Musa Quliyev: “...Bu çox ciddi bir stimul olacaq”
Aydın Hüseynov: “Bu qərar rəqəmlərlə ifadə olunan əməkhaqqı artımından daha geniş məna daşıyır”
Sentyabrın 1-dən TƏBİB-in tabeliyindəki tibb müəssisələrində çalışan tibb işçilərinin əməkhaqları artırılıb. Birinci vitse-prezident Mehriban Əliyeva tibb işçilərinin maddi rifahının yaxşılaşdırılması, əməyinin yüksək qiymətləndirilməsi və səhiyyə sistemində insan kapitalının gücləndirilməsi məqsədilə TƏBİB tabeliyində çalışan tibb işçilərinin əməkhaqqılarının artırılması təşəbbüsü ilə çıxış edib. Prezident İlham Əliyev təşəbbüsü müsbət qarşılayaraq onun icrası ilə bağlı müvafiq tapşırıq verib.
Bu tibb işçilərinin sosial rifahının yüksəldilməsi istiqamətində növbəti mühüm addımdır.
Yeni əməkhaqqı qaydaları 2026-cı il sentyabrın 1-dən tətbiq olunacaq və TƏBİB-in tabeliyindəki tibb müəssisələrində çalışan 72 212 tibb işçisini əhatə edəcək.
Tibbi Ərazi Bölmələrini İdrarəetmə Birliyinin icraçı direktoru Anar Bayramov sentyabrın 2-də keçirilən mətbuat konfransında bildirib ki, islahat nəticəsində ilkin səhiyyə xidməti göstərən ailə həkimi və sahə həkimi vəzifələri üzrə çalışan həkim mütəxəssislərin aylıq əməkhaqqı 1150 manatdan 2000 manata çatdırılacaq. Bu, mövcud məbləğlə müqayisədə 850 manat və ya 74 faiz artım deməkdir. Təcili tibbi yardım xidmətində çalışan həkimlər üçün də əhəmiyyətli artımlar nəzərdə tutulub. Respublika Təcili Təxirəsalınmaz Tibbi Yardım Mərkəzinin həkiminin əməkhaqqı 1550 manatdan 2200 manata yüksələcək. Bununla yanaşı, tibb mərkəzlərinin təcili tibbi yardım şöbələrində çalışan həkimlərin aylıq əməkhaqqı 1550 manatdan 2500 manata yüksələcək. Beləliklə, artım 950 manat və ya 61 faiz təşkil edəcək. 3A və 3B kateqoriyalı tibb müəssisələrinin təcili tibbi yardım şöbələrində çalışan həkimlərin aylıq əməkhaqqı isə 2100 manatdan 3000 manata çatdırılacaq”, - deyə o vurğulayıb.
Anar Bayramov deyib ki, islahatın əsas istiqamətlərindən biri həkimlərin regionlara cəlb edilməsinin stimullaşdırılması və regionlarda kadr təminatının gücləndirilməsidir. Bu məqsədlə Bakı, Abşeron, Sumqayıt və Gəncə istisna olmaqla digər şəhər və rayonlarda kadr çatışmazlığının daha çox müşahidə edildiyi ixtisaslar üzrə xüsusi stimullaşdırıcı əlavələr tətbiq olunacaq:”Belə ki, regionlarda çalışan uşaq anestezioloq-reanimatoloqlarının aylıq əməkhaqqı 1450 manatdan 3000 manata yüksələcək. Bu, 107 faiz artım deməkdir. Neonatoloqların əməkhaqqı 1450 manatdan 2400 manata çatdırılacaq ki, bu da 950 manat və ya 66 faiz artım deməkdir. Hemodializ həkimlərinin əməkhaqqı isə 1450 manatdan 2250 manata çatdırılacaq ki, bu da 800 manat və ya 55 faiz artım deməkdir. Həkim çatışmazlığı olan regionlarda mama-ginekologiya, neyrocərrahiyyə, uşaq cərrahiyyəsi, ürək-damar cərrahiyyəsi, üz-çənə cərrahiyyəsi və travmatologiya ixtisasları üzrə həkimlərin aylıq əməkhaqqı 1450 manatdan 2150 manata yüksələcək. Bu, əlavə 700 manat və ya 48 faiz artım deməkdir".
