Müqəddəs Kərimov: “Əhalinin kustar üsullarla çəkdiyi su xətləri tələbatı ödəmir” Anar Cəbrayıllı: “Daş karxanası yaşayış massivinə su xəttinin çəkilməsi layihədə var, amma bu, qarşıdakı illərdə reallaşacaq”
Maştağa qəsəbəsində yerləşən Daş karxanası massivi nisbətən yeni salınan yaşayış məntəqələrindən biri hesab olunur. Əvvəllər bu ərazilər çöllük olub. Zaman keçdikcə, oradakı torpaqlar satılıb və yeni evlər, obyektlər tikilib. Yerli sakinlərin dediyinə görə, ərazidə qrunt sular çox olduğuna görə bir sıra ərazilər qamışla örtülüb. Doxsanıncı illərin ortalarından başlayaraq sözügedən ərazilər satılmağa başlanıb. Beləcə Daş karxanasında fərdi evlərin tikintisi artmağa başlayıb.
Bu proses Azərbaycanda bələdiyyələr yaradılandan sonra daha geniş vüsət alıb. Belə ki, bələdiyyələr necə gəldi torpaqları satıblar. Nəticədə həmin ərazilərdə nizamsız formada evlər inşa olunmağa başlayıb. Adətən hansısa yaşayış massivi salınanda birinci orada müvafiq infrastruktur yaradılır. Yəni kommunukasiya xətləri çəkilir, ondan sonra yaşayış evi və ya hansısa obyektlər tikilir. Daş karxanası yaşayış massivində isə bütün bunlar əksinə olub. İlk əvvəl evlər tikilib, ondan sonra isə işıq və qaz xətləri çəkilib. Sözügedən kommunikasiya xətlərinin yenilənməsi isə son illərdə mümkün olub. O vaxta qədər isə bu sahədə işlər yarımçıq olub. Nəticədə tez-tez elektrik kəsilib, qaz xətləri yerin altıyla çəkildiyi üçün bu, bir sıra problemlərə yol açıb.
Bu arada Daş karxanası yaşayış massivi sakini Kərimov Müqəddəs Müqabil oğlu redaksiyamıza şikayətlə müraciət edərək sakinlərin su təminatında ciddi problemlər olduğunu qeyd etdi. Onun sözlərinə görə, yaşayış massivində su xətləri bərbad vəziyyətdədir: “Əvvəllər sakinlər suyu pulla alırdılar. Sonra əhali öz vəsaiti hesabına şlanqlarla uzaq məsafədən su çəkməyə başladı. Bu həm maddi baxımdan baha başa gəldi, həm də keyfiyyət baxımından münasib deyil. Çünki son illər Daş karxanasında tikilən evlərin sayı xeyli artıb. Bu səbəbdən suya olan tələbat da yüksəlib. Nəticədə suyun verilmə təzyiqi aşağı düşüb. Əhalinin kustar üsullarla çəkdiyi su xətləri tələbatı ödəmir. Əsl müsibət bundan sonra olacaq. Çünki qarşıdan yay gəlir. Yayda suya olan tələbat kəskin şəkildə artır, amma tələbat ödənilmir. Çünki burada normal su xətti yoxdur. Ağaclar suvarılır, həyətlərdə bostan məhsulları becərilir, isti ilə əlaqədar tez-tez yuyunmalı olursan. Bütün bunların hamısı suyun hesabına mümkündür. Yayda isə burada su olmur və camaat zülm çəkir. “Azərsu” bütün evlərə sayğac qoyub, amma məhəlləyə su xətti çəkmir. Daş karxanasında on min nəfərə qədər əhali yaşayır. Burada yaşayanların əksəriyyəti son 20 il ərzində rayonlardan gəlib. Nə vaxta qədər əziyyət çəkək? Yaxşı olardı ki, Daş karxanasında normal su xətləri çəkilsin və bizim bununla bağlı problemimiz həll edilsin. Onu da qeyd edim ki, Daş karxanası yaşayış massivində kanalizasiya sistemi yoxdur. Hərə bir çuxur qazıb tullantı sularını ora axıdır. Bunun özü isə bir ayrı dərddir. Ona görə də kanalizasiya xətlərinin çəkilməsinə də ehtiyac var”.
Sözügedən məsələ ilə əlaqədar “Azərsu” Açıq Səhmdar Cəmiyyətinin mətbuat xidməti və ictimai əlaqələr şöbəsinin rəhbəri Anar Cəbrayıllı ilə əlaqə saxladıq. Qurum rəsmisi qəzetimizə verdiyi açıqlamasında Daş karxanasında su təchizatı ilə bağlı problemlərin olduğunu etiraf etdi: “Orada su xəttinin çəkilməsi planımızda var, amma bütün bunlar mərhələli şəkildə olacaq. Dövlət büdcəsindən vəsait ayrıldıqca bu işlər görülür. Bu gün Sabunçu rayonunun bəzi ərazilərində, o cümlədən, Binəqədi, Səbail, Abşeron rayonlarının bəzi kənd və qəsəbələrində işlər görülür. Yeni su xətləri çəkilir, köhnələri yenilənir. Deməyim odur ki, Maştağa qəsəbəsində yerləşən Daş karxanası yaşayış massivinə də su xəttinin çəkilməsi layihədə var, amma bu, qarşıdakı illərdə reallaşacaq. Ancaq bununla bağlı konkret vaxt deyə bilmərəm. Nəinki Daş karxanası, o cümlədən Savalan, Gülçülük və həmin zonada yerləşən digər yaşayış massivlərinə yeni su xətləri çəkiləcək. Bir məqamı qeyd edim ki, bu, investisiya ilə bağlı olan məsələ olduğu üçün, mərhələli şəkildə həyata keçirilir. Məsələn, Prezident İlham Əliyev bu məqsədlə Şəkiyə 25 milyon manat vəsait ayırdı. Həm dövlət büdcəsindən bununla bağlı vəsait ayrılır, həm də beynəlxalq layihələr çərçivəsində işlər görülür. Bu il su sektoruna hardasa 100 milyon manata yaxın investisiya yatırılacaq. Ona görə də yaxın illərdə sözügedən məsələ öz həllini tapacaq”.
Belə aydın oldu ki, Daş karxanası yaşayış massivi sakinləri hələ bir müddət gözləməli olacaqlar.
Vidadi ORDAHALLI
