Qadir Bayramlı: “… insanlar daha ucuz və keyfiyyətli kənd təsərrüfatı məhsulları əldə edəcəklər”
Azərbaycan xalqının zəngin adət-ənənələrini özündə cəmləşdirən, milli-mənəvi dəyərlər sistemində özünəməxsus yeri olan Novruz bayramının yaxınlaşmasına az qalıb. Bayramla əlaqədar olaraq paytaxtın müxtəlif ərazilərində yarmarkalar təşkil olunub.
Prezident İlham Əliyevin tapşırığına əsasən, paytaxtın 14 ünvanında, ölkənin bütün şəhər və rayon mərkəzlərində martın 2-dən etibarən hər həftənin şənbə və bazar günləri, martın 16-dan 21-dək isə hər gün Novruz yarmarkaları keçiriləcək. Yarmarkalarda respublikamızın müxtəlif bölgələrindən fermerlər, ailə təsərrüfatları əhaliyə geniş çeşiddə kənd təsərrüfatı məhsullarını bazar qiymətlərindən xeyli ucuz təklif edirlər.
Qeyd edək ki, yarmarkalarda məhsulların keyfiyyətinə və qiymətlərinə müvafiq qurumlar tərəfindən nəzarət olunur. Bakı şəhərində təşkil olunan 14 yarmarkada satışa respublikanın 42 rayonundan 52 adda məhsul çıxarılır.
Novruz yarmarkasının keçirilməsində məqsəd təmiz və keyfiyyətli məhsulu istehlakçıya çatdırmaqdır, eyni zamanda, satışa çıxarılan məhsul bazar və marketlərdən fərqli olaraq daha ucuzdur.
Keçirilən Novruz yarmarkalarının əhalinin sosial vəziyyətinə nə kimi təsiri barəsində danışan Azərbaycan Dövlət İqtisad Universitetinin dosenti Qadir Bayramlı “Bakı-Xəbər”ə açıqlamasında qeyd etdi ki, Azərbaycanda bayram öncəsi yarmarkaların keçirilməsi ənənə halını alıb. Həmin yarmarkaların keçirilməsində məqsəd nisbətən ucuz kənd təsərrüfatı məhsullarını istehlakçılara çatdırmaqdır. Yarmarkaların keçirilməsi müsbət təşəbbüsdür.
Q.Bayramlı bildirdi ki, Novruz yarmarkalarının keçirilməsinin sosial əhəmiyyəti yüksəkdir. Bu layihə nəticəsində rayonlarda yaşayan işsiz insanların məşğuliyyət problemi aradan qaldırılıb. Eyni zamanda, Bakının bazarlarına uzaq olan ərazidə təşkil olunması həmin məsafədə yaşayan insanların vaxt itkisi olmadan istədiyi ərzağı əldə etməsinə imkan verir.
Həmsöhbətimiz təklif edir ki, yarmarkalar təkcə bayramqabağı deyil, ay ərzində iki və üç dəfə keçirilsin: “Beləliklə, alıcı mütəmadi həm keyfiyyətli məhsul əldə edər, həm də fermerlər istehsal etdikləri məhsulu sərbəst şəkildə bazara çıxarar. Sadəcə, yarmarkaların bazar olan ərazidən kənarda təşkil olunması daha məqsədəuyğundur”.
Həmsöhbətimizin sözlərinə görə, rayonlardan paytaxta mal gətirən insanların işinin yüngülləşdirilməsi üçün onlar xüsusi nəqliyyat vasitəsilə təmin olunmalıdır.
Günel CƏLİLOVA
