Fatimə Hacıbəyli: “Sənətkarı şəxsi mənafeyi deyil, sənətin taleyi maraqlandırmalıdır”
Prezident İlham Əliyevin və ölkəmizin Birinci vitse-prezidenti Mehriban Əliyevanın bir qrup mədəniyyət və incəsənət xadimini qəbul etməsi və onlarla səmimi atmosferdə söhbət etməsi ictimaiyyət tərəfindən müsbət qarşılansa da, sosial şəbəkələrdə bəzilərinin yaradılan şəraitdən sui-istifadə etməsi məsələsi müzakirə edilir.
Burada ən çox diqqətçəkən məqam görüş iştirakçılarının bir qisminin Prezidentə və Birinci vitse-prezidentə şəxsi xahişlə müraciət etməsidir. Bu məsələ bir neçə gündür sosial şəbəkələrdə müxtəlif insanlar tərəfindən ciddi tənqid edilir. Bəzi sənət adamlarının mədəniyyətin taleyüklü məsələlərini nəzərə almadan, özləri üçün mənzil, fəxri ad, yaxınlarının adlarının əbədiləşdirilməsi kimi xahişlər etməsi həqiqətən də təqdirəlayiq hal deyil. Çünki sənət adamları belə tarixi görüşə mədəniyyət və incəsənətin mövcud problemlərini müzakirə etmək üçün dəvət edilmişdilər. Müasir Azərbaycan mədəniyyətinin bir sıra məsələləri var ki, onların dövlət tərəfindən həll edilməsi vacibdir.
“Vəfa” Sosial İctimai Birliyinin sədri Fatimə Hacıbəyli “Bakı-Xəbər”ə bildirdi ki, bəzi sənət adamlarının sosial şəbəkələrdə və ictimaiyyətdə müzakirə mövzusuna çevrilən hərəkətləri normal qəbul edilə bilməz. “Prezidentin və Mehriban xanımın bu görüşə qatılan mədəniyyət və incəsənət xadimləri ilə səmimi və açıq söhbət aparması həqiqətən də təqdirəlayiqdir. Onlar burada iştirak edən sənət adamlarına, ziyalılara imkan yaratdılar ki, onları narahat edən problemləri dilə gətirsinlər. Doğrudur, bir neçə mədəniyyət xadimi mədəniyyətin, ədəbiyyatın bir sıra ciddi qayğılarını dilə gətirdilər. Sağ olsun Prezident, o problemlərin həll edilməsi üçün müvafiq qurumlara tapşırıqlar verdi. Artıq o problemlərin aradan qaldırılması yönündə addımlar atılır. Bu sahədə nəticə var. Bu öz yerində. Görüşdə iştirak edən bəzi sənət adamları Prezidentə öz şəxsi problemləri ilə bağlı xahişlər etdilər. Əslində, bunu yaradılan səmimi şəraitdən sui-istifadə kimi qiymətləndirmək olar. Mədəniyyət və incəsənətin daha vacib məsələlərinin müzakirə edildiyi görüşdə biri babasının adının əbədiləşdirilməsini istədi, o biri Prezidentdən mənzil və fəxri ad istədi. Bu görüş hansısa sənət adamlarının şəxsi xahişlərinin yerinə yetirilməsi üçün təşkil edilməmişdi, mədəniyyət və incəsənətin daha ciddi problemlərinin gündəmə gətirilməsi, həll edilməsi üçün keçirilirdi. Lakin bəziləri hesab etdilər ki, Prezidentlə və Mehriban xanımla görüş onların şəxsi xahişlərini etmələri üçün bir fürsətdir. İnanın, onların bu hərəkətləri ictimaiyyət tərəfindən müsbət qarşılanmadı. Sənətkarı şəxsi mənafeyi deyil, sənətin taleyi maraqlandırmalıdır, təəssüf ki, o görüşdə çox az sənətkarın yalnız sənətin inkişafı haqqında düşündüyü görsəndi” - deyə F.Hacıbəyli qeyd etdi.
O vurğuladı ki, bəzi sənət adamlarının o görüşdə bir-birinin bəhsinə çıxış etməsi də diqqətdən yayınmayıb. Onun sözlərinə görə, bu, yanlış tendensiyadır və sənət adamları belə məsələlərdən çəkinməlidirlər. F.Hacıbəyli qeyd etdi ki, onsuz da Prezident İlham Əliyev hər zaman mədəniyyətin inkişafına ciddi dəstək verir, mədəniyyət xadimlərinə diqqət və qayğı ilə yanaşır, onlara təqaüd, mükafat verir, mənzillə təmin edir.
İradə SARIYEVA
