Bu günlərdə redaksiyamıza Bakı şəhərində yerləşən 20 saylı məktəb-liseydən şikayət daxil olub. Şikayətçilər 3-cü sinif şagirdlərinin valideynləridir. İddia edilir ki, sinfin valideynləri ilə yaradılmış "WhatsApp qrupu"nda tez-tez pul yığımı ilə bağlı təkliflər yazılır. Bu təklifləri valideyn komitəsinin sədri göndərir. Daha doğrusu, sinif rəhbərinin göstərişinə əsasən valideyn komitəsinin sədri qrupdakı valideynlərdən ara-sıra pul yığır. Budəfəki "pul yığımı" isə məktəbdə keçiriləcək "İspan günləri" ilə bağlıdır. Valideynlər bildirirlər ki, hər şagirddən 5 manat istənilir, ümumiyyətlə, hər sinif üçün 100 manat dəyərində pul yığılması nəzərdə tutulur.
Valideynlər iddia edirlər ki, məktəbə, şagirdlərə aid olmayan tədbirlər üçün də "pul yığımı" prosesi gedir. Növbəti pul yığımı isə “İspan günləri” üçün keçiriləcək tədbirlə bağlıdır.
Məsələni dəqiqləşdirmək üçün 20 saylı məktəblə əlaqə saxladıq. İlk öncə məktəbin direktoru Səadət Veyisova ilə əlaqə saxlamağa cəhd göstərsək də, buna nail ola bilmədik. Özünü Xanım kimi təqdim edən katibə isə valideynlərin məlum şikayəti ilə bağlı bunları dedi: “Mən direktor və müavinləri ilə danışdım, bizim məktəbdə heç kimdən pul yığılmır. Hazırda direktorumuz məşğuldur, dərslərdədir. Valideyn gedib nazirliyə şikayət edə bilər. Səsyazma da ola bilməz. Əminliklə bildiririk ki, bir il beş aydır pul yığımı baş verməyib. Elə bir problem varsa, Bakı Şəhəri üzrə Təhsil İdarəsinə müraciət edilsin".
Bəşarət Məmmədov: “Təhsil İdarəsi tərəfindən münasibət bildirmək üçün bu məsələ araşdırılmalıdır”
Bakı Şəhəri üzrə Təhsil İdarəsinin İctimaiyyətlə əlaqələr sektorunun müdiri Bəşarət Məmmədov bizimlə söhbətində qeyd etdi ki, şikayətçi valideynlər yaranmış vəziyyətlə bağlı [email protected] emailinə yazsınlar: “Təhsil İdarəsi tərəfindən münasibət bildirmək üçün bu məsələ araşdırılmalıdır. Araşdırma üçün anonim olmayan müraciət lazımdır. Sorğu kimi isə [email protected] və ya [email protected] emailinə yazın”.
Kamran Əsədov: “İspan günləri” adlı tədbir üçün pul yığılması təəccüb doğurur, çünki adıçəkilən məktəbin kifayət qədər büdcəsi var”
Təhsil eksperti Kamran Əsədov məsələ ilə bağlı bildirdi ki, təhsil müəssisələrində müxtəlif xalqlara, ölkələrə məxsus günlər keçirilir. Bu tip tədbirlər ya Təhsil Nazirliyinin, ya da orta məktəbin öz maliyyə dəstəyilə həyata keçirilir: “Bu tip tədbirlərlə bağlı məktəb şagirdlərindən pul tələb olunması düzgün deyil. 20 saylı məktəbin şagirdlərindən “İspan günləri” adlı tədbir üçün pul yığılması təəccüb doğurur. Çünki adıçəkilən məktəbin kifayət qədər büdcəsi var”.
Həmsöhbətimiz onu da vurğuladı ki, məktəblilərdən keçirilən hər hansı tədbir üçün pul yığılması qanunvericiliyin tələbinə ziddir: “Ümumiyyətlə, orta məktəblərdən heç bir tədbir üçün pul yığılmamalıdır. Nəzərə almaq lazımdır ki, orta məktəblər də dövlət müəssisəsidir. “İspan günləri” adlı tədbir kifayət qədər uğurlu layihədir. Bu tədbir sayəsində şagirdlərə həmin ölkənin mədəniyyəti, tarixi, mətbəxi ilə bağlı məlumat verilir. Belə bir tədbirin keçirilməsi üçün şagirdlərdən pul istənilməsi düzgün deyil”.
Günel CƏLİLOVA
