Gürcüstanda yaşayan soydaşlarımızın bütün qayğı və problemlərinin həllinə, habelə onların təhsil məsələsinə Azərbaycan dövləti hər zaman ciddi dəstək verir. Bu gün Gürcüstanda yaşayan azərbaycanlıların dini təhsil alması hazırda aktual məsələlərdən biridir. Bunu Gürcüstan Müsəlmanları İdarəsinin (GMİ) sədri Hacı Ramin İgidov da qeyd edib.
O, mətbuata bildirib ki, Gürcüstanın azərbaycanlı din xadimlərinin Azərbaycanda dini təhsil almalarına ehtiyac var.
R.İgidovun bildirdiyinə görə, Gürcüstanda olan müsəlman din xadimləri müxtəlif ərəb və qonşu ölkələrdə təhsil alırlar: “Onların müəyyən hissəsi Gürcüstan tərəfindən tanınan dini təhsil ocaqlarında biliklərə yiyələnirlər. Lakin, təəssüflər olsun ki, bəzi din xadimləri qeyri-ənənəvi dini cərəyanların təbliğ olunduğu təhsil müəssisələrini bitirərək, yanlış biliklərə malik olurlar. Bəzən onlar Gürcüstana ekstremist və təhrifçi fikirlərlə dönürlər və bu da ölkə üçün təhlükədir. Bu baxımdan, Gürcüstan azərbaycanlılarının Azərbaycanda dini təhsil almaları ilə bağlı təşəbbüsü dəstəkləyirik”.
R.İgidov qeyd edib ki, rəhbərlik etdiyi qurum Gürcüstandan azərbaycanlı din xadimlərinin dini təhsillə bağlı Azərbaycana göndərilməsi istiqamətində əməkdaşlığa hazırdır: “İdarəmiz Qafqaz Müsəlmanları İdarəsi və digər müvafiq qurumlarla əməkdaşlığa hazırdır. Azərbaycanda dini təhsil alan Gürcüstanın azərbaycanlı vətəndaşları savadlı olmaqla yanaşı, həm də Gürcüstan ictimaiyyəti tərəfindən də qəbul olunmalıdırlar”.
O, həmçinin, qeyd edib ki, Gürcüstanda qeyri-ənənəvi dinlər geniş yayılıb və bu ölkənin müsəlman din xadimlərinin Azərbaycanda təhsil almaları bu cür təhlükəli dini cərəyanların qarşısını ala bilər.
Sözügedən məsələ ilə bağlı Azərbaycan İlahiyyat İnstitutu və Dini Qurumlarla İş üzrə Dövlət Komitəsi ilə əlaqə saxladıq, hər iki qurumdan bildirdilər ki, müraciət edən tərəf rəsmi instansiya olmadığı üçün, bu məsələyə şərh verə bilməzlər.
Dinşünas Hacı Təyyar Hüseynli “Bakı-Xəbər”ə bildirdi ki, Gürcüstanda yaşayan soydaşlarımızın Azərbaycanda ali təhsil almasına şərait yaradılsa, bunun böyük faydası olar. “Əvvəla deyim ki, Gürcüstan Müsəlmanları İdarəsinin rəhbəri hacı Ramin İgidovu hələ yeniyetməlik illərindən tanıyıram, o, mənim tələbə yoldaşımdır. 14 yaşımızdan bir yerdə oxumuşuq. O, Qardabani rayonundan olan soydaşımızdır. Hacı Ramin İgidov Gürcüstanda yaşayan azərbaycanlıların sağlam dini təhsil alması üçün məqsədyönlü, faydalı iş aparır. Onun bu istiqamətdə fəaliyyətini təqdir edirəm. Cəlil Məmmədquluzadənin dövründən indiyə kimi başqa ölkələrdə dini təhsil alanlar oradakı dini təhsillə bərabər qarışıq cərəyanları da, xalqımıza, dövlətimizə zərər vuran fikirləri də daşıyıb gətirirlər. Yəni onlar aldıqları dini təhsildən əlavə, bu kimi xoşagəlməzlikləri də bura daşıyırlar. Gürcüstanda yaşayan dindarların məhz Azərbaycanda təhsil alması olduqca əhəmiyyətli olardı. Bu gün ölkəmizdə İlahiyyat İnstitutu yaranıb və Dini Qurumlarla İş üzrə Dövlət Komitəsi çox yetkin, sivil, cəmiyyətimizə, milli məfkurəmizə uyğun işlər həyata keçirir. Gürcüstanda yaşayan soydaşlarımızın, dindarların Azərbaycanda İlahiyyat İnstitutunda dini təhsil almalarına şərait yaradılması çox təqdirəlayiq hal olardı. Onların burada təhsil alması ideyasını dəstəkləyirəm və bu işə tərəfdaram” - deyə o bildirdi.
İradə SARIYEVA
