İctimai iaşə obyektlərinin yerləşdiyi ərazilərdə xüsusən şənbə və bazar günlərində qoxu ilə müşayiət olunan tüstü insanlarda diskomfort yaradır. Təbii ki, bu vəziyyət vətəndaşların çoxsaylı şikayət və narazılığına səbəb olur. Bakı şəhərinin müxtəlif rayonlarında fəaliyyət göstərən ictimai iaşə obyektləri, restoran, kafe, şadlıq sarayları tərəfindən atmosferi tullantılarla çirkləndirmə, yerləşdikləri ərazilərdə, xüsusilə sakinlərin kütləvi istirahət yerlərində ətraf mühitə ziyan vurmaları vətəndaşları narahat edir.
Məlum olduğu kimi, bir müddət öncə Ekologiya və Təbii Sərvətlər Nazirliyi Bakıda havanı çirkləndirən restoran və kafe sahiblərinə ciddi xəbərdarlıq edərək, bu obyektlərdən çıxan tüstünün zərərsizləşdirilməsi üçün xüsusi avadanlıqların quraşdırılması ilə bağlı tapşırıq verdi. Eləcə də xəbərdarlıqda bu qaydalara əməl etməyən şadlıq sarayları və restoranların cərimələnməsi də ciddi vurğulanırdı.
Hətta Prezident İlham Əliyev də havanı çirkləndirən şadlıq evlərinə ciddi xəbərdarlıq etmişdi. Məlumat üçün bildirək ki, oktyabrın 10-da Nazirlər Kabinetinin 2018-ci ilin 9 ayı ərzində sosial-iqtisadi inkişafın yekunlarına həsr olunmuş iclasında Prezident İlham Əliyev deyib ki, havanı çirkləndirən məişət obyektlərinə ciddi xəbərdarlıq edilib: "Axsam saatlarında Bakı şəhərini tüstü bürüyür. Şadlıq evlərində tüstü təmizlənmədən havaya sovrulur. Ona görə çox ciddi xəbərdarlıq edilib, kim əməl etməyəcəksə, o şadlıq evinin, məişət obyektinin qapısı bağlanacaq. Mən tapşırmışam ki, bunun üçün hüquqi əsaslar hazırlansın. Bildiyimə görə, birinci xəbərdarlıqdan sonra bir çox məişət obyektləri təmizləyici qurğuları quraşdırmağa başlayıblar. Onların hamısına məsləhətim ondan ibarətdir ki, bu işi tezləşdirsinlər. Çünki ikinci xəbərdarlıq olmayacaq, bir də görəcəklər ki, əldən çıxdı. Ona görə tezliklə bütün böyük-kiçik məişət obyektlərində havanı çirkləndirən, havaya tüstü, kanserogen buraxan obyektlərdə təmizləyici qurğular quraşdırılmalıdır, müvafiq qurumlar monitorinq aparmalıdır. Mən Bakı Şəhər İcra Hakimiyyətinə, Ekologiya və Təbii Sərvətlər Nazirliyinə göstəriş verdim ki, mənə dərhal məlumat verilsin və dərhal ölçü götürüləcək".
Prezidentin məlum çıxışından sonra əksər şadlıq evləri bu qurğuların axtarışına başladı. Bəziləri hələ xəbərdarlıqdan öncə belə qurğulardan istifadə etdiklərini desələr də, nə filtr quraşdıran firmanın adını bilirlər, nə də qiymətini. Prezidentin şadlıq evləri ilə bağlı çıxışından təxminən 1 ilə yaxın vaxt keçib. Bu müddət ərzində bəzi şadlıq evləri təmizləyici qurğuları alıb quraşdırdı, bəziləri isə bu xəbərdalığı hələ də ciddi qəbul etmir.
Bu günlərdə təmizləyici qurğu quraşdırmayan, ekologiyaya ziyan vuran şadlıq evlərinin adları yenidən ictimaiyyətə açıqlanıb. Ekologiya və Təbii Sərvətlər Nazirliyinin Ətraf Mühit üzrə Milli Monitorinq Departamentinin direktor müavini Anar Tağıyev media nümayəndələrinə açıqlamasında bildirib ki, bəzi şadlıq sarayları və restoranlardan havaya tüstünün, iy-qoxunun yenidən yayılması ilə bağlı ETSN-ə şikayətlər daxil olduğundan, təkrar monitorinqlərə başlanıb: “Keçirilən monitorinqlər zamanı təmizləyici qurğuların filtrlərinin vaxtaşırı təmizlənmədiyi səbəbindən 31 obyektdən havaya yenə də normadan artıq tullantıların atıldığı məlum olub.
Bunlar “Real”, “Golden Ring”, “Sonalar Sonası”, “Milord”, “Həyat”, “Cənnət”, “Flaminqo”, “Qızıl Buta”, “Madonna”, “Afrodita”, “Oazis”, “Qızıl Tac”, “Gold Palace”, “Niel”, “İdeal”, “Şəhanə” və digər şadlıq saraylarıdır ki, onların sahiblərinə çirklənmiş filtrlərin vaxtlı-vaxtında dəyişdirilməsi barədə göstərişlər verilib. Araşdırma və monitorinqlər davam etdirilir”.
