Məhərrəm Zülfüqarlı: “Sosial müavinət və təqaüdlərin artırılması onların maddi vəziyyətlərinin yaxşılaşmasına öz müsbət təsirini göstərəcək”
Azərbaycanda I qrup əlilliyə görə sosial müavinət (150 manat) və təqaüd (100 manat+50 manat) formasında aprelin 1-dən, ümumilikdə, 300 manat ödəniləcək. Bununla bağlı Əmək və Əhalinin Sosial Müdafiəsi Nazirliyinin yaydığı məlumata görə, bu, hazırkı müvafiq məbləğlə müqayisədə 145 manat və ya 93,5 faiz çoxdur. Sosial müavinətin məbləği II qrup əlilliyə görə 2,1 dəfə artırılmaqla 61 manatdan 130 manata, III qrup əlilliyə görə isə 2,1 dəfə çox olmaqla 52 manatdan 110 manata çatdırılır.
Məlumatda o da qeyd olunub ki, Prezident İlham Əliyevin “Əhalinin sosial müdafiəsinin gücləndirilməsi sahəsində əlavə tədbirlər haqqında” 25 fevral 2019-cu il tarixli Sərəncamı 577 minədək vətəndaşın rifahının yaxşılaşdırılması istiqamətində əhəmiyyətli irəliləyişə imkan verib. Onlardan 165 min 376 nəfəri ümumi xəstəlik, hərbi xidmət dövründə xəstələnmə, əmək zədəsi və peşə xəstəliyi, hərbi əməliyyatlar keçirilən zonada olmaqla, Çernobıl AES-də qəzanın ləğvi ilə əlaqədar səbəblərdən əlilliyi olan (əmək pensiyası almayan) vətəndaşlardır.
Sərəncama əsasən, bu kateqoriyaya aid vətəndaşlardan I qrup əlilliyi olan şəxslərə ödənilən sosial müavinətin məbləği 83 faiz artırılaraq 82 manatdan 150 manata, onlar üçün Azərbaycan Respublikası Prezidentinin aylıq təqaüdünün məbləği isə 37 faiz artırılaraq 73 manatdan 100 manata çatdırılır. Həmçinin, sərəncam I qrup əlilliyi olan şəxslərə qulluq edənlərə Prezidentin aylıq təqaüdü kimi 50 manat məbləğində təqaüdün təsis edilməsini nəzərdə tutur.
Göründüyü kimi, I qrup əlilliyə görə sosial müavinət və təqaüdlərin məbləği əhəmiyyətli dərəcədə artırılıb. Nəzərə alsaq ki, sözügedən qrupa aid olan şəxslər əmək qabiliyyətli sayılmırlar, o baxımdan, məlum artımlar onların sosial vəziyyətinin yaxşılaşması üçün mühüm əhəmiyyət kəsb edir. Həmin artımları ekspertlər necə dəyərləndirirlər?
Məsələyə münasibət bildirən İctimai Problemlərin Tədqiqi Assosiasiyasının rəhbəri Məhərrəm Zülfüqarlının sözlərinə görə, əlilliyi olan şəxslərlə bağlı məlum qərar çox mühüm əhəmiyyət kəsb edir: “Bütün hallarda, məlum qərar müsbət qiymətləndirilməlidir. Çünki indiyə qədər əlilliyi olan şəxslərə verilən sosial müavinətlər bu qədər artırılmamışdı. Məsələ ondadır ki, əlilliyi olan şəxslər əhalinin həssas qrupunu təşkil edir. Onlara xüsusi qayğının göstərilməsi vacibdir. Xüsusən də hərəkət imkanları daha çox məhdud olan I qrup əlilliyi olan şəxslərlə bağlı belə qərarın verilməsi çox müsbət haldır. Ona görə ki, sosial müavinət və təqaüdlərin artırılması onların maddi vəziyyətlərinin yaxşılaşmasına öz müsbət təsirini göstərəcək. Ən başlıcası, bu onların problemlərinin həllinə kömək edəcək. Çünki əvvəllər buna görə verilən sosial müavinətlərin həcmi az idi. Hesab edirəm ki, bu istiqamətdə görülən tədbirlər davamlı olacaq.Yəni dövlətin imkanları genişləndikcə, əhalinin sosial baxımdan həssas təbəqəsinə göstərilən diqqət və qayğı daha da genişləndiriləcək. O üzdən, bu yöndə görülən işləri alqışlamaq lazımdır. Bir məqamı da qeyd edim ki, ölkə başçısı bu cür artımların, islahatların davamlı olacağını bildirdi. Biz də arzulayırıq ki, bu yöndə görülən işlər davamlı olsun və bütün sahələri əhatə etsin”.
Vidadi ORDAHALLI
