Azərbaycanda körpələr evləri və uşaq sığınacaq mərkəzində nöqsanlar aşkar olunub. Nazirlər Kabineti yanında Yetkinlik Yaşına Çatmayanların İşləri və Hüquqlarının Müdafiəsi üzrə Komissiyanın tapşırığı əsasında Təhsil, Səhiyyə, Daxili İşlər, Əmək və Əhalinin Sosial Müdafiəsi, Gənclər və İdman nazirliklərinin, Ailə, Qadın və Uşaq Problemləri üzrə Dövlət Komitəsinin, Bakı Şəhər İcra Hakimiyyətinin əməkdaşlarından ibarət monitorinq qrupu tərəfindən 1 saylı körpələr evi, Azərbaycan Uşaqlar Birliyi QHT-nin Uşaq Sığınacağı Reinteqrasiya Mərkəzində, 60 saylı körpələr evi - uşaq bağçasında monitorinqlər keçirilib.
Keçirilən monitorinqlə bağlı yayılan hesabatda qeyd olunur ki, körpələr evləri və uşaq sığınacaq mərkəzində bir sıra nöqsanlar aşkar olunub.
Məlumatda qeyd olunur ki, monitorinq qrupu tərəfindən siyahı üzrə müəyyən edilmiş dövlət uşaq müəssisələrinə baxış zamanı uşaqların saxlanması, tərbiyəsi, qidalanması vəziyyəti, onların inteqrasiyası və reabilitasiyası, həmçinin, müəssisənin mövcud vəziyyəti qiymətləndirilib, aşkar edilən nöqsanlar, eləcə də müəssisələrin inkişafı ilə bağlı tövsiyələr protokollaşdırılıb.
Məlumat üçün bildirək ki, əvvəllər də bəzi körpələr evi, eyni zamanda, uşaq bağçalarında uşaqların saxlanması, qidalanması və digər məsələlərlə bağlı nöqsanlar aşkar olunub. Bu sahədə aparılan işlərə rəğmən, hələ də uşaq evlərində körpələrə lazımi dərəcədə nəvaziş göstərilmir. Halbuki, dövlət tərəfindən uşaq evlərində olan uşaqlara qayğı göstərilməsi, onların düzgün qidalanması, reabilatasiyası ilə bağlı hər bir şərait yaradılıb. Lakin bəzi uşaq evi rəhbərləri, bağça müdirələri dövlətin uşaqlara göstərdiyi eyni münasibəti sərgiləmir.
Dövlət qurumlarının körpələr evləri və uşaq sığınacaq mərkəzində apardıqları monitorinqlə bağlı adıçəkilən müəssisələrlə əlaqə saxladıq.
1 saylı Körpələr evi - Simuzər Topçubaşova: “Uşaqların saxlanması, qidalanması ilə bağlı hər hansı bir problem yaşanmır”
1 saylı Körpələr evinin baş həkimi əvəzi Simuzər Topçubaşova “Bakı-Xəbər”ə açıqlamasında qeyd etdi ki, uşaqların saxlanması, qidalanması ilə bağlı hər hansı bir problem yaşanmır: “Uşaqlar yüksək səviyyədə qidalanır. İşçilər körpələrə qayğı və nəvazişlə yanaşırlar”.
60 saylı körpələr evi - Alidə: “Bu mövzu ilə bağlı danışmaq istəmirəm”
60 saylı körpələr evinin Alidə adlı əməkdaşı keçirilən monitorinq və çalışdığı müəssisədə uşaqlara necə münasibət bəslənilməsinə münasibət bildirmək istəmədi.
Aytəkin Kamranqızı: “… əvvəllər bu sahədə ciddi problemlər var idi”
Sosioloq Aytəkin Kamranqızı bizimlə söhbətində bildirdi ki, bu gün bəzi körpələr evlərində saxlanan uşaqlara lazımi səviyyədə qayğı göstərilmir: “Bəzi körpələr, uşaq evləri, uşaq bağçalarında uşaqların təminatı yüksək səviyyədədir. O uşaqlara maddi təminatla yanaşı, valideyn qayğısını hiss etdirmək lazımdır. Düzdür, heç bir tərbiyəçi uşağa bu hissi yaşada bilməz. Ancaq onlara adi xoş söz söyləmək, başlarına sığal çəkmək olar. Təəssüf ki, ayrı-ayrı uşaq evlərində olan körpələrlə sərt davranırlar”.
Uşaqların qidalanması, onların reabilatasiyasına gəlincə, həmsöhbətimiz qeyd etdi ki, əvvəllər bu sahədə ciddi problemlər var idi. Ancaq son illər görülən işlər sayəsində uşaqların qidalanması ilə bağlı vəziyyət müsbətə doğri dəyişib.
Günel CƏLİLOVA
