Millət vəkili Fazil Mustafa mətbuata açıqlamasında çox ciddi bir mövzuya toxunaraq bildirib ki, sanki kimlərsə bilərəkdən ölkədə narkomaniyanı yaydıqları kimi, fahişəliyi də yayırlar:
"Azərbaycanda fahişəxanalar baş alıb gedir. Otellərdə və digər obyektlərdə əxlaqsızlıq hökm sürür. Hərənin bir himayəçisi var”.
Dilarə Əliyeva adına Azərbaycan Qadın Hüquqları Müdafiə Cəmiyyətinin sədri, hüquq müdafiəçisi Novella Cəfəroğlu isə mediaya açıqlamasında millət vəkilinin fikirləri ilə razılaşdığını bildirib. N. Cəfəroğlu deyib ki, QHT-lərin fəaliyyətinin məhdudlaşdırılması fahişəxanaların artmasına səbəb olub: "Fazil Mustafanın səsləndirdiyi fikirlərlə razıyam. Əsasən gənc oğlanlar və qızlar bu işlərlə məşğuldurlar. Gənc qızları rayonlardan Bakıya gətirib fahişəliyə cəlb edirlər. Buna hüquq-mühafizə orqanları ciddi nəzarət etməlidirlər. Əxlaq polisi Azərbaycanda var və ya yoxdur, onu dəqiq bilmirəm, amma onlar birbaşa bu işlə məşğul olmalıdırlar”.
N.Cəfəroğlu qeyd edib ki, QHT-lərin fəaliyyəti məhdudlaşdırıldıqdan sonra rayonlara gedib seminarlar keçirə bilmirlər. Çünki buna maddi imkanları yoxdur: "Cəmiyyəti stabil saxlayan QHT-lər idi. Bununla yanaşı, televiziyalarımızda bayağı, şou xarakterli verilişləri ləğv edib, təlim-tərbiyə məsələlərini qaldırmaq lazımdır. Televiziyalarımzda əxlaqla bağlı verilişlər hazırlanmalıdır”.
N.Cəfəroğlu diqqətə çatdırıb ki, gəncləri əxlaqsızlığa sövq edənlər ifşa olunmalı, cəmiyyət də bununla mübarizə aparmalıdır.
Hər iki şəxs cəmiyyətdə kifayət qədər tanınan və statusları olan adamlardır. Onların ümumi mənada toxunduqları mövzu doğrudan da ciddidir. Ancaq, göründüyü kimi, hələlik bu məsələ ümumi anlamda, cəmiyyətin problemi kimi ictimailəşdirilir. Bu baxımdan da maraqlıdır, onlar bu faktları hardan əldə ediblər, səsləndirdikləri iddialarla bağlı konkret ünvan və şəxs adları varmı və ümumiyyətlə, bununla bağlı hansısa rəsmi qurumlara şikayətlər ediblərmi?
Fazil Mustafa: “Araşdırıb bizə bilgilər versələr, biz həmin məlumatlar əsasında dəqiq ünvanlara müraciət edərik”
Millət vəkili Fazil Mustafa “Bakı-Xəbər”ə açıqlamasında bildirdi ki, belə məlumatları o daha çox Daxili İşlər Nazirliyi tərəfindən yayılan rəsmi məlumatlardan əldə edir: “Həmin məlumatlarda belə yuvaların aşkarlandığı göstərilir. Biz həmin faktların araşdırılması ilə məşğul deyilik. Ümumi tendensiyanı təhlil edib görürük ki, royonlarda və paytaxtda bu istiqamətdə fəaliyyət genişlənib. Belə halların çox vaxt qarşısı kimlərinsə maraqları səbəbindən alınmır. Bəli, biz belə bir həyəcan təbilini çalmışıq ki, narkomaniya və fahişəlik geniş şəkildə yayılır. Biz siyasətçi olaraq ümumi tendensiyanı göstərə bilirik. Qalan işi araşdırmaçı jurnalistlər və ya ekspertlər həyata keçirməlidirlər. Araşdırıb bizə bilgilər versələr, biz həmin məlumatlar əsasında dəqiq ünvanlara müraciət edərik”.
Novella Cəfəroğlu: “Mən burada konkret faktları niyə açıqlamalıyam ki?”
Hüquq müdafiəçisi Novella Cəfəroğlu “Bakı-Xəbər”ə bildirdi ki, onlarda belə konkret faktlar var: “Pasportları əlindən alınıb, fahişəliyə cəlb edilən adamlarla bağlı əlimizdə konkret faktlar olub. Mən burda konkret faktları niyə açıqlamalıyam ki? Əlimizdə olan belə faktları biz lazımi orqanlara təqdim etmişik və edirik. Təbii ki, fakt olmasa, belə ciddi iddia ilə çıxış etmərik. Bunu yalnız ölkənin daxilinə şamil etməməliyik. Ölkənin xaricində də belə faktlar mövcuddur. Şəxsən mən hər dəfə Türkiyəyə gedəndə utanıram. Orada əxlaqsızlıqla məşğul olan qadınlarımızı bizə göstərib başımıza qaxınc edirlər”.
Bəs belə hallarla hüquq müstəvisində necə mübarizə aparılmalıdır?
Mehman Muradlı: “... buna ümumi yox, faktlar əsasında yanaşmaq lazımdır”
Hüquqşünas Mehman Muradlı qəzetimizə bildirdi ki, qanunvericilik bu fəaliyyətləri qadağan edir: “Əxlaqsızlıq yuvaları saxlama, əxlaqsızlığa cəlb etmə kimi hərəkətlər Cinayət Məcəlləsinin uyğun maddələri ilə təqib edilir və bunlara görə sərt cəza növləri müəyyənləşib. Hətta DİN-in tərkibində bununla məşğul olan ayrıca bir baş idarə də var. Biz yayılan rəsmi məlumatlardan görürük ki, bu problemlə mübarizə aparılır. Çünki mütəmadi şəkildə belə halların ifşa edildiyi rəsmən bəyan olunur. Kimdəsə daha ciddi faktlar varsa, bunu əlaqədar qurumlara təqdim etməlidir. Ola bilər ki, yerlərdə kimlərsə buna göz yumur və ya həqiqətən nəzərdən yayınır. Söhbət cinayət əməli ilə mübarizədən gedirsə, buna ümumi yox, faktlar əsasında yanaşmaq lazımdır”.
Məhəmmədəli QƏRİBLİ
