Son dövrlər dərsliklərin məzmun və keyfiyyəti, eləcə də həcmi ən çox müzakirə edilən, barəsində tənqidi fikirlər, rəylər bildirilən məsələlərdən biridir. Bildiyimiz kimi, şagirdlərin istifadə etdikləri dərsliklərin keyfiyyətinin yüksəldilməsi, məzmununun təkmilləşdirilməsi sahəsində mövcud problemlərin aradan qaldırılması üçün Təhsil Nazirliyi addımlar atır.
2018-2019-cu tədris ilində istifadəyə verilən dərsliklərin bir çoxunda əvvəlki tədris illərində istifadə edilən dərsliklərdə müşahidə edilən nöqsanların xeyli hissəsi aradan qaldırılsa da, mütəxəssislər hesab edirlər ki, yenə də qüsurlar var.
Təhsil Nazirliyi bu problemin həlli üçün yeni bir addım atıb. Belə ki, nazirlikdə dərslik layihələrinə dair ictimai rəyin öyrənilməsinə başlanıb.
Qeyd edilənə görə, 2019-2020-ci tədris ilinə ölkənin dövlət ümumtəhsil müəssisələrinin I sinifləri üçün yeni hazırlanmış, IV və VIII sinifləri üçün isə təkmilləşdirilmiş dərslik və müəllim üçün metodiki vəsaitlərə dair ictimai rəyin öyrənilməsi prosesinə start verilib. Bu məqsədlə dərslik və müəllim üçün metodiki vəsaitlərin layihələri www.trims.edu.az saytının “İctimai müzakirədə olanlar” bölməsində yerləşdirilib. Yaxın müddətdə bütün layihələrin sayta yerləşdirilməsi başa çatacaq.
Artıq ictimaiyyət nümayəndələri, mütəxəssislər mövcud sayta daxil olaraq qeyd edilən bölmədə yerləşdirilmiş layihələrin məzmunu ilə tanış olmaq, eyni zamanda, xüsusi ayrılmış sahədə irad və təklifləri yazmaq imkanı əldə edirlər.
Təhsil Nazirliyindən bildirilir ki, nazirlik elm adamlarını, təhsil işçilərini, valideynləri, aidiyyəti dövlət qurumlarını, müxtəlif ictimai birlikləri və bütün maraqlı tərəfləri müzakirəyə çıxarılmış dərslik komplektlərinin layihələrinə dair rəy, irad və təkliflərini bildirməyə dəvət edir.
Rafiq İsmayılov: “Nazirlik tərəfindən dərsliklərin ictimai müzakirəyə çıxarılması əhəmiyyətlidir və bu öz bəhrəsini verəcək”
Dərslik üzrə mütəxəssis Rafiq İsmayılov “Bakı-Xəbər”ə bildirdi ki, nazirliyin bu addımı artıq söz-söhbətlərə, fikir ayrılıqlarına son qoyacaq. O qeyd etdi ki, IV və VIII siniflər üçün təkmilləşdirilmiş dərsliklərin hazırlanması adi prosesdir. “Dərsliklər 4 il müddətinə buraxılır və bu 4 il ərzində pedaqoji ictimaiyyətdən, valideynlərdən gələn rəylər, iradlar yığılır və növbəti nəşr zamanı bu rəylər, qeydlər nəzərə alınır. O ki, qaldı I sinif üçün dərsliklərin hazırlanmasına, burada dərsliklərin hazırlanması əvvəlkilərdən bir qədər fərqlidir. Yəni bu dərsliklər Təhsil Nazirliyinin öz təşəbbüsü və sifarişi əsasında hazırlanır. Bu dərsliklərə daha konseptual yanaşma tətbiq olunur. Burada ayrı-ayrı nəşriyyatların həll edə bilməyəcəyi bəzi məqamlar öz həllini tapır. Bu işdə çoxmərhələli müəllif seçimi həyata keçirilir. Daha sonra dərsliklərin konsepsiyası üzərində iş gedir və həmin müəlliflərin iştirakı ilə dərslik hazırlanır. Dərsliklər bir il sınaqdan keçirilir. Bildiyim qədər, bu proses daha geniş miqyasda keçiriləcək və dərsliklər ictimaiyyət tərəfindən müsbət qəbul ediləcəksə, kütləvi şəkildə məktəblərə paylanacaq. Nazirlik tərəfindən dərsliklərin ictimai müzakirəyə çıxarılması əhəmiyyətlidir və bu öz bəhrəsini verəcək” - deyə R.İsmayılov bildirdi.
O, həmçinin, vurğuladı ki, növbəti tədris ilindən başlayaraq II sinif dərslikləri ilə də bağlı yeni proses başalayacaq. Ekspert dedi ki, hələlik Azərbaycan dili və riyaziyyat dərslikləri hazırlanaraq sınağa buraxılacaq, bu vəsaitlər özünü doğrultsa və ictimai müzakirədə müsbət rəy qazansa, digər dərsliklərin hazırlanması da baş verəcək.
Sevinc Nuruqızı: “Bu həm də dərsliklər ətrafında yaranan söz-söhbətlərə, fikir ayrılıqlarına son qoyacaq”
“Təhsil” nəşriyyatının uşaq ədəbiyyatı şöbəsinin müdiri, yazıçı Sevinc Nuruqızı da hesab edir ki, nazirlik tərəfindən I, IV və VIII siniflər üçün hazırlanan dərs vəsaitlərinin ictimai müzakirəyə çıxarılması faydasız olmayacaq: “Bilirsiniz ki, son zamanlar nəşr edilərək şagirdlərin istifadəsinə verilən müxtəlif dərsliklər ətrafında söz-söhbətlər dolaşır, mütəmadi olaraq bu vəsaitlər müzakirə edilir. Yəni bu proses dərsliklər nəşr edildikdən sonra baş verir. Təhsil Nazirliyinin növbəti tədris ili üçün hazırlanan dərs vəsaitlərini ictimai müzakirəyə çıxarması çox müsbət haldır. Bu həm də dərsliklər ətrafında yaranan söz-söhbətlərə, fikir ayrılıqlarına son qoyacaq. İstənilən şəxs sayta daxil olub vəsaitlərlə bağlı öz fikrini bildirəcək”.
İradə SARIYEVA
