23/07/2019 22:27
728 x 90

“Azərbaycan Dəmir Yolları”nda işçilər üç dəfəyədək ixtisar ediləcək (?) – Auditdən inanılmaz xəbər...

“Hansı məntiqlə, bizimlə dəqiqləşdirmədən, həqiqəti əks etdirməyən belə informasiyanı cəmiyyətə necə təqdim ediblər?”

img

Bir sıra  KİV-də 2022-ci ilə qədər “Azərbaycan Dəmir Yolları” QSC-nin (ADY) əməkdaşlarının sayının 3 dəfədən çox azaldılmasının nəzərdə tutulduğu ilə bağlı informasiyalar yayılıb. Həmin məlumatda qeyd edilir ki, bunu dövlət müəssisəsinin auditini həyata keçirən KPMG audit şirkəti bəyan edib. Audit nəticəsində məlum olub ki, ADY-nin işçi heyətinin sayı təxminən 22 min nəfərdir və bu rəqəmin 6 422 nəfərə qədər azaldılması, orta aylıq əməkhaqqının isə 596 manat təşkil etməsi tövsiyə olunub.

Bu o deməkdir ki, qarşıdakı 3 ildə “Azərbaycan Dəmir Yolları” QSC-nin rəisi Cavid Qurbanov hər il orta hesabla 5 min, ümumilikdə isə 15 mindən artıq əməkdaşı işdən azad edəcək. Onda sual olunur: belə kütləvi ixtisardan sonra “Azərbaycan Dəmir Yolları” anonsunu verdiyi böyük layihələri necə həyata keçirəcək? Bundan əlavə, hakimiyyətin yürütdüyü kursdan görünür ki, hazırda maksimum dərəcədə dövlət müəssisələrində ixtisarların aparılmamasına çalışılır. Onda isə audit təşkilatına istinadən yayılan bu məlumatı nə dərəcədə əsaslı saymaq olar?

  • Sevinc Qədirova: “Əminliklə deyirəm ki, KPMG adlı təşkilat bu yaxınlarda bizim qurumda heç bir audit yoxlaması aparmayıb”

Məsələyə aydınlıq gətirmək üçün “Azərbaycan Dəmir Yolları” Qapalı Səhmdar Cəmiyyətinin mətbuat xidmətinin rəhbəri Sevinc Qədirova ilə əlaqə saxladıq. Qurum təmsilçisi “Bakı-Xəbər”ə açıqlamasında bildirdi ki,  yayılan məlumat həqiqəti əks etdirmir: “Biz də bu məlumatı görüb təəccübləndik. Sözügedən audit qurumu ADY-də auditi yaxın zamanlarda aparmayıb. Səhv etmirəmsə, onların bu auditi 2017-ci ildə həyata keçirilib. Həmin vaxt belə bir informasiyanın yayıldığının da şahidi olmamışıq. Bu məlumatı yayan ilkin mənbə agentliklərdən biridir. Başa düşə bilmirəm ki, onlar hansı məntiqlə, bizimlə dəqiqləşdirmədən, həqiqəti əks etdirməyən belə informasiyanı cəmiyyətə necə təqdim ediblər? Əminliklə deyirəm ki, KPMG adlı təşkilat bu yaxınlarda bizim qurumda heç bir audit yoxlaması aparmayıb. Bilirsiniz ki, hazırda ADY tərəfindən böyük layihələr icra edilir. Deyilən sayda ixtisarın aparılması olarsa, biz həmin layihələri necə icra edərik? Əksinə, biz hazırda gənc kadrların işə cəlb edilməsində xüsusilə maraqlıyıq. Belə kütləvi ixtisardan söz gedə bilməz. ADY-nin perspektivdə hansı işləri görməsi ilə bağlı məlumatla siz bizim sayt vasitəsilə məlumat əldə edə bilərsiniz. Orada sizin sualınıza  tam cavabı tapa bilərsiniz. Eyni zamanda, mənim açıqlamamın həqiqət olduğu öz təsdiqini tapmış olacaq”.

