Bir sıra elektron KİV-də Bakı Slavyan Universitetində (BSU) tələbələrə əsassız təhsil haqqı hesablanması, rektorun imzaladığı aktda 60 min manat kənarlaşma olduğu yazılır. Qeyd edilənə görə, bu faktlar Hesablama Palatasının Bakı Slavyan Universitetində apardığı audit yoxlamasının nəticəsində aşkarlanıb.
Hesablama Palatasının yaydığı məlumata görə, Bakı Slavyan Universiteti üzrə daxilolmaların və xərclərin proqnozlaşdırılması və icrasının qanunvericiliyə uyğunluğunun auditi 1 yanvar 2016-cı il tarixindən 1 iyul 2018-ci il tarixinədək olan dövrü əhatə etməklə, 2018-ci ilin 19 sentyabr tarixindən 19 oktyabr tarixinədək aparılıb.
Audit zamanı məlum olub ki, universitetdə ödənişli əsaslarla təhsil almış, müxtəlif səbəblərdən xaric edilmiş, 1 iyul 2018 tarixinədək bərpa edilməmiş yerli və əcnəbi tələbələrdən, doktorantlardan və yenidən hazırlanma kurs dinləyicilərindən cəmi 126 150 manat təhsil haqqının vaxtında alınmasının təmin edilməməsi səbəbindən təhsil haqqı borcu qalıb. “Göstərilən təhsil haqqı borcunun 49 500 manatını 2016/2017-ci tədris ilinin əvvəlinədək yaranmış borclar təşkil edib. Xarici ölkələrin vətəndaşları olan tələbələrin universitetə qəbul edilməsinə dair əmr verilərkən müəyyən olunmuş təhsil haqqı məbləğinin minimum 50%-nin alınması tələbinin gözlənilməməsi nəticəsində 2016/2017-ci tədris ilində bakalavrlar və hazırlıq kursları üzrə ümumilikdə 2 halda olmaqla, 900 manat məbləğində təhsil haqqının alınması təmin edilməyib. 2017/2018-ci tədris ilində akademik məzuniyyət götürən tələbələr üzrə də düzgün olmayaraq hesablama verilib, nəticədə 14 halda olmaqla 18 150 manat borc yaranıb. Yaz semestrinin əvvəlində başqa ali təhsil müəssisələrinə köçürülən tələbələrə təhsil almadığı dövrdə düzgün olmayaraq, 2015/2016 və 2017/2018-ci tədris illərində 3 halda olmaqla, 3 min 400 manat təhsil haqqı hesablanıb. Ödənişli əsaslarla təhsil alan, lakin müvafiq tədris illərində universitetlə əlaqə saxlamadığı, həmçinin, fərdi tədris planı imzalamadığı üçün növbəti semestrdə xaric edilmiş tələbələrə düzgün olmayaraq, 2015/2016 və 2017/2018-ci tədris illərində 14 halda olmaqla, təhsil haqqı üzrə, ümumilikdə, 13 150 manat hesablama verilib. Nəticədə əsassız təhsil haqqı borcu yaranıb. Bakı Slavyan Universitetində ödənişli əsaslarla təhsil alanlardan təhsil haqqının müəyyən edilmiş təhsil müddətində alınması təmin edilmədiyindən, (39 halda 2016-cı il tarixinədək, 15 halda 2016-cı və 4 halda 2017-ci ildə) 01.07.2018-ci il tarixə universiteti bitirmiş tələbələrin təhsil haqqı üzrə 70 450 manat borcu qalıb. Həmçinin, qeyd olunan təhsil haqları tərtib edilmiş maliyyə hesabatlarında öz əksini tapmayıb. Tələbələrin universiteti bitirməsinə dair təhsil sənədi diplom şöbəsində saxlanır” - məlumatda qeyd edilir.
“... bədxahlar götürüb burada mənim adımı hallandırıblar”
Hesablama Palatasının yaydığı məlumatda əks olunan məsələlərə BSU rəhbərliyinin münasibətini öyrəndik. Bakı Slavyan Universitetinin rektoru, professor Nurlana Əliyeva “Bakı-Xəbər”ə açıqlamasında bildirdi ki, Hesablama Palatasının üzə çıxardığı faktlar onun rektorluğundan əvvəlki dövrlərə aiddir: “Bu məsələ köhnə illərə, mənim rektor olmadığım dövrlərə aiddir. Bu məlumat Hesablama Palatasının rəsmi saytında da var. Bu məndən əvvələ aid olduğu halda, bədxahlar götürüb burada mənim adımı hallandırıblar. Bunu kimin yazdığını bilmirəm, heç maraqlanmamışam, hansısa saytlar yazıb. Mən bu məsələyə münasibət bildirmək istəmirəm. Hesablama Palatasının saytında hər şey öz qaydasında yazılıb, maraqlanırsınızsa, baxıb tanış olun”.
Qeyd edək ki, Nurlana Əliyeva 23 iyun 2016-cı il tarixində Prezident İlham Əliyevin sərəncamı ilə Bakı Slavyan Universitetinin rektoru təyin edilib.
İradə SARIYEVA