A.Tağıyev onu da bildirib ki, təmizləyici qurğuların quraşdırılması ilə iş bitmir, bundan sonra da qurğulara davamlı texniki xidmət göstərilməli, filtrlər vaxtaşırı dəyişdirilməli, verilən göstərişlər yerinə yetirilməlidir: “Ümumiyyətlə, havanı çirkləndirən amillərə qarşı ciddi mübarizə aparılması qarşımıza mühüm vəzifə kimi qoyulub və bundan sonra da bu istiqamətdə nazirlik tərəfindən lazımi və sərt tədbirlər görüləcək”.
Adları çəkilən şadlıq evlərində təmizləyici qurğunun quraşdırılmadığı iddia olunur. Ancaq həmin şadlıq evləri isə iddia edirlər ki, təmizləyici qurğu quraşdırılıb, haqsız yerə onların adı ekologiyaya zərər vuran şadlıq evi kimi çəkilir.
“Real” şadlıq evi - Samir Qaraşov: “Monitorinq keçirilən zaman şadlıq evinin içərisinə daxil olub…”
“Real” şadlıq evinin inzibatçısı Samir Qaraşov “Bakı-Xəbər”ə açıqlamasında qeyd etdi ki, uzun müddətdir restorana təmizləyici qurğu quraşdırılıb: “15 gün öncə isə qurğunun filtrləri təmizlənərək dəyişdirilib. Mütəmadi olaraq qurğunun filtrləri dəyişdirilərək istifadə olunur. Bizim restorandan ətrafa insanları narahat edəcək tüstü yayılmır. Bir neçə gün öncə şadlıq evinin qarşısında bəzi şəxslərin kamera ilə nəsə çəkib qeyd apardıqlarını gördüm. Maraqlıdır, bu siyahını tərtib edən şəxs şadlıq evinin xarici görkəminə baxıb restoran haqqında fikir bildirir? Monitorinq keçirilən zaman şadlıq evinin içərisinə daxil olub təmizləyici qurğunun quraşdırıldığını şəxsən müşahidə edə bilərdilər”.
“Golden Ring” şadlıq evi - Nicat Abbasov: “… biz restorana adıçəkilən qurğunu quraşdırdıq”
“Golden Ring” şadlıq evinin inzibatçısı Nicat Abbasov bizimlə söhbətində bildirdi ki, Ekologiya və Təbii Sərvətlər Nazirliyinin şadlıq evlərində təmizləyici qurğu quraşdırması ilə bağlı ilk təklifi gündəmə gələn zaman biz restorana adıçəkilən qurğunu quraşdırdıq: “15 gün əvvəl təmizləyici qurğunun filtrləri dəyişdirilib. Nəzərə almaq lazımdır ki, “Golden Ring” şadlıq evi Bəkir Çobanzadə küçəsində yerləşir. Restoranlar da bu küçədə olduğu üçün, bütün diqqət əsas burada fəaliyyət göstərən şadlıq evlərinin üzərindədir. “Golden Ring” şadlıq evində də təmizləyici qurğu quraşdırılıb”.
“Sonalar Sonası” şadlıq evi - Cavid Hüseynov: “Qurğunun filtrləri 15-20 gündən bir dəyişdirilir”
“Sonalar Sonası” şadlıq evinin inzibatçısı Cavid Hüseynov “Bakı-Xəbər”ə açıqlamasında bildirdi ki, təmizləyici qurğu restorana çoxdan quraşdırılıb. Qurğunun filtrləri isə 15-20 gündən bir dəyişdirilir.
“Flaminqo” şadlıq evi – Tahir: “Təmizləyici qurğu restorana 2 ay öncə quraşdırılıb”
“Flaminqo” şadlıq evinin inzibatçısı Tahir adlı şəxs bizimlə söhbətində bildirdi ki, təmizləyici qurğu restoranda 2 ay öncə quraşdırılıb. Qurğu quraşdırılan gündən etibarən mütəmadi olaraq filtrləri dəyişdirilir. Restorandan ətrafa insanları narahat edəcək, nə də ekologiyanı korlayacaq tüstü buraxılmır.
“Oazis” şadlıq evi - Habil Ağayev: “… nəyə əsasən təmizləyici qurğusu olan şadlıq evinin adı qeyd olunur?”
“Oazis” şadlıq evinin inzibatçısı Habil Ağayev də qeyd etdi ki, çalışdığı restoranın ekologiyanı pozan şadlıq evi kimi təqdim olunması düzgün deyil: “Çünki şadlıq evinə təmizləyici qurğu uzun müddətdir quraşdırılıb, filtrlər isə tez-tez dəyişdirilir. Onu da bildirim ki, filtrlər təmizləyici qurğunu quraşdıran şirkərin əməkdaşları tərəfindən təmizlənir. Maraqlıdır, siyahı tərtib olunarkən nəyə əsasən təmizləyici qurğusu olan şadlıq evinin adı qeyd olunur. İstənilən şəxs istədiyi zaman “Oazis” şadlıq evinə gəlib təmizləyici qurğunu və onun işlək vəziyyətdə olduğunu müşahidə edə bilər”.
Günel CƏLİLOVA