S.Qədirovanın tövsiyəsi əsasında biz ADY-nin saytının məlum bölümündə qurumun gələcək perspektiv fəaliyyəti ilə bağlı dolğun məlumata rast gəldik. Həmin məlumatda qeyd olunur ki, 2016-cı ilin sonundan etibarən Asiya İnkişaf Bankının (AİB) texniki dəstəyi və "Azərbaycan Dəmir Yolları" QSC-də (ADY) mövcud mənbələrdən dəstəklə, Dəmiryol Sektorunun İnkişafı Proqramına başlanıb: “ADY QSC-də, AİB-ın köməkliyi ilə, Siyasət və Layihə Krediti ilə əlaqədar korporativ, institusional, maliyyə və insan resursları islahatlarının keçirilməsi planlaşdırılır.

Azərbaycan Respublikası Hökuməti və Asiya İnkişaf Bankı arasında 19 dekabr 2017-ci il tarixində 250 mln. ABŞ dolları məbləğində Dəmiryol Sektorunun İnkişafı Proqramı üçün kredit müqaviləsi (siyasət krediti) və 150 milyon ABŞ dolları məbləğində Dəmiryol Sektorunun İnkişafı Layihəsi üçün kredit müqaviləsi (layihə krediti) bağlanıb. Fransa İnkişaf Agentliyi ilkin olaraq hər iki layihə üzrə birgə maliyyələşdirməni həyata keçirmək üçün dəstək verməyə razılığını bildirib. Həmçinin, Azərbaycan Hökuməti tərəfindən, ümumilikdə, 150 mln. ABŞ dolları məbləğində kredit vəsaitinin ayrılmasına qərar verilib.

Bu kredit iki tranşdan ibarətdir. Hökumət və ADY QSC tərəfindən 23 islahat tədbirinin həyata keçirilməsini tələb edən “Tranş 1” və əlavə 22 tədbirin həyata keçirilməsini tələb edən “Tranş 2” razılaşdırılıb və müqavilə şərti qismində kredit müqavilələrinə əlavə edilib.

İslahatların uğurla həyata keçirilməsindən sonra, 2022-ci ilə qədər Azərbaycanda dəmir yolu xətlərinin xidmət keyfiyyətinin yaxşılaşacağı, həmçinin, dəmir yolları əməliyyatlarının maliyyə effektivliyinin artacağı gözlənir. İslahatların təfsilatlı nəticələri aşağıdakı kimi olacaq:

Müşahidə Şurası və ona hesabat verən komitələr də korporativ idarəetmə tələblərinə uyğun olacaq;

“Dəmir yolu haqqında” qanun layihəsi Milli Məclis tərəfindən qəbul ediləcək;

Borca xidmət əmsalı 1.1 çatacaq;

Müəssisənin Resurs Planlaması (ERP) sistemi tam fəaliyyət göstərəcək;

KPI-lar (əsas fəaliyyət göstəriciləri) müntəzəm qaydada izlənəcək və yenilənəcək;

Qabiliyyətlərin artırılması planı icra ediləcək;

Əsas funksiyanın ayrılmasını nəzərdə tutan korporativ restrukturizasiya planı və məsuliyyət zəncirinin aydın şəkildə formalaşdırılması icra olunacaq;

Zərərlə işləyən sərnişindaşıma xidmətləri, əməliyyat və texniki xidmət xərcləri üçün müqavilə əsaslı həllər əldə ediləcək;

2019-cu ilə qədər Aktivlərin idarə edilməsi iyerarxiyasının reallaşdırılması davam edəcək;

Əməliyyat səmərəliliyi səviyyəsi artacaq”.

ADY rəsmisinin mövqeyi və qurumun rəsmi saytında yerləşdirilən məlumatdan görünür ki, yaxın zamanlarda kütləvi ixtisarların aparılacağı inandırıcı görünmür.

Məhəmmədəli QƏRİBLİ 

Son xəbərlər