24/04/2019 02:39
728 x 90

Toyuq kəsimi və donuzçuluq bir yerdə - “Qida… Agentliyi bu işi inzibati qaydada həll edə bilməyəcək”…

“Qida Təhlükəsizliyi Agentliyi istehsal olunan məhsulun etiketlənməsinə nail olarsa, antisanitar şəraitdə fəaliyyət göstərən sexlərin sayı azalar”

img

Ərzaq təhlükəsizliyi əhalinin sağlamlığının strateji istiqamətlərindən biridir. Yeni qanunvericilik aktlarının qəbul edilməsi, qanunvericiliyin icra mexanizmi üçün sənədlərin hazırlanması və qanunvericilik aktlarının icrasına nəzarət sahəsində ölkəmizdə son illər əsaslı işlər görülsə də, yenə istər istehsal sahələrində, istərsə də iaşə obyektlərində həyat üçün təhlükəli olan xeyli neqativ halla qarşılaşırıq. İnsanlar ya naşılıqdan, ya da bilərəkdən bu halların yaranmasının iştirakçısına çevrilirlər.

Bakı və bölgələrdə mütəmadi olaraq antisanitariya rejimində fəaliyyət göstərən sexlər aşkar olunur. Həmin sexlərdə kustar üsulla qidalar hazırlanaraq, satışa çıxarılır. Bu günlərdə isə antisanitar şəraitdə fəaliyyət göstərən toyuq sexi aşkarlanıb. Maraqlı məqam ondan ibarətdir ki, qanunsuz emal sexi donuz yetişdirmə sahəsi ilə eyni ərazidə yerləşirmiş.

Ekspertlər bildirirlər ki, bu tip faktların sayı yetərincədir. Antisanitariya rejimində fəaliyyət göstərən sexlərin sayını azaltmaq üçün cərimələrin məbləği daha da artırılmalıdır.

  • Eyyub Hüseynov: “… kimyəvi boyalarla boyayıb kənd toyuğu adı ilə satışa çıxarırlar”

Azad İstehlakçılar Birliyinin sədri Eyyub Hüseynov “Bakı-Xəbər”ə açıqlamasında qeyd etdi ki, paytaxt Bakı ərazisində onlarla antisanitariya rejimində fəaliyyət göstərən toyuq sexi var: “Bu günlərdə Ramanada aşkar olunan sex dəryada bir damladır. Belə yerlərin sayı saysız-hesabsızdır. Elə toyuq sexləri var ki, onlar toyuğu  antisanitar şəraitdə yolur, kimyəvi boyalarla boyayıb kənd toyuğu adı ilə satışa çıxarırlar. Hesab edirəm ki, Qida Təhlükəsizliyi Agentliyi bu işi inzibati qaydada həll edə bilməyəcək. Çünki əhalinin kənd toyuğu adlı məhsula tələbatı yüksəkdir. Onu da deyim ki, Nazirlər Kabinetinin 95 saylı qərarına əsasən, ölkənin əmtəə bazarında satılan bütün məhsullar, o cümlədən, toyuqlar paketlənərək etiketlənməlidir. Məhsul etiketlənən zaman malın adı, hansı firma tərəfindən istehsal olunduğu, ünvanı, son istifadə tarixi düzgün şəkildə qeyd olunmalıdır. Qida Təhlükəsizliyi Agentliyi məhsulun etiketlənməsinə nail olarsa, bu sexlərin sayı azalar və kimyəvi rənglə boyanmış toyuqları almazlar”.

Həmsöhbətimizin sözlərinə görə, bu cür sexləri ifşa edib bağlamaq yox, onlara düzgün şəkildə fəaliyyət göstərmələri üçün həm şərait yaradılmalı, həm də maarifləndirmə xarakterli işlər görülməlidir.

Günel CƏLİLOVA

Son xəbərlər