Leyla Şıxlinskaya adına klinika: “Kuveyzin qiyməti 140 manatdır” Elmi-Tədqiqat Pediatriya İnstitutu: “Dövlət müəssisəsi olduğu üçün burada xidmətlər pulsuzdur” Mərkəzi Klinika: “Kuveyz qalan uşaq üçün birinci gün 300, sonrakı hər gün üçün 250 manat ödənilməlidir” Dr.Erkin Rəhimov: “Uşağın kuveyzdə saxlanması onun orqanizmindən asılıdır” Adil Qeybulla: “Müasir dövrdə kuveyzsiz xəstəxana təsəvvür etmək mümkün deyil”
Çəkisi 500, 700, 1000, 1200 qramlıq, digər normal doğulmuşlar kimi görünməyən, amma diri bir körpə olaraq yaşamaq uğrunda mübarizə aparan, ovuc içi boyda bədəni ilə bu qədər sistemə, iynə dərmana tab gətirən varlıqlar həyatın möcüzəsidir. O uşaqlar dünyaya göz açdığı andan etibarən yaşam uğrunda mücadilə edirlər. Vaxtından əvvəl dünyaya gələn uşaqlar adətən kuveyzdə saxlanır.
Araşdırmalara görə, son zamanlar vaxtından əvvəl doğuşun sayı artıb. Vaxtından əvvəl doğuşun artması səbəblərinin müxtəlif olduğu qeyd olunur. İlk olaraq bildirilir ki, həm ana, həm də uşaqda hər hansı bir problem yaranarsa, o zaman uşaq vaxtından əvvəl dünyaya gəlir. Həmçinin, stress faktorunun da burada rolu az deyil.
Belə bir fikir də səslənir ki, qeysəriyyə əməliyyatı tez həyata keçirilir. Qeysəriyyə əməliyyatları çox zaman 38-39 həftədə yox, müxtəlif risqlər nəzərə alınaraq, 33-35-ci həftədə həyata keçirilir. Özəl klinikalar ana və körpə ölümü statistikasından qorxduğu üçün daha asan xəstələri qəbul edirlər. Özəl klinikalarda qeysəriyyə təklif edən ginekoloq-cərrahlar uşağı bətndən 33-36 həftədə çıxararaq, kuveyzə yerləşdirirlər. Dövlət xəstəxanalarından fərqli olaraq, özəl klinakalarda kuveyzin qiyməti isə əlçatan deyil.
Bəzi özəl klinikalarda kuveyzin birgünlük qiyməti 300 manatdır. Belə olan halda, valideyn həm ananın əməliyyat xərcini ödəməli, həm müalicəsini təmin etməli, eyni zamanda, neçə gün kuveyzdə qalacaqsa, onun pulunu ödəməlidir.
Leyla Şıxlinskaya adına klinikadan “Bakı-Xəbər”ə verilən məlumata görə, vaxtından əvvəl doğulan uşaqlar kuveyzdə saxlanır: “Vaxtından əvvəl uşaqlara yaxşı baxılır. Onlara digər körpələr kimi olması üçün köməklik göstərilir. O uşaqlar isidici aparatlarla təmasda olurlar. Xəstəxanada 4 növ kuveyz xidməti var. Hər birinin qiyməti fərqlidir. Kuveyzin qiyməti 140 manatdır. Eynilə, isidici yataqda 140 manatdər. Onu da bildirim ki, müalicə üçün lazım olan dərman, həkim xərcinə və digər tibbi tədbirlərə ayrıca məbləğ ödənilir”.
Xalq arasında “OMD” kimi tanınan Elmi-Tədqiqat Pediatriya İnstitutu da dövlət müəssisəsi olduğu üçün, burada xidmətlər pulsuzdur. Amma burada yatan xəstələr bildirirlər ki, pulsuz olduğu üçün çox qarışıqlıq olur. Pasient çox olduğu üçün, xəstələrə lazımi münasibət göstərilmir.
Mərkəzi Klinikadan isə bildirdilər ki, xəstəxanaya daxil olan valideyn ilk olaraq 2000 manat depozit qoymalıdır. Kuveyzdə qalmanın qiyməti isə fərqlidir: “Belə ki, ilk gün üçün 300 manat, sonrakı hər gün üçün 250 manat ödənilməlidir. Müalicə üçün ayrıca məbləğ ödənilməlidir. O da bildirildi ki, 2000 manat depozit valideynlərdə arxayınçılıq yaratmasın. Bəzən bu məbləğ 1 günün içində belə xərclənə bilər.
