Bakıda 162 saylı məktəbdə azyaşlı şagirdin intihar etməsi bir sıra əlavə mövzuların müzakirəsinə yola açıb. Bəzi sosial şəbəkə iştirakçıları həmin şagirdin rus bölməsində oxuduğunu əsas gətirərək, əcnəbi dildə alınan təhsilə qarşı çıxırlar.
Onların arqumentləri bundan ibarətdir ki, rus bölmələrində təhsil olan şagirdlər əyləncə məkanlarına daha çox meylli olurlar və savad dərəcələri Azərbaycan bölməsindən aşağıdır. Hətta bildirirlər ki, ali məktəblərə abituriyentlər arasında ən yüksək balları rus deyil, məhz Azərbaycan bölməsinin məzunları toplayırlar. Təbii ki, bununla heç də hamı razılaşmır. Əksinə, birinci fikrin müəlliflərinə qarşı ciddi və arqumentləşdirilmiş cavablar verilir. Bu baxımdan da bizə təhsil üzrə ekspert olan şəxslərin rəyləri maraqlıdır. Rus bölmələri barədə deyilən mənfi fikirləri doğru saymaq olarmı və rusdilli orta məktəb təhsilinin ölkəmizin ümummilli maraqlarına nə kimi təsiri var?
Etibar Əliyev: “Rus bölməsində təhsil alan uşaqların dünyagörüşü və savadlarının çox olması…”
Təhsil üzrə ekspert Etibar Əliyev “Bakı-Xəbər”ə açıqlamasında bildirdi ki, rus bölmələri ilə bağlı səsləndirilən əsaslandırılmamış mənfi fikirlərlə razı deyil: “Azərbaycanda rus bölməsini bitirib ölkəmizin elmindən tutmuş, bütün sahələrinə qədər böyük töhfələr vermiş kifayət qədər parlaq sima var. Mən onların adlarını sadalasam, buna nə zaman yetər, nə də sizin qəzetin həcmi bunu tutar. Rus dilində təhsil almaq insanın milli kökündən qopması anlamına gəlməməlidir. Cəmiyyətdə baş verən hansısa bir xoşagəlməz hadisəni təhsilin hansı dildə alınması ilə bağlamağın adı savadsızlıqdır. Orta təhsilin mənzərəsi belədir ki, şagirdin hansı dildə təhsil almasından asılı olmayaraq, ona tərbiyənin də praktikasını öyrədirlər. Rus bölməsində oxuyan uşaqlarla bağlı bu cür ittihamlar qəbuledilməzdir. Uşağın tərbiyə almasında 3 əsas faktor var. Bunun birincisi ailədir, ikincisi məktəb, üçüncüsü isə uşağa təsir edə bilən məktəbdənkənar ətraf mühitin təsiridir. Bu hamıya aiddir və bunu dil tədrisinə görə çeşidləmək doğru deyil. Bu gün Azərbaycanda ingilisdilli məktəblərin böyük təbliğatı gedir. 30-40 il qabaq bu yox idi. Elə detallar var ki, bizim istəyimizdən asılı olmayaraq baş verir. Bu gün kimsə uşağına əcnəbi dildə təhsil verməyə üstünlük verirsə, deməli, onun əlində hansısa əsası var. Bu o demək deyil ki, həmin adam övladını məktəbə pozulmaq üçün qoyur. Çox acı da olsa bunu deməliyəm ki, rus bölməsində təhsil alan uşaqların dünyagörüşü və savadlarının çox olması həm də həmin dildə ədəbiyyatın keyfiyyətli, bol olması ilə bağlıdır. Həm də məktəblə bağlı olan praktik ədəbiyyat o dildə boldur. Bunu deməklə heç də rus bölmələrini müdafiə etmirəm. Sadəcə, müəllimlər həmin ədəbiyyatdan bəhrələnib şagirdlərə daha yaxşı tədris verirlər. Bunu qəbul etməliyik. Bu yöndə aparılan ayrıseçkiliklə razılaşmıram”.
Məhəmmədəli QƏRİBLİ
