraq, köhnə əskinasları qəbul etmir. Təbii ki, bu hal vətəndaşların haqlı narazlığına səbəb olur. Sakinlərin bir çoxu ödəniş terminallarının köhnə pul qəbul etməməsindən şikayətçidirlər. Onlar qeyd edirlər ki, terminalların şax olmayan pulu qəbul etməməsi onların vaxt itkisinə səbəb olur.

Bu halla ödəniş terminalının olduğu istənilən yerdə rastlaşmaq olar. Qeyd edək ki, Azərbaycanda “MilliÖN” və “E-manat” terminalları geniş yayılıb. Demək olar ki, bütün metro stansiyalarında, dayanacaqlarda, marketlərdə bu terminallara rast gəlmək mümkündür. Bakının istənilən böyük marketində və müxtəlif məntəqələrində ödəniş terminalı mövcuddur.
Məlumat üçün bildirək ki, Azərbaycandakı ödəniş terminalları, əsasən, “Sumqayıt Texnologiyalar Parkı” MMC-nin (STP) istehsalıdır.

  • İslam Rzayev: “Terminallar ABŞ və Avropanın tanınmış keyfiyyətə nəzarət qurumlarının sertifikatlarına malikdirlər”

Ödəniş terminallarının nə səbəbdən köhnə, şax olmayan pul, əskinasları qəbul etməməsinin səbəbi barədə məlumat verən adıçəkilən şirkətin İnformasiya texnologiyaları departamentinin direktoru İslam Rzayev qeyd etdi ki, bu avadanlıqlar ABŞ və Avropanın tanınmış keyfiyyətə nəzarət qurumlarının sertifikatlarına malikdirlər və onların daxilində mükəmməl əskinas tanıma cihazları quraşdırılır: “Odur ki, terminalların əskinasları tanımaması və onları geri qaytarması problemi STP-dən qaynaqlanmır. Ola bilsin ki, bu terminallardan istifadə edən dövlət və özəl qurumlar daxil edilən əskinasların vəziyyəti ilə tətbiq etdikləri proqram təminatında müəyyən tələblər qoyurlar. Hansısa dərəcədə cırılmış və yaxud əzilmiş əskinasların qəbul edilməməsi barədə cihazlara göstərişlər verilir və son nəticədə insanlar əziyyət çəkirlər.

Hazırda STP-nin istehsal etdiyi terminallar "Easypay" şirkət, "Express Bank" ("Expresspay") və "Kapital Bank" ASC-lər tərəfindən istifadə olunur: "Onların terminalları ilə bağlı istehlakçıların düşüncələri müsbətdir".

  • “MilliÖN” terminallarının məxsus olduğu “Comtec” MMC - Ülviyyə Əfəndiyeva: “Terminallarda quraşdırılmış proqram təminatı həm cırılmış və əzik, həm də şax vəziyyətdə olan pulların qəbuluna imkan vermir”

 “MilliÖN” terminallarının məxsus olduğu “Comtec” MMC-nin Müştəri xidmətləri şöbəsinin rəhbəri Ülviyyə Əfəndiyeva qeyd etdi ki, terminallarda quraşdırılmış proqram təminatı həm cırılmış və əzik, həm də şax vəziyyətdə olan pulların qəbuluna imkan vermir: “Bu proqram təminatı saxta pulların terminallara daxil edilməsinin qarşısını almaq məqsədi daşıyır. Müştərilərimiz bundan əziyyət çəksə də, hər halda, təhlükəsizlik baxımından bunu tətbiq etməyə məcburuq”.

Natiq Cəfərli: “Qanunvericiliyə əsasən, Azərbaycan Respublikası ərazisində pulun qoruyucu nişanı və seriya nömrəsində heç bir zədə yoxdursa, həmin əskinas istifadəyə yararlıdır”

İqtisadçı-ekspert Natiq Cəfərli qeyd etdi ki, qanunvericiliyə əsasən, Azərbaycan Respublikası ərazisində pulun qoruyucu nişanı və seriya nömrəsində heç bir zədə yoxdursa, həmin əskinas istifadəyə yararlıdır. Zədəsi olmayan istənilən pul vahidi istənilən qəbul edilən ödəmə məkanlarında qəbul olunmalıdır: “Ödəniş terminallarına nəzarət edən, onun proqram təminatını həyata keçirən şirkətlər ölkə qanunvericiliyini nəzərə almalıdırlar. Bu səbəbdən də şirkətlər həmin terminallarla bağlı yenilənmə etməlidirlər ki, insanlar əziyyət çəkməsinlər. Şax olmayan pulun ödəniş terminalı tərəfindən qəbul olunmaması problemi ilə mən də üzləşmişəm. Bu həm əlavə vaxt itkisinə, eyni zamanda, insanların boş yerə stress keçirməsinə səbəb olur. Əslində, bu, vətəndaşın problemi deyil. Əskinasın üzərində seriya nömrəsi və qoruyucu nişanı varsa, istənilən ödəmə nöqtəsində həmin pul qəbul olunmalıdır. Proqram təminatına müəyyən düzəlişlər etməklə ödəniş terminalları şax olmayan əskinasları da qəbul edə bilər”.

Günel CƏLİLOVA

Son xəbərlər