Uzman pediatr-neonatoloq Dr. Erkin Rəhimov qəzetimizə açıqlamasında bunları bildirdi: “Fəaliyyətə başladığımız gündən bu yana “Baku Medical Plaza” Neonatologiya şöbəsi olaraq daim bizdə doğulan körpələrimizə xüsusi qayğı ilə yanaşır. Bunun üçün tibbin bütün son yeniliklərini yaxından təqib edirik. İnkişaf etmiş ölkələrdə istifadə olunan ən yeni texnologiyaları və müalicə növlərini xəstəxanamızda tətbiq etməyə davam edirik. Bunun sayəsində bir çox ağır və ya vaxtından əvvəl doğulmuş övladımız həyatda qalır”.
Neanotoloq qeyd etdi ki, uşağın kuveyzdə saxlanması onun orqanizmindən asılıdır: “Təcrübəmdə uşaqların kuveyzdə saxlanması ilə bağlı müxtəlif hallara rast gəlmişəm. 23 həftəlik uşaq dünyaya gəlmişdi, onun çəkisi təxminən 500 qram idi. Təbii ki, bu cür uşaqlar iki və ya üç ay kuveyzdə qalmalı olurlar. Elə uşaq da var ki, 30 dəqiqə və ya 1 saat kuveyzdə qalmaqla isinir və bədən hərarəti normal səviyyəyə çatır”.
Həmsöhbətimiz onu da əlavə etdi ki, onun çalışdığı “Baku Medical Plaza”da kuveyzdə uşaqların saxlanma qiyməti fərqlidir: “Ümumiyyətlə, hər xəstəxana göstərdiyi xidmətə görə qiymət müəyyən edir. Bizdə də qiymətlər fərqlidir. Sığortası olan xəstələr üçün qiymət fərqli olur”.
Tibbi ekspert, professor Adil Qeybulla qeyd etdi ki, müasir dövrdə kuveyzsiz xəstəxana təsəvvür etmək mümkün deyil: “Hazırda kuveyzlərin daha müasir formaları var. Dövlət xəstəxanaları, bütün doğum evləri mütləq yeni kuveyz aparatları ilə təmin olunmalıdırlar. Çünki istənilən an yeni doğulan uşağın qeyd olunan aparata yerləşdirilmə ehtimalı yarana bilər. Hansı özəl xəstəxanada doğuş həyata keçirilirsə, mütləq kuveyz aparatı ilə təmin olunub. Məndə olan məlumata görə, özəl klinikalar dövlət xəstəxanalarına nisbətən bu sahədə daha yaxşı fəaliyyət göstərirlər.
Uşaqların yaşaması üçün kuveyz mütləq olmalıdır. Xatırladım ki, illər öncə Ağdam rayonunda yarımçıq doğulan əkizlər üçün xəstəxanada kuveyz tapılmamışdı. Əkizlər taksi ilə Bərdəyə, oradan da həkim qəbul etmədiyi üçün Bakıya gətirilmişdi. Təəssüf ki, uşağın biri yolda dünyasını dəyişmişdi. Bakıdakı həkimlər bildirmişdilər ki, uşaqlar vaxtında Bakıya çatdırılsaydı, ölüm faktı baş verməzdi. Bu kimi halların baş verməməsi üçün doğum həyata keçirilən bütün xəstəxanalar mütləq kuveyzlə təmin olunmalıdırlar”.
Bu yaxınlarda üçüncü övladını dünyaya gətirən jurnalist Həbibə Abdullanın qızı Qəmər də bir neçə gün kuveyzdə saxlanan körpələrdəndir. H.Abdulla bildirdi ki, Bakı Perinatal Mərkəzdə həm analara, həm də körpələrə yüksək səviyyədə şərait yaradılıb: “Qızım 36 həftəsində dünyaya gəldi. Həkimlər qərar verdilər ki, bir neçə gün kuveyzdə qalsın. Xəstəxanada məndən nə əməliyyat, nə kuveyz, nə də müalicə üçün heç bir ödəniş istənilmədi. Oradakı xəstələrdən də hər hansı şikayət, narazılıq eşitmədim. Bir çox xəstəxanalardan şikayətlər eşitmişəm, qohumlar, tanışlar müxtəlif xəstəxanalarda ana olublar və onlardan ödənişlər tələb olunmasından şikayətləniblər. Ancaq burada başqa mühit vardı. Ana və uşaqlara göstərilən qayğını görəndə, sözün düzü, özümü hansısa başqa ölkədə hiss etdim. Çünki bizim gündəlik rast gəldiyimiz etinasız, laqeyd münasibət orada yox idi. Yeri gəlmişkən, sizin qəzetiniz vasitəsilə xəstəxananın rəhbəri Sevinc Məmmədova başda olmaqla bütün tibbi personala minnətdarlığımı bildirirəm”.
Günel CƏLİLOVA
