20/05/2019 01:01
728 x 90

Bizim vəkillərimizin üzvlük haqqını ödəməmək problemi var

“Əksər vəkillər üzvlük haqqının baha olmasından narazıdır, bu səbəbdən də üzvlük haqqının aşağı salınmasını istəyirlər”

img

İnsan hüquq və azadlıqlarının məhkəmə müdafiəsi, bu zaman keyfiyyətli hüquqi yardımın göstərilməsi, hüququn aliliyinin təmin olunmasında vəkillik institutunun müstəsna əhəmiyyəti var. Azərbaycan üçün də davam edən dövlət quruculuğu və bunun tərkib hissəsi kimi hüquqi islahatlar çərçivəsində vəkillik institutunun inkişafı problemi aktualdır.

Vəkillik institutunun inkişafı ilə bağlı postsovet məkanı ölkələri üçün xarakterik olan problemlər Azərbaycanda da müşahidə olunur. Şübhəsiz, sırf Azərbaycana aid obyektiv və subyektiv amillərlə bağlı problemlər və çətinliklər də mövcuddur. Bu problemlərdən biri də vəkillərin üzvlük haqqı ödəməməsidir. Bunu Vəkillər Kollegiyasının sədri Anar Bağırov media nümayəndələrinə açıqlamasında deyib. O bildirib ki, vəkillərin üzvlük haqqı ödəməməsi ilə bağlı problemlər olur: “Vəkillər və vəkillik fəaliyyəti haqqında” Qanunun tələblərinə görə, 6 aydan çox müddətdə üzvlük haqqı ödəməyən vəkillərin fəaliyyətinə xitam verilir. Onların xaric olunması ilə bağlı iddia da məhkəməyə təqdim olunur”.

Məlumat üçün bildirək ki, vəkillərin üzvlük haqları minimum aylıq əməkhaqqının 40 faizi həcmində müəyyənləşdirilib. Onu da bildirək ki, “Azərbaycan Respublikasında vəkilliyin inkişafı ilə bağlı əlavə tədbirlər haqqında” Azərbaycan Respublikası Prezidentinin 2018-ci il 22 fevral tarixli Sərəncamına əsasən, regionlarda vəkillərin fəaliyyətinin stimullaşdırılması, yeni qəbul edilmiş və gələcəkdə qəbul edilməsi nəzərdə tutulan vəkillərimizin və hüquqşünaslarımızın həvəsləndirilməsi məqsədilə iclasda 2019-cu ilin martından etibarən regionlarda fəaliyyət göstərən vəkillər tərəfindən 50 manat, Kollegiyaya yeni qəbul olunmuş vəkillər üçün fəaliyyətlərinin ilk ilində 40 manat və Bakıda fəaliyyət göstərən vəkillər tərəfindən isə 60 manat məbləğində üzvlük haqqı ödənilməsi qərara alınıb.

Vəkillər üzvlük haqqını nə səbəbdən ödəmirlər?

  • Əli Cəlilov: “O səbəblərdən biri yenicə fəaliyyətə başlamış vəkillərlə bağlıdır”
Hüquqşünas Əli Cəlilov “Bakı-Xəbər”ə açıqlamasında qeyd etdi ki, bu gün vəkillərin üzvlük haqqı ödəməsi sahəsində problem yaşanır: “Bu danılmaz faktdır. Vəkillərin üzvlük haqqı ödəməməsinin müxtəlif səbəbləri var. O səbəblərdən biri yenicə fəaliyyətə başlamış vəkillərlə bağlıdır. Həmin vəkillər özlərini cəmiyyətə tanıdana qədər onların işi az olur. Bu səbəbdən də onlar üzvlük haqqı ödəməkdə çətinlik çəkirlər.

Həmçinin, səhhəti ilə bağlı, eyni zamanda, müəyyən müddətə ölkədə olmayan vəkillər də üzvlük haqqı ödəməkdə çətinlik çəkirlər”.

Həmsöhbətimiz onu da vurğuladı ki, əksər vəkillər üzvlük haqqının baha olmasından narazıdır. Bu səbəbdən də vəkillər üzvlük haqqının aşağı salınmasını istəyirlər.

Günel CƏLİLOVA

Son xəbərlər