Ukrayna Prezidenti Zelenski Rusiya hava məkanının mülki aviasiya üçün "tamamilə təhlükəli" hala gəldiyini bildirib. O, aviaşirkətləri və sığorta şirkətlərini Rusiya hava limanlarına, əsasən Moskva, Sankt-Peterburq və digər əsas şəhərlərə uçuş riskləri barədə xəbərdar edib.
"Ukrayna mülki aviasiya üçün heç bir təhlükə yaratmır - tək bir mülki təyyarə belə yox. Sadəcə, dronlar Rusiya səmasında olacaq, ona görə də bunu nəzərə almalıyıq", - deyə Zelenski özünün Telegram kanalında yazıb və vurğulayıb ki, Rusiyanın başlatdığı müharibə onun səmasını bağlayır.
Dövlət başçısı xarici səfirləri və aviaşirkətləri bu məlumatları nəzərə almağa çağırıb və Ukrayna Xarici İşlər Nazirliyinə isə beynəlxalq təşkilatlara tam risk məlumatlarını təqdim etməyi tapşırıb.
"Biz Ukraynada günahsız insanların həyatını itirməsini istəmirik... Dronlar arasında mülki aviasiyaya yer yoxdur", - deyə Zelenski bildirib.
Qeyd edək ki, avqustun 20-də “The Atlantic” mənbələrə istinadən Ukraynanın süni intellektlə işləyən dronlardan istifadə edərək Moskva hava limanlarına genişmiqyaslı hücum hazırladığını bildirmişdi. Nəşrin məlumatına görə, "M&Ms" kod adlı əməliyyat keçmiş müdafiə naziri Mixail Fedorov tərəfindən iyul ayında istefa verməzdən əvvəl hazırlanıb. Plana əsasən, Moskvanın hava müdafiə sistemlərini alt-üst etmək və hava limanlarını iflic etmək üçün bir gecədə 1000-ə qədər kiçik dron buraxılacaq və bu da Turkish Airlines və Emirates də daxil olmaqla beynəlxalq aviaşirkətləri Rusiyaya uçuşları dayandırmağa məcbur edəcək. Mənbələrə görə, Zelenski əməliyyatı təsdiqləyib, lakin mülki təyyarələr üçün risklə bağlı narahatlıqlarını bildirib.
Lakin Zelenskinin ofisinin nümayəndəsi bu məlumatı "tamamilə cəfəngiyat" adlandıraraq qeyd edib ki, Ukrayna həqiqətən də Rusiya hava limanlarını bağlamaq istəyir, lakin mülki şəxsləri təhlükəyə atmadan zərbələr endirmək üçün kifayət qədər dəqiq silahlara malik deyil.
Bu arada, Avropa Aviasiya Təhlükəsizliyi Agentliyi (EASA) 2025-ci ilin yanvar ayından etibarən 60-cı meridianın qərbindəki Rusiya hava məkanında uçuşların qarşısını almağı tövsiyə edib. Ötən yay tövsiyə 31 yanvar 2027-ci ilə qədər uzadılıb. Hazırda AB-dən olan aviaşirkətlər Rusiyaya uçmur, lakin digər ölkələrdən olan bəzi aviaşirkətlər uçuşlar həyata keçirməyə davam edirlər.
Tahir TAĞIYEV