Bu 72 mindən çox tibb işçisinin həyatına təsir göstərəcək. Bundan sonra onların həyatı, sosial rifahı necə olacaq?
Millət vəkili Musa Quliyev baki-xeber.com-a bildirdi ki, Birinci vitse-prezident Mehriban Əliyevanın təşəbbüsü, Prezident İlham Əliyevin tapşırığı əsasında tibb işçilərinin maaşının artırılması olduqca əlamətdar bir hadisədir. “Tibb sahəsində çalışan 72 mindən çox şəxsin əməkhaqqı yüksələcək, özü də kifayət qədər böyük artım nəzərdə tutulur. Eyni zamanda bu təkcə mexaniki bir artım deyil, tibb işçilərinin əməyinin stimullaşdırılması, onların əməyinə differensial yanaşma və regionlarda kadr çatışmazlığını aradan qaldırılması üçün mühüm bir stimul olacaq. Əlbəttə, tibb işçilərinə olan qayğı bütövlükdə vətəndaşa olan qayğının tərkib hissəsidir və tibbi xidmətin keyfiyyətinin yüksəldilməsinə səbəb olacaq. Necə deyərlər, hər şeyi kadrlar həll edir. Kadrların əməyinə differensial yanaşılması, onların sertifikasiyası, kvalifikasiyası, peşə vərdişləri, bacarıqları, eyni zamanda təcrübələri, bilikləri və onları əyani şəkildə tətbiq etmək bacarıqları differensial şəkildə qiymətləndirilir. Bu da doğru bir yanaşmadır”.
M.Quliyev hesab edir ki, bundan sonra dövrü olaraq orta aylıq əməkhaqqının artım tempinə uyğun olaraq tibb işçilərinin də əməkhaqqının artırılması nəzərdə tutulacaq. “Əlbəttə, tibb işçilərinin əməkhaqqlarının yüksəldilməsi hazırda TƏBİB sektorunda bir sıra çətinliklərin aradan qaldırılmasına səbəb ola biləcək, dövlət sektorundan özəl sektora, eyni zamanda regionlardan mərkəzə kadr axının qarşısı alınacaq, bu çox ciddi bir stimul olacaq. Amma bununla yanaşı şübhəsiz ki, digər addımlar da atılacaq, TƏBİB-də ciddi islahatlar, yenilənmələr gedir. Yəqin ki, yaxın vaxtlarda səhiyyə xidmətinin daha yüksəldilməsi üçün növbəti addımların atılmasının da şahidi olacağıq. Burada ilk növbədə ilkin səhiyyə xidmətinin yüksəldilməsi və əlçatanlığın yaxşılaşdırılması, özəl sektorla dövlət sektoru arasında münasibətlərin düzgün tənzimlənməsi, diaqnostika, müalicə məsələlərində tibbi protokolların daha geniş şəkildə tətbiq olunması, dərman təchizatının, o cümlədən tibb sığorta əsasında verilən dərman təchizatının daha yaxşılaşdırılması və çeşidinin genişləndirilməsi işlərini də görəcəyik”.
M.Quliyev bildirdi ki, bütövlükdə götürdükdə bu gün icbari tibbi sığorta sahəsində aparılan islahatlar gələcək üçün çox əsaslı bünövrə qoymuş olur və Azərbaycan səhiyyəsinin daha da inkişafına öz töhfəsini verəcək.
Millət vəkili Aydın Hüseynov da baki-xeber.com-a açıqlamasında bunu tibb işçilərinin rifahına yönələn mühüm addım kimi dəyərləndirdi.
