20/05/2019 01:08
728 x 90

Polisin elə ağır strukturları var ki, 300-400 manat maaş... – DİN sistemində maaş artımı zərurəti yetişdi...

“Polislərin də məvaciblərinin artırılmasına zərurət yaranıb”

img

Son bir ildə, demək olar ki, bütün sosial müavinətlər, pensiya və əməkhaqları, büdcədən maliyyələşən bir sıra qurumların işçilərinin əməkhaqları artırılıb. Belə ki, təhsil, səhiyyə, mədəniyyət, idarəetmə və digər bu kimi qurumlarda çalışan şəxslərin aylıq məvacibləri artırılıb. Həmçinin, bəzi güc strukturlarında fəaliyyət göstərən şəxslərin də maaşlarının artırılması reallaşıb.

Hələlik maaş artımı edilməyən mühüm dövlət strukturlarından biri Daxili İşlər Nazirliyidir.

Bu gün ölkətə sabitliyin, ictimai asayişin təmin edilməsində DİN sistemində çalışanların müstəsna xidmətlərinin olması heç kəsə sirr deyil. Bu sistemdə elə bölmələr var ki, orada çalışan polis əməkdaşları, demək olar, məhdudiyyətsiz iş rejimində fəaliyyət göstərirlər. Faktiki olaraq, gecə-gündüz demədən ölkədə ictimai asayişin qorunmasına, sabitliyin təmin edilməsinə töhfə verirlər. İnsafən, qeyd etmək lazımdır ki, bu yöndə sıravi polis əməkdaşlarının, aşağı rütbəli zabit heyətinin əziyyəti, zəhməti kifayət qədər böyükdür. Onların bu sahədə yorulmaz fəaliyyəti sabitliyin təmin olunmasında mühüm rol oynayır. Bu da, öz növbəsində, ölkənin dinamik iqtisadi inkişafına öz töhfəsini verir. Çünki sabitlik təmin edilmədən hər hansı sosial-iqtisadi inkişaf mümkün deyil. Ancaq məhdudiyyətsiz vaxt rejimində, ağır şərtlərlə işləyən polislər var ki, onların məvacibləri 300-400 manat arasında dəyişir. O baxımdan, polis işçilərinin əməkhaqlarının artırılması zərurətinə ekspertlər necə yanaşırlar?

  • Şəmsəddin Əliyev: “Ölkə Prezidenti tərəfindən bununla bağlı bir normativ-hüquqi aktın imzalanacağına ümid böyükdür”

Məsələyə münasibət bildirən “Polisə dəstək” İctimai Birliyinin rəhbəri Şəmsəddin Əliyevin sözlərinə görə, polis əməkdaşlarının məvaciblərinin artırılmasına ehtiyac var: “Əvvəla Prezident İlham Əliyevin son aylar ərzində büdcədən maliyyələşən dövlət qulluqçuları və digər sahələrdə çalışanların maaşlarının artırılması ilə bağlı qərarları bilavasitə vətəndaşların həyat şəraitinin yüksəldilməsinin əyani göstəricisidir. Burada dövlət büdcəsindən maliyyələşən digər xüsusi növ dövlət qulluqçuları da var. Ancaq yaxşı olardı ki, polislərin də məvacibləri artırılsın. Məsələn, daxili işlər orqanlarında xidmət göstərən və özlərinin narahat gecələri hesabına vətəndaşların təhlükəsizliyini təmin edən, ictimai qaydanı qoruyan polis əməkdaşlarının məvacibləri artırılmalıdır. Çünki lazım gələndə Vətənin müdafiəsi qədər öz canlarını fəda etmək ruhunda tərbiyələnən polis əməkdaşlarının müasir şəraitə uyğun əməkhaqları ilə təmin edilməsi vacibdir. Bir sözlə, polislərin də məvaciblərinin artırılmasına zərurət yaranıb. Düşünürəm ki, sosial sahədə həyata keçirilən islahatlardan biri də məhz Azərbaycan polisinin əməkhaqqının artırılması ilə bağlı olacaq. Ölkə Prezidenti tərəfindən bununla bağlı bir normativ-hüquqi aktın imzalanacağına ümid böyükdür. O üzdən, bununla bağlı gözləntim var”.

Namiq QULİYEV

Son xəbərlər