23/07/2019 22:23
728 x 90

İctimai nəqliyyatda kameraların özü var, işi yoxdur…

img

Əksər marşrut avtobusunda "itən əşyalara görə sürücü məsuliyyət daşımır" tipli elanlarla əksər istifadəçilər rastlaşıb. Elə bu elanın özü məsələnin nə qədər problemli olduğunu göstərir.

Çox güman ki, sürücülər bu hallarla tez-tez üzləşirlər və bu vəziyyətdə əşyasını itirənlərin ilk müraciət etdikləri şəxs avtobusun sürücüsü olur. Bəli, sürücünün itən əşyadan xəbəri ola da, olmaya da bilər. Hətta həmin itən əşyanı son dayanacaqda sürücünün özü də götürə bilər. İçində hər hansı dəyərli, qiymətli bir şey varsa, onda onun "buxarlanması" da mümkündür. Ola da bilər ki, həqiqətən, həmin əşyanı bir başqası götürüb və ondan sürücünün xəbəri olmayıb...

İctimai nəqliyyatda yaşanan xoşagəlməz halların qarşısının alınması və bu sahədə müəyyən işlərin görülməsi üçün avtobuslara kamera quraşdırılıb. Kamera ona görə quraşdırılıb ki, bir çox cinayətin üstünün açılmasında və ya qarşısının alınmasında, həmçinin, avtobuslara zərər vuran, nalayiq hərəkətlər edən şəxslərin üzə çıxmasında rolu olsun.

Ancaq apardığımız araşdırma zamanı məlum oldu ki, əksər avtobusa quraşdırılan kameralar formal xarakter daşıyır. Yəni avtobusa quraşdırılan kamera işləmir, sadəcə, görüntü olaraq nəqliyyat vasitəsinə quraşdırılıb. Hətta avtobuslarda kameraların formal olaraq quraşdırıldığını sürücülər də etiraf edir.

  • Mais Ağayev: “Müntəzəm marşrut xətti üzrə istismarda olan avtobuslarda nəqliyyat vasitəsinin daxili salonunu və xaricdən dörd tərəfini görməyə imkan verən kameralar olmalıdır”

Məsələ ilə bağlı məlumat verən Bakı Nəqliyyat Agentliyinin mətbuat xidmətinin rəhbəri Mais Ağayev bildirdi ki, Nazirlər Kabinetinin müvafiq qərarına əsasən, müntəzəm marşrut xətti üzrə istismarda olan avtobuslarda nəqliyyat vasitəsinin daxili salonunu və xaricdən dörd tərəfini görməyə imkan verən kameralar olmalıdır: “Eyni zamanda, bu kameralar qeydə alınan görüntünü 15 gün yadda saxlayan yaddaş qurğusu ilə təchiz edilməlidir. Qeyd edim ki, bu tələbin icrası ilə bağlı BNA tərəfindən daşıyıcılara müvafiq göstərişlər verilib. Əksər avtobuslarda bu kameralar işləkdir. Amma bəzən hansısa avtobusda kamera işləmir, yaxud texniki nasazlıq yaranır. Belə hallar aşkar edildiyi zaman daşıyıcıya xəbərdarlıq edilir. Məlum məsələ araşdırılaraq daşıyıcı şirkətə çatışmazlığın aradan qaldırılması ilə bağlı göstəriş veriləcək”.

  • Azər Allahverənov: “İctimai nəqliyyatda kameranın olması təhlükəsizlik baxımından vacibdir”

Nəqliyyat məsələləri üzrə ekspert Azər Allahverənov qeyd etdi ki, qanunvericiliyin tələbinə əsasən, salonda görüntünün qeydiyyatını aparan kameralar quraşdırılmalıdır: “Məlumdur ki, sərnişindaşıma ilə bağlı müəyyən tələblər tətbiq olunub. Həmin tələblərdən biri də salonda görüntünü aparan videokameraların quraşdırılmasıdır. Bəli, bu gün bəzi avtobuslarda kameralar işlək vəziyyətdə deyil. Kameraların işlək vəziyyətdə olmamasının müxtəlif səbəbləri var”.

A.Allahverənovun sözlərinə görə, ictimai nəqliyyatda kameranın olması təhlükəsizlik baxımından vacibdir. Məlumdur ki, avtobus salonunda bir çox hadisələr baş verə bilər. Həmin hadisələrin araşdırılması baxımından videogörüntülərin olması vacibdir.

Ekspertin fikrincə, hansı daşıyıcıda kamera işlək vəziyyətdə deyilsə, aidiyyəti qurumlar bu məsələni ciddi nəzarətə götürməlidirlər. Hətta daşıyıcı şirkətin lisenziyası belə ləğv oluna bilər.

Günel CƏLİLOVA

Son xəbərlər