Şəmsəddin Əliyev: “O zaman erməni təcavüzünün qarşısının alınmasında, sözün həqiqi mənasında, polislər böyük fədakarlıq göstəriblər”
Prezident İlham Əliyevin 2019-cu il 28 yanvar tarixli Fərmanının icrası olaraq, birdəfəlik ödəmənin (11 000 manat) verilməsi prosesi 1997-ci il avqustun 2-dək şəhid olmuş daxili işlər orqanları əməkdaşlarının vərəsələrini də əhatə edir.
Əmək və Əhalinin Sosial Müdafiəsi Nazirliyindən verilən məlumata görə, şəhid polis əməkdaşları ilə bağlı Daxili İşlər Nazirliyi tərəfindən təqdim edilmiş siyahı ƏƏSMN-in rəsmi saytının (sosial.gov.az) “Birdəfəlik ödəmə” bölməsində yerləşdirilib. Belə ki, vərəsələr həmin bölmədə daxili işlər orqanlarının şəhid olmuş əməkdaşının adı, soyadı və atasının adını qeyd edərək, birdəfəlik ödəməni almaq hüquqlarının olub-olmadığını öyrənirlər. Bundan sonra birdəfəlik ödəmə almaq hüququ olan vərəsələr notariat kontorlarına müvafiq sənədləri təqdim edir, vərəsəlik şəhadətnaməsi əldə edir və onların sənədləri elektron qaydada Əmək və Əhalinin Sosial Müdafiəsi Nazirliyinə təqdim olunur. Nazirlikdəki müvafiq komissiya isə şəhidlərin vərəsələrinin sənədləri əsasında birdəfəlik ödəmənin verilməsinə dair qərarlar qəbul edir.
1997-ci il avqustun 2-dək şəhid olmuş daxili işlər orqanları əməkdaşlarından ibarət 400 nəfərdən çox şəhidin vərəsələrinin birdəfəlik ödəmə almaq hüquqları müəyyən olunub. Onlardan artıq əksəriyyətinin birdəfəlik ödəmə almaq üçün sənədləri nazirliyə təqdim edilib.
Yeri gəlmişkən onu da qeyd edək ki, daxili işlər orqanları əməkdaşlarının Qarabağ müharibəsi zamanı torpaqlarımızın müdafiəsində xidmətləri böyükdür. Ermənistanın Azərbaycana təcavüzünün ilk vaxtlarında hələ Milli Ordu yaradılmamışdı. Torpaqların müdafiəsini daxili işlər orqanları əməkdaşları həyata keçirirdilər. Milli Ordu yaradılandan sonra da polis işçiləri fədakarlıqla müharibədə iştirak etdilər, qəhrəmanlıq göstərdilər. Bir sıra polis işçiləri göstərdikləri rəşadətə görə Milli Qəhrəman adına layiq görülüb. O baxımdan şəhid olmuş daxili işlər orqanları əməkdaşlarının vərəsələrinin də sözügedən birdəfəlik yardımdan faydalanması sosial ədalətin göstəricisidir. O üzdən, məlum qərarı ekspertlər necə dəyərləndirirlər?
Məsələyə münasibət bildirən “Polisə Dəstək” İctimai Birliyinin rəhbəri Şəmsəddin Əliyev şəhid olmuş daxili işlər orqanları əməkdaşlarının vərəsələrinə birdəfəlik ödəmənin verilməsinə müsbət prizmadan yanaşdı: “Hesab edirəm ki, belə bir qərarın verilməsi çox doğru addımdır. Məsələ ondadır ki, Milli Ordunun yaradılmasından əvvəl ölkə daxilində cinayətkarlıqla mübarizə aparan daxili işlər orqanları əməkdaşları həm də Vətənin müdafiəsi ilə məşğul idilər. O zaman erməni təcavüzünün qarşısının alınmasında, sözün həqiqi mənasında, polislər böyük fədakarlıq göstəriblər. Mən özüm də həmin döyüşlərin iştirakçısıyam. Tam səmimi deyirəm ki, polis əməkdaşları, onun sıravi və zabit heyətinin hər biri növbə ilə daxili işlər nazirinin əmri ilə ezamiyyətə yollanırdı. Müharibədə kifayət qədər polis əməkdaşı şücaət göstərib. Müharibədə yüzlərlə polis əməkdaşı şəhid olub, yaralanıb. Onlarla polis göstərdiyi qəhrəmanlığa görə Milli Qəhrəman adına layiq görülüb. Ona görə də Prezident İlham Əliyevin bu addımı təqdirəlayiqdir. Bu, vətənpərvərlik ruhunun daha da güclənməsinə xidmət edir. Bundan sonra da ehtiyac duyularsa, polis vətənpərvərlik ruhundan çıxış edərək torpaqların azad olunmasında iştirak edəcək. Bütün hallarda, məlum qərar sosial baxımdan ədalətlidir və polisə olan münasibətin təzahürüdür. O üzdən, sözügedən qərarı alqışlayıram”.
Vidadi ORDAHALLI
