Rəsul Cahangirli: “Müsbət miqrasiya saldosu davam edir”
“Son 15 ildə əhalinin 1,7 milyon nəfər artımı bizim gücümüzü, ölkəmizin qüdrətini artırır”. Xəbər verildiyi kimi, fu fikirləri Prezident İlham Əliyev Respublika Perinatal Mərkəzində Azərbaycanın 10 milyonuncu sakini Mehriban Həsənovanın valideynləri Rauf Həsənov və Nigar Ocaqova ilə görüşündə deyib.
Ölkə başçısı əhalinin artımının birbaşa sosial vəziyyətlə bağlı olduğunu vurğulayıb: “Əhalimiz artır. Yadımdadır, 9 milyonuncu sakin 2010-cu ildə dünyaya gəldi. Doqquz il ərzində əhalimiz 1 milyon artdı. Amma son 15 il ərzində əhali 1,7 milyon nəfər artdı. Bu, bizim gücümüzü, ölkəmizin qüdrətini artırır. Eyni zamanda, onu göstərir ki, ölkəmizdə sosial-iqtisadi inkişaf gedir. Çünki əhalinin artımı birbaşa sosial vəziyyətlə bağlıdır”.
Bütövlükdə, əhalimizin sayı hər il sabit şəkildə artır. Bütün bunlar demoqrafik inkişafa təkan verir. Dünyanın bir çox ölkəsində əhali sayında azalma müşahidə edildiyi halda, Azərbaycanda əhalinin artımı davam edir. Azərbaycan müstəqillik əldə etdikdən sonra əhalinin sayı artıb, azalmayıb. Ancaq Azərbaycandan fərqli olaraq, Ermənistanda əhali azalır. Belə ki, 1991-ci ildə müstəqillik əldə etdikdən sonra Ermənistan əhalisinin sayı 634,7 min nəfər azalıb. 2018-ci ildə Azərbaycanda 139 min uşaq doğulduğu halda, Ermənistanda doğulan uşaqların sayı 36502 nəfər olub.
Göründüyü kimi, Azərbaycanda demoqrafik vəziyyət çox yaxşı məcrada inkişaf edir. Bütün bunlarla yanaşı, Azərbaycanda əhalinin artması hansı sosial-iqisadi amillərlə bağlıdır?
Məsələyə münasibət bildirən ekspert Rəsul Cahangirlinin sözlərinə görə, bu bir sıra amillərlə bağlıdır: “Məsələ ondadır ki, Prezident İlham Əliyevin sosial-iqtisadi inkişaf strategiyası nəticəsində çoxsaylı nailiyyət əldə olunub. Ölkədə iqtisadi inkişaf əhalinin bütün təbəqələrinin həyat şəraitinə müsbət təsir göstərir. Əhalinin gəlirləri artıb, yeni iş yerləri açılıb, bölgələrdən paytaxta axın azalıb, regionlarda istehsal və xidmət sahələri yaradılıb. Sosial xərclər artıb. Təbii ki, bütün bunlar əhalinin sosial rifah halına müsbət təsir göstərir. Nəticədə ölkə əhalisinin sayı artır. Yəni bunda sosial rifah səviyyəsinin davamlı olaraq yaxşılaşması özünü göstərir. Bu amillər isə demoqrafik inkişaf üçün vacib şərtlər sırasındadır. 2003-cü ilin əvvəlindən ölkə əhalisinin sayı 18 faizdən çox artıb. Bunun nəticəsidir ki, ölkədə doğulanların sayı ölənlərin sayını 2-2,5 dəfə üstələyir. Müsbət miqrasiya saldosu davam edir. 2018-ci ildə daimi yaşamaq üçün ölkəmizə gələnlərin sayı gedənlərin sayından iki dəfədən çox olub. Onu da qeyd edim ki, əhalinin artımı qarşısında genişmiqyaslı tədbirlər görülür, yeni uşaq bağçaları və məktəblər, müalicə müəssisələri, idman kompleksləri istifadəyə verilir. Hazırda ölkədə demoqrafik vəziyyətin müsbət səviyyədə olmasında iqtisadi inkişafın müstəsna rolu var. Əhali artımı məhz bu amillərlə bağlıdır. Əhalinin gəlirləri artır, sosial vəziyyət yaxşılaşır. Bütün bunlar, təbii ki, əhalinin artmasına öz müsbət təsirini göstərir”.
Vidadi ORDAHALLI