A.Hüseynov bildirdi ki, tibb işçilərinin sosial rifahının yaxşılaşdırılması istiqamətində növbəti mühüm addım atılıb. “TƏBİB sistemində çalışan tibb işçilərinin əməkhaqları artırılıb.
Yeni əməkhaqqı qaydaları 2026-cı il sentyabrın 1-dən tətbiq olunur və TƏBİB-in tabeliyində fəaliyyət göstərən tibb müəssisələrində çalışan 72 212 tibb işçisini əhatə edir.
Bu qərar rəqəmlərlə ifadə olunan əməkhaqqı artımından daha geniş məna daşıyır. Səhiyyə sisteminin əsas dayaqlarından biri olan tibb işçilərinin əməyinə verilən dəyərin göstəricisi kimi qiymətləndirilə bilər. Həkimdən tibb bacısına, feldşerdən digər orta və kiçik tibb heyətinə qədər minlərlə əməkdaşın sosial təminatının gücləndirilməsi səhiyyə xidmətlərinin keyfiyyətinə də birbaşa təsir edən amillərdəndir”.
A.Hüseynov vurğuladı ki, Azərbaycanda əhalinin sosial rifahının yüksəldilməsi dövlət siyasətinin əsas istiqamətlərindən biri kimi diqqətdə saxlanılır. “Prezident İlham Əliyevin rəhbərliyi ilə həyata keçirilən sosial siyasətin mühüm xəttini vətəndaşların gəlirlərinin artırılması, əməkhaqlarının və sosial ödənişlərin yüksəldilməsi, həssas qrupların müdafiəsinin gücləndirilməsi təşkil edir. Son illərdə müxtəlif sahələrdə çalışan insanların sosial təminatının yaxşılaşdırılması istiqamətində atılan addımlar bu siyasətin ardıcıl xarakter daşıdığını göstərir.
Tibb işçilərinin üzərinə düşən məsuliyyət xüsusilə son illərdə daha da artıb. İnsan sağlamlığı və həyatı ilə bağlı qərarların verildiyi bir sahədə çalışanların əməyinin layiqli şəkildə qiymətləndirilməsi həm sosial ədalət, həm də səhiyyə sisteminin dayanıqlılığı baxımından mühüm əhəmiyyət daşıyır.
Əməkhaqlarının artırılması səhiyyə əməkdaşlarının motivasiyasının yüksəldilməsi, kadr potensialının qorunması və peşəyə marağın artırılması baxımından da əhəmiyyətli addımdır. Maddi təminatın yaxşılaşdırılması tibb işçilərinin peşə fəaliyyətinə daha yüksək motivasiya ilə yanaşmasına, səhiyyə müəssisələrində kadr sabitliyinin təmin olunmasına müsbət təsir göstərə bilər.
72 mindən çox tibb işçisini əhatə edən yeni qaydaların sentyabrın 1-dən tətbiq olunması səhiyyə sahəsində çalışan insanların sosial rifahına göstərilən diqqətin növbəti nümunəsidir. Səhiyyənin inkişafı müasir infrastrukturun, qabaqcıl tibbi texnologiyaların və keyfiyyətli xidmətlərin formalaşdırılması ilə yanaşı, bu sistemi yaşadan insanların əməyinin layiqincə qiymətləndirilməsindən də keçir”-deyə A.Hüseynov qeyd etdi.
Millət vəkili bildirdi ki, tibb işçilərinin sosial müdafiəsinin gücləndirilməsi səhiyyə sisteminin gələcəyinə qoyulan sərmayədir. “Çünki vətəndaşın sağlamlığının keşiyində dayanan həkimin, tibb bacısının və digər səhiyyə əməkdaşlarının rifahı yüksəldikcə, onların göstərdiyi xidmətin keyfiyyətinə və bütövlükdə səhiyyə sisteminə inamın möhkəmlənməsi üçün də daha əlverişli zəmin yaranır”-deyə A.Hüseynov əlavə etdi.
İradə SARIYEVA